ՆԱԽԱՐԱՐ ԿԻՏԱՆԵԱՆ ԱՅՑԵԼԵՑ ԴԱՄԱՍԿՈՍԻ ՀԱՅՈՑ ԹԵՄԻ ԱԶԳԱՅԻՆ ԱՌԱՋՆՈՐԴԱՐԱՆ

0

«Ազդակ».- Լիբանանի զբօսաշրջութեան նախարար Աւետիս Կիտանեան 6 Սեպտեմբերին այցելեց Դամասկոսի Հայոց Թեմի Առաջնորդ Արմաշ Եպս. Նալպանտեանին: Ազգային առաջնորդարանին մէջ տեղի ունեցած հանդիպումին ներկայ գտնուեցան նաեւ Ազգային իշխանութեան նախագահ Աւետիս Ոսկեան եւ Ազգային իշխանութեան անդամներ, Ռամկավար Ազատական Կուսակցութեան, Սոցիալ Դեմոկրատ Հնչակեան Կուսակցութեան եւ «Աւետիս Ահարոնեան» կեդրոնի ներկայացուցիչները, ինչպէս նաեւ Սուրիոյ խորհրդարանի անդամ, Սուրիա-Հայաստան խորհրդարանական բարեկամական յանձնախումբի նախագահ, երեսփոխան Նորա Արիսեան:

Հանդիպումին ընթացքին Արմաշ սրբազան պատմական ակնարկով մը անդրադարձաւ եկեղեցւոյ եւ Դամասկոսի հայութեան:

Քննարկումներուն ընթացքին լուսարձակի տակ առնուեցան պատերազմի ընթացքին Դամասկոսի հայութեան դիմագրաւած դժուարութիւնները, Սուրիոյ վերակառուցման հարցը, դպրոցներուն դիմագրաւած խնդիրները եւ շարք մը այլ հարցեր, որոնք կապուած են Սուրիոյ ներկայ իրավիճակին:

Նախարար Կիտանեան նկատել տուաւ, որ սուրիացի պետական անձնաւորութիւններուն հետ իր ունեցած հանդիպումներուն ընթացքին ուշագրաւ եղած է այն, որ անոնք գովասանքով անդրադարձած են սուրիահայութեան եւ անոր ունեցած դերակատարութեան:

Ա. Կիտանեան հաստատեց, որ ինք մեծապէս կ՛արժեւորէ Դամասկոսի հայութեան ներկայ իրավիճակը: Ան հաստատեց, որ Սուրիոյ վերաշինութեան եւ վերականգնումի փուլին ընթացքին Լիբանան անպայման իր տեղն ու դերակատարութիւնը պիտի ունենայ:

Իր կարգին, երեսփոխան Արիսեան շեշտեց, որ իրենց համար ուրախալի եւ հպարտութիւն ներշնչող առիթ է նախարար Աւետիս Կիտանեանը ընդունիլ Դամասկոսի Ազգային առաջնորդարանին մէջ: Ան նշեց նաեւ, որ սուրիացի պետական այրերն ու կառավարութիւնը միշտ հպարտանքով եւ ակնածանքով կ՛անդրադառնան նախարար Կիտանեանին եւ Լիբանանի կառավարութեան մէջ անոր աշխատանքներուն:

Share.

Leave A Reply

This site uses Akismet to reduce spam. Learn how your comment data is processed.