ՀԱՅ ԴԱՏԸ ԱՏՐՊԷՅՃԱՆԻ ՄՕՏ ԱՄՆ-Ի ՆՈՐ ԴԵՍՊԱՆԻՆ ԴԻՐՔԵՐՈՒՆ ՅՍՏԱԿԱՑՈՒՄԸ ԿԸ ՊԱՀԱՆՋԷ

0

«Ասպարէզ».- Ամերիկայի Հայ Դատի Յանձնախումբը, ինչպէս նաեւ Հայաստանի բարեկամներ եւ մարդկային իրաւանց պաշտօնատարներ կոչ կ՛ուղղեն Միացեալ Նահանգներու Ծերակոյտի անդամներուն, որ Ատրպէյճանի մօտ Միացեալ Նահանգներու դեսպանի թեկնածու Ըրլ Լիցընպըրկըրի նշանակումը վաւերացնելէ առաջ՝ յստակացնեն անոր դիրքորոշումները Թուրքիոյ, Ատրպէյճանի, Արցախի եւ Հայաստանի առնչուող հարցերուն ուղղութեամբ։

Միացեալ Նահանգներու նախագահ Տանըլտ Թրամփ այս շաբաթ Ատրպէյճանի մօտ դեսպան նշանակած էր Լիցընպըրկըրը, որ Արտաքին Գործոց Նախարարութեան մէջ երկար տարիներու դիւանագէտ մըն է եւ ցարդ աշխատած է Աֆղանիստանի, Սերպիոյ եւ Խրխզիստանի մէջ, իսկ ներկայիս կը զբաղեցնէ նախարարութեան ռազմաքաղաքական հարցերով գրասենեակի աւագ խորհրդականի պաշտօնը:

Յիշեցնենք, որ նախագահ Պարաք Օպամային կողմէ Ատրպէյճանի մօտ դեսպան նշանակուած Մեթիու Պրայզայի նշանակումը երկու առիթներով կասեցուած էր՝ Թուրքիոյ եւ Ատրպէյճանի ի նպաստ անոր բացայայտ կողմնորոշումներուն պատճառով։ Ան հետագային զարտուղի միջոցներով դեսպան նշանակուած էր, որուն իբրեւ հետեւանք՝ միայն մէկ տարի միայն մնացած էր այդ պաշտօնին վրայ։

Ամերիկայի Հայ Դատի Յանձնախումբը այս նպատակով տեղեկատուական կայքէջ մը պատրաստած է եւ կոչ կ՛ուղղէ ամերիկահայութեան, որ իր ծերակուտականներուն դիմելով՝ պահանջէ, որ անոնք, իրենց կարգին, պարզաբանումներ պահանջեն դեսպանի նոր թեկնածուին դիրքորշումներուն մասին։

Այս արշաւին գործնականապէս մասնակցելու համար, այցելել www.anca.org/azerbaijan կայքէջը։

Share.

Leave A Reply

This site uses Akismet to reduce spam. Learn how your comment data is processed.