ԹԵՀՐԱՆԻ ԵՌԱԿՈՂՄ ՎԵՀԱԺՈՂՈՎԻ ՄԻԱՑԵԱԼ ՀԱՂՈՐԴԱԳՐՈՒԹԻՒՆ. « ՊԱՀՊԱՆԵԼ ՍՈՒՐԻՈՅ ՏԱՐԱԾՔԱՅԻՆ ԱՄԲՈՂՋԱԿԱՆՈՒԹԻՒՆԸ ԵՒ ՊԱՅՔԱՐԻԼ ԱՀԱԲԵԿՉՈՒԹԵԱՆ ԴԷՄ»

0

Թեհրան, ՍԱՆԱ.- Իրանի նախագահ Հասան Ռուհանի, Ռուսիոյ նախագահ Վլատիմիր Փութին եւ Թուրքիոյ նախագահ Ռեճէպ Թայիպ Էրտողան 7 Սեպտեմբերին Թեհրանի մէջ գումարուած եռակողմ Վեհաժողովի աւարտին հանդէս եկան միացեալ հաղորդագրութեամբ մը, ուր յայտարարեցին, որ հաւատարիմ կը մնան Սուրիոյ տարածքային ամբողջականութիւնը, անոր գերիշխանութիւնը եւ անկախութիւնը պահպանելու եւ ՄԱԿ-ի կանոնադրութեան սկզբունքներն ու նպատակները յարգելու որոշումին՝ աւելցնելով որ այլ երկիրներ եւս պէտք է յարգեն զանոնք:

Անոնք շեշտեցին նաեւ որ վճռակամ են վերջ տալու ՏԱՀԵՇ-ին եւ «Ճապհաթ ալ Նուսրա»ին, ինչպէս նաեւ Իտլիպի կացութեան լուծումը որոնելու: Երեք նախագահներու Թեհրանի մէջ գումարած վեհաժողովէն բխած հաղորդագրութեան մէջ յիշուեցաւ, որ Իտլիպ գտնուող ահաբեկիչները աշխատանք կը տանին ականահարելու Սուրիոյ անվտանգութիւնը, այնուհետեւ կոչ ուղղուեցաւ անոնց` իրենց զէնքերը վար դնելու՝ փրկելու տեղւոյն քաղաքայինները: Հաղորդագրութեան մէջ ըսուեցաւ նաեւ, թէ Միացեալ Նահանգներ քիմիական զէնքի գործածութեան յանցանքով Սուրիան կ՛ամբաստանէ՝ անոր դէմ յարձակում գործելու եւ անոր ներքին հարցերուն միջամտելու միտումով: Հաղորդագրութիւնը մերժեց Սուրիոյ մէջ որեւէ արտաքին միջամտութիւն եւ կոչ ուղղեց` աճապարելու սուրիական իշխանութեան եւ ընդդիմութեան մասնակցութեամբ սահմանադրական յանձնախումբի կազմութեան:

Հաղորդագրութեան մէջ յիշուեցաւ, որ յաջորդ վեհաժողովը պիտի գումարուի Ռուսիոյ մէջ:

Share.

Leave A Reply

This site uses Akismet to reduce spam. Learn how your comment data is processed.