ՍՈՒՐԻՈՅ ՎԱՐՉԱՊԵՏԸ ԴԱՄԱՍԿՈՍԻ ՄԻՋԱԶԳԱՅԻՆ ՑՈՒՑԱՀԱՆԴԷՍԻ ԲԱՑՈՒՄԻՆ ՀԱՅԱՍՏԱՆԻ ՏԱՂԱՒԱՐ ԱՅՑԵԼԱԾ Է

0

Դամասկոսի 60-րդ միջազգային ցուցահանդէսի բացումին՝ Սուրիոյ վարչապետ Իմատ Խամիս այցելած է Հայաստանի տաղաւար։ Վարչապետը ընդունած է Սուրիոյ մէջ Հայաստանի դեսպան Արշակ Փօլատեանը։

Վկայակոչելով «Պիզնես Արմէնիա»-ի հանրային կապերու խումբը՝ Armenpress.am-ը կը հաղորդէ, թէ Սեպտեմբեր 6-15 Հայաստանը միասնական տաղաւարով կը մասնակցի Դամասկոսի 60-րդ միջազգային ցուցահանդէսին։ Հայկական տաղաւարին մէջ ներկայացուած են մեքենաշինութեան, շինանիւթերու արտադրութեան, դեղագործութեան, սննդարդիւնաբերութեան ոլորտներու 33 ընկերութիւններու արտադրանքի նմուշներ ու գրացուցակներ։

Սուրիոյ վարչապետ Իմատ Խամիս ողջունած է բարեկամ Հայաստանի մասնակցութիւնը՝ յոյս յայտնելով, որ ցուցահանդէսը նոր խթան պիտի ըլլայ հայ-սուրիական առեւտրատնտեսական համագործակցութեան խորացման համար։ Դեսպան Արշակ Փօլատեան դիտել տուած է, որ մեր երկրի արտադրողները պատրաստ են առաւելագոյն ջանքեր գործադրել փոխշահաւէտ համագործակցութեան համար։

Հայաստանը պարգեւատրուած է մասնակցութեան համար։ Պարգեւը դեսպան Արշակ Փօլատեանին յանձնած է Սուրիոյ տնտեսութեան նախարար Մուհամմէտ Սամէր ալ Խալիլ։

Հայկական տաղաւարը գրաւած է բաշխողներու եւ խոշոր գնորդ-այցելուներու ուշադրութիւնը, որոնք յատկապէս հետաքրքրուած են սննդամթերքով, շինանիւթերով, վերականգնուող ուժանիւթի բնագաւառին մէջ հայաստանեան ընկերութիւններու առաջարկներով։ Նկատի առնելով ուժանիւթի արեւային համակարգերուն նկատմամբ մեծ հետաքրքութիւնը, 12 Սեպտեմբերին, հայկական տաղաւարին մէջ տեղի պիտի ունենայ շնորհանդէս, որուն ընթացքին «Շտիգէն» ընկերութեան տնօրէն Հայկ Շէկեան պիտի ներկայացնէ արտադրանքը, հզօրութիւնները, մրցունակութիւնը, արտահանման ներուժը։

Դամասկոսի 60-րդ միջազգային ցուցահանդէսին կը մասնակցի 1700 ընկերութիւն՝ 48 երկրէ։

Share.

Leave A Reply

This site uses Akismet to reduce spam. Learn how your comment data is processed.