ՎԵՐԱՄՈՒՏ  ԼԱԹԱՔԻՈՅ  ԱԶԳԱՅԻՆ  ՍՐԲՈՑ  ՆԱՀԱՏԱԿԱՑ ՎԱՐԺԱՐԱՆԻ

0

Սուրիոյ Կրթութեան Նախարարութեան կրթական հրամանագիրին համաձայն, Լաթաքիոյ Ազգ. Ս. Նահատակաց Վարժարանը իր դռները  բացաւ Երկուշաբթի, 3 Սեպտեմբեր 2018-ի առաւօտեան: Դպրոցական զանգին ղօղանջին հետ մեծ խանդավառութեամբ վերսկսաւ ուսումնակրթական նոր տարեշրջանը: Աշակերտութիւնը ամառնային երկար արձակուրդէ ետք, վերսկսաւ իր դպրոցական կեանքը, դպրոցի ամայացած շրջափակը խանդով ու խինդով թնդաց… աշակերտներուն ճիչն ու աղմուկը, ուրախութիւնն ու կորովը այս տարուան վերամուտին մեկնարկը յուշեցին:

Վերամուտին արշալոյսը իր հետ բերաւ Աստուծոյ օրհնութիւնը, զանգի քաղցրահնչիւն ղօղանջը ներթափանցեց աշակերտներուն ներաշխարհը եւ ահա Ս. Ներսէս Շնորհալի հայրապետին «Առաւօտ լուսոյ» շարականը անոնց շրթներէն դէպի երկինք բարձրացաւ: Վերամուտը աշակերտներուն հետ դիմաւորելու եկած էին նաեւ վարժարանի տնօրէնուհին՝ տիկ. Հուրի Գարամարտեանը, վարժարանի հոգաբարձութեան ատենապետուհին՝ տիկ. Սիրան Ամպարճեանը: Տնօրէնուհին քաղցր ժպիտով ողջունեց աշակերտութիւնը եւ բոլորին մաղթեց բարի եւ յաջող ուսումնական երթ, ապա հրաւիրեց Արժ. Տ. Եզնիկ Քհնյ. Զղջանեանը, որ իր սրտին խօսքը արտասանէ:

Արժանապատիւ Տէր Եզնիկ Թեմիս Բարեջան Առաջնորդ Գերշ. Տ. Շահան Ս. Արք. Սարգիսեանի հայրական օրհնութիւնները փոխանցեց վարժարանի տնօրէնութեան, հոգաբարձութեան եւ ուսուցչական կազմին, ապա նաեւ Առաջնորդ Սրբազան Հօր յաջողութեան մաղթանքները՝վարժարանի ծաղկումին նպաստող բոլոր այն նուիրեալներուն, որոնք իրենց մասնկացութիւնը կը բերեն հայեցի դաստիարակութեան նուիրական գործին:

Տէր Հայրը «Պահպանիչ» աղօթքը արտասանելէ ետք մաղթեց, որ 2018-2019 ուսումնական տարեշրջանը ըլլայ արդիւնաբեր եւ յաջողութիւններով լի տարի մը:

Այս առիթով, հոգաբարձութիւնն ու տնօրէնութիւնը պարգեւատրեցին ուսուցչուհի Մոնի Ապտօն, որ սիրայօժար եօթերորդ եւ ութերորդ կարգերու ֆրանսերէնի արտադպրոցական ձեռնարկին  յայտագիրը պատրաստեց: Պարգեւատրուեցաւ նաեւ վեցերորդ կարգի աշակերտ Նարեկ Տէրմէնճեանը՝ Սուրիոյ պիոնէրական շարժման՝ «Թալաէհ»ի փինկ փոնկի մրցումներուն Սուրիոյ մակարդակով առաջին հանդիսանալուն համար:

Այնուհետեւ աշակերտները կարգ առ կարգ բարձրացան իրենց դասարանները:

Share.

Leave A Reply

This site uses Akismet to reduce spam. Learn how your comment data is processed.