ԹՈՐՈՆԹՈՅԻ ՄԷՋ ՏԵՂԻ ՈՒՆԵՑԱՒ ՀՅԴ ՔԵՄ-Ի 46-ՐԴ ՊԱՏԳԱՄԱՒՈՐԱԿԱՆ ԺՈՂՈՎԸ

0

«Հորիզոն».- 25-էն 26 Օգոստոսին, Թորոնթոյի Հայ Կեդրոնէն ներս տեղի ունեցաւ ՀՅԴ ՔԵՄ-ի (Քանատայի Երիտասարդական Միութեան) 46-րդ Պատգամաւորական Ժողովը։ Ժողովին ներկայ էին Քանատայի տարբեր շրջաններէն եկած 32 պամգամաւորներ, ներկայացնելով իրենց մասնաճիւղերը՝ « Լեւոն Շանթ» եւ «Բեկոր Աշոտ», Մոնթրէալ ու Լաւալ, «Արամ Մանուկեան», Գէմպրիճ, «Արշաւիր Շիրակեան»՝ Վանգուվըր եւ «Սիմոն Զաւարեան»՝ Թորոնթօ։ Ժողովին ներկայ էր ՀՅԴ Քանատայի ԿԿ-ի ՔԵՄ-ի ներկայացուցիչ ընկ. Արա Քրճիքեան: Հիւրաբար իրենց մասնակցութիւնը կը բերէին նաեւ՝ ՀՅԴ Քանատայի Պատանեկան Միութեան Ընդհանուր Վարիչ Մարմինի, ՀԵԴ Արեւելեան ու Արեւմտեան Ամերիկայի շրջաններու ներկայացուցիչները, ինչպէս նաեւ Վանաձորի ՀՅԴ ՔԵՄ-ի ամառնային ճամբարի տնօրէնուհին։

Ժողովի ընթացքին, պատգամաւորները բազմակողմանի քննարկումներ կատարեցին եւ արժեւորեցին միութեան անցնող տարեշրջանի աշխատանքները:

Ժողովի օրակարգի քննարկուող կարեւոր նիւթերէն էին՝ ՔԵՄ-ի կազմակերպական առաւել աշխուժացումը, ՀՅԴ ՔԵՄ-ի Վանաձորի ամառնային ճամբարը ու այս տարի իրականացած Սպիտակի ճամբարը, «Արծիւ» պաշտօնաթերթի հրատարակութեան շարունակականութիւնն ու տարածումը, Հայ Դատի գծով ՔԵՄ-ի քաղաքական գործունէութիւնն ու դաստիարակչական այլ ծրագիրները։

Ժողովը յատուկ կերպով կարեւորեց ՀՅԴ ՔԵՄ-ի Հայաստանեան ամառնային ճամբարներու ծրագիրին ընդլայնումը։ Հիմնուելով անցնող 8 տարիներու փորձին վրայ, որոնց ընթացքին ՔԵՄ-ականները Վանաձոր քաղաքին մէջ դաստիարակչական ճամբար իրականացուցած են, որոշուեցաւ աւելի մեծ թափով շարունակել գործը ու Սպիտակի ճամբարն ալ դարձնել տարեկան ճամբարային ծրագիր։ Վերոնշեալ ճամբարնները հարիւրաւոր Վանաձորցի երեխաներու ծառայած են արդէն, իսկ այս տարուան նոր կազմակերպուած Սպիտակի ճամբարին մասնակցած են 125 պատանիներ:

Երկօրեայ նիստերու աւարտին, ժողովը ընտրեց 2018-2019 տարեշրջանի ՀՅԴ ՔԵՄ-ի Կեդրոնական Վարչութեան նոր կազմը:

Share.

Leave A Reply

This site uses Akismet to reduce spam. Learn how your comment data is processed.