ՎԱՀԱՆ ՅՈՎՀԱՆՆԻՍԵԱՆԻ ՈՐԴԻՆ` ՀՕՐ ՄԱՍԻՆ. «ԱՆՈՐ ՅՕԴՈՒԱԾՆԵՐԸ ԳՐՈՒԱԾ ԵՆ ՏԱՐԻՆԵՐ ԱՌԱՋ, ԲԱՅՑ ԿԱՐԾԷՔ ԱՅՍՕՐՈՒԱՆ ՀԱՄԱՐ ԳՐՈՒԱԾ ԵՆ»

0

Վահան Յովհաննիսեան քաղաքական գործիչն ու մտաւորականը բոլորին ծանօթ է, սակայն քիչեր գիտեն անոր հայրական կերպարին մասին:
«Հիանալի հայր էր: Ան կրցաւ տալ այն ամէնը, ինչ որ հայրը պէտք է տայ իր որդիին` դաստիարակութիւն, կրթութիւն, արժէքներ». «Երկիր»ի հետ զրոյցի մը ընթացքին Վահան Յովհաննիսեանին մասին ըսաւ Հայկ Յովհաննիսեանը, որ հօր ծննդեան տարեդարձին առիթով այսօր ընտանիքին հետ նոյնպէս այցելած էր անոր շիրիմը:
«Հօրս գործունէութիւնն ու կեանքը այնպէս դասաւորուած էր, որ ինքն իր ընտանիքի կեանքէն շատ երկար ժամանակահատուած բացակայ մնաց: Երեք-չորս տարեկան էի, երբ Արցախեան շարժումը սկսաւ եւ այդ ժամանակներէն սկսեալ` անընդհատ հօրս բացակայութիւնը նկատած եմ, բայց, միաժամանակ, կը հասկնայի, որ ինքը ինչ որ կարեւոր գործի, կարեւոր առաքելութեան վրայ է: Սկիզբը Արցախեան շարժումն էր, յետոյ` քաղաքական կեանքը Հայաստանի մէջ, այնուհետեւ` 90-ականներու կէսերուն, այն ժամանակուան վարչակարգին կողմէն անոր ձերբակալութիւնն էր, երեք տարի բանտին մէջ, յետոյ նորէն վերադարձ քաղաքական ասպարէզ. միշտ այդ բացակայութիւնը եղած է, բայց, անոր զուգահեռ, այն կարճ ժամանակահատուածներուն, զորս մենք կրցած ենք իր հետ անցընել, ան կրցած է ճիշդ արժէքներ եւ ճիշդ դաստիարակութիւն սերմանել իմ եւ ընտանիքիս մէջ», ըսաւ Յովհաննիսեան:
Ան յայտնեց, որ այնուամենայնիւ, երբեք չէ զղջացած հօր բացակայութիւններուն համար:
«Երբեք չեմ ըսեր` վա՜յ, ափսոս… Բնականաբար ցաւալի էր, որ երկար ժամանակ կը բացակայէր, բայց այն գիտակցութիւնը ունէինք, որ ինք կարեւոր առաքելութիւն ունի», յայտնեց Հայկը:
Պատասխանելով այն հարցումին, թէ ի՞նչ գնահատական կու տար Վահան Յովհաննիսեան, եթէ խօսեր այս օրերու մասին, Հայկը ըսաւ.«Ես այսօր տարբեր տեղերէ կը լսեմ, որ անոր բացակայութիւնը բաւական զգալի է թէ՛ կուսակցութեան մէջ, թէ՛ Հայաստանի քաղաքական կեանքին մէջ: Յաճախ ընկերներս կը հարցնեն` «ի՞նչ կ’ըսէր Վահան Յովհաննիսեան այսինչ դէպքին կամ իրավիճակին մասին». անշուշտ, դժուար է ըսել, թէ ինք ինչ կ’ըսէր, բայց կը կարծեմ՝ անոր գաղափարներուն հետ հաղորդակից ըլլալու լաւ ճամբայ մը կայ, այդ ալ` անոր ստորագրած յօդուածները, մտաւոր ժառանգութիւնը կարդալն է: Յատկապէս՝ անոր յօդուածաշարքը, որ կը կոչուի «Մայրամուտ, որը հարկաւոր է կասեցնել»: Ճիշդ երէկ ատիկա ընթերցեցի եւ պահ մը զգացի, որ այսօրուան մասին կը խօսի: Եւ վստահ եմ, որ այսօր հայաստանեան ներքաղաքական տարբեր բեւեռներու վրայ գտնուող մարդիկ, նոյնիսկ այս եզրը պիտի չվախնամ ըսելու` «բարիկադների(պատնէշներու) (ընդդիմութիւններու)» հակառակ կողմը գտնուող մարդիկ, իր գրածներէն կրնան որոշակի արժէքաւոր խորհուրդ քաղել: Կը կարծեմ` այդպէս կարելի է հասկնալ, թէ ինքը ինչ կ’ըսէր, կամ ինչ կը մտածէր: Այդ յօդուածները գրուած են տարիներ առաջ, բայց, կարծէք գրուած են այսօրուան համար»:
Յիշեցնենք, որ 16 Օգոստոսին Վահան Յովհաննիսեանի տարեդարձին առիթով անոր շիրիմը այցելած էին անոր ընտանիքի անդամները, թոռնիկները, զինակից եւ կուսակից ընկերները:
Յայտնենք նաեւ, որ Վահան Յովհաննիսեանի «Մայրամուտը, որը հարկաւոր է կասեցնել» յօդուածաշարքը կրնաք ընթերցել arfd.am կայքէջին վրայ:

Share.

Leave A Reply

This site uses Akismet to reduce spam. Learn how your comment data is processed.