ՄԵՐ ՆՊԱՏԱԿՆ Է` ԵՐԵՒԱՆԸ ԴԱՐՁՆԵԼ ՀԱՄԱՀԱՅԿԱԿԱՆ ՄԱՅՐԱՔԱՂԱՔ. ՀՅԴ-ԱԿԱՆՆԵՐԸ ԱՋԱՓՆԵԱԿ ԷԻՆ

0

Երեւան, «Երկիր».- Երեւանի աւագանիի ընտրութիւններու քարոզարշաւի շրջագիծէն ներս, 11 Սեպտեմբերին ՀՅԴ թեկնածուները հանդիպած են Երեւանի Աջափնեակ վարչական շրջանի բնակիչներուն հետ, ներկայացուցած իրենց ծրագիրը:

ՀՅԴ-ի կողմէ առաջադրուած քաղաքապետի թեկնածու Միքայէլ Մանուկեան «Երկիր»ի հետ զրոյցի մը ընթացքին յայտնեց, որ իրենց նպատակն է Երեւանը դարձնել համահայկական մայրաքաղաք: «Մենք կը պատկերացնենք, թէ ինչպէ՛ս պէտք է այդ մէկը ընենք: Մենք կրնանք հաւաքել մեր ուժերը սահմանամերձ բնակավայրերու համար, կրնանք ատիկա ընել նաեւ Երեւանի համար», ըսաւ ան:

Մանուկեանի խօսքով՝ Սփիւռքի մէջ ՀՅԴ կառոյցները գործընկերային յարաբերութիւններ ունին իրենց շրջանի քաղաքապետներուն, աւագանիներուն հետ: «Ունինք աղբիւր թէ՛ փորձի փոխանակում եւ թէ ֆինանսական աջակցութիւն ստանալու: Մենք կրնանք իսկապէս համայն հայութիւնը կապել Երեւանին, Երեւանի հոգերով զբաղելու առիթ պէտք է ունենայ համայն հայութիւնը», յայտնեց ան:

Մանուկեան ըսաւ, որ քարոզարշաւի ընթացքին Երեւան պիտի ժամանեն արտասահամանի տարբեր քաղաքներէն ժամանած դաշնակցական  քաղաքապետներ:

ՀՅԴ ցուցակով աւագանիի անդամ Խաչատուր Ստեփանեան դիմելով բնակիչներուն՝ յայտնեց, որ իրենք կը փափաքին Երեւանի մէջ հաստատել աւելի լաւ կառավարման եղանակ: «Մեր խումբով կը խոստանանք, որ մեր առաջադրած սկզբունքներով պիտի փորձենք Երեւանը դարձնել աւելի բարեկարգ, աւելի գեղեցիկ, աւելի անվտանգ, աւելի  գրաւիչ քաղաք՝ ոչ միայն երեւանցիներուն, այլեւ Երեւան այցելող հիւրերուն համար», շեշտեց ան:

Ստեփանեան նոյնպէս յայտնեց, որ կ’առաջարկեն Երեւանը համահայկական մայրաքաղաք հռչակելու սկզբունքը եւ որ իրենց աշխարհասփիւռ կառոյցին շնորհիւ պիտի առաջարկեն, որ Երեւանը ունենայ այն բոլոր պայմանները, որոնք յարիր են քաղաքակիրթ մայրաքաղաքներուն: «Մեր երիտասարդ, մասնագէտ խումբը ի զօրու է ձեր վստահութեան քուէն ստանալէ ետք իրագործելու իր բոլոր ծրագիրները: Կոչ կ’ուղղենք անպայման մասնակցելու աւագանիի ընտրութիւններուն եւ քուէարկելու խղճի մտքով», եզրափակեց ան:

Այնուհետեւ ՀՅԴ-ականները զրուցեցին քաղաքացիներուն հետ, ծանօթացան համայնքի հարցերուն:

Share.

Leave A Reply

This site uses Akismet to reduce spam. Learn how your comment data is processed.