ԱՐՄԷՆ ՌՈՒՍՏԱՄԵԱՆ. «ԿԱՍԿԱԾԸ ԼԱՒ ՎԱՀԱՆ Է, ԲԱՅՑ ՎԱՏ ՍՈՒՐ»

0

10 Սեպտեմբերին Հայաստանի Հանրապետութեան վարչապետ Նիկոլ Փաշինեան յայտարարած էր, որ ուժեր կան, որոնք կը ձեւացնեն, թէ յեղափոխութեան առաջամարտիկներ են, բայց խորհրդարանէն ներս եւ ճաշարաններուն մէջ բանակցութիւններու մէջ են ՀՀԿ-ի հետ, որպէսզի աջակցին քաղաքապետի ընտրութիւններուն մէջ իրենց ընտրակեղծարար մեքանիզմներով, եւ աջակցին, որ ԱԺ արտահերթ ընտրութիւններ տեղի չունենան: 11 Սեպտեմբերին լրագրողներուն հետ զրոյցի մը ընթացքին «Առաւօտ»ի թղթակիցը ՀՅԴ խմբակցութեան ղեկավար Արմէն Ռուստամեանին հարցուց՝ ըստ ձեզի որո՞ւ նկատի ունէր Նիկոլ Փաշինեան եւ արդեօք դուք այսպիսի բանակցութիւններու մէ՞ջ էք ՀՀԿ-ականներու հետ: Ռուստամեան պատասխանեց. «Նախ, պէտք է դուրս գանք ի վերջոյ այս խորհրդաւորութեան դաշտէն, կասկածի մթնոլորտէն: Եթէ բան մը կայ ըսելու՝ ըսէք ճշգրիտ անուններով, ես չեմ որ պիտի մեկնաբանեմ պարոն Փաշինեանի ըսածը կամ իր միտքերը»:

Ռուստամեան ըսաւ, որ իր տպաւորութեամբ ատիկա քարոզչական հնարք էր, որ հասարակութեան ուշադրութիւնը շեղի «Քաղաքացիական Պայմանագրութիւն»ի թեկնածուին անյաջող մեկնարկէն:

Ըստ Ռուստամեանի, այն յայտարարութիւնները, զորս կատարեց Հայկ Մարութեան՝ սեւ ու ճերմակի բաժանումը, մեր դէմ խաղ չկայ եւ այլն, քննադատուեցաւ եւ Փաշինեանն կ’ուզէր ինչ որ բեկում մտցնել այդ անյաջող մեկնարկէն վերջ. «Ի վերջոյ հարցը անոր մասին է, որ ոչ թէ մենք քաղաքապետ կ’ընտրենք, աւագանի կ’ընտրենք, այլ այս քուէարկութիւնը աւելի շատ խորհրդարանի լուծարման քուէարկութիւն է: Մենք հարցը այդ դաշտ չէինք տեղափոխեր»:

Ռուստամեան ըսաւ, որ շատոնց յայտնած են իրենց տեսակէտը՝ պատրաստ են երթալ ԱԺ արտահերթ ընտրութիւններու եւ որեւէ խոչընդոտ չեն տեսներ. «Այդ մէկը պատրաստ ենք կատարելու յստակ ճանապարհային քարտէզով, որպէսզի կրկին կիրքեր չբորբոքին եւ ընտրութիւնը կատարուի իսկական համախոհութեամբ»:

Երբ թղթակիցը հարցուց, թէ յամենայնդէպս, ճաշարաններուն մէջ, ինչպէս պարոն Փաշինեանը կ’ըսէ, հանդիպումներ ՀՀԿ-ականներու հետ կ’ունենա՞ք՝ Ռուստամեան պատասխանեց. «Նախ պէտք է հասկնալ, թէ ուրկէ հասած է պարոն վարչապետին այդ տեղեկութիւնը, տեսա՞ծ են, խօսակցութիւն արձանագրա՞ծ են, ձայնագրա՞ծ են՝ թող հրապարակեն, մենք ալ գիտնանք: Եթէ տեսաձայնագրուած է խօսակցութիւնը, այդ ալ հարց է… ատիկա կը տեղափոխուի այլ մտահոգիչ ոլորտ: Թող հրապարակեն ու ըսեն, մենք ոչ մէկ ձեւով կապուած ենք այս հարցերուն հետ: Կասկածը լաւ վահան է, բայց վատ սուր, կասկածով կարելի է պաշտպանուիլ, բայց կարելի չէ յարձակիլ»:

Պպատասխանելով այն հարցումին, թէ դուք կը բացառէ՞ք, որ վարչապետը ՀՅԴ-ն նկատի ունի, Արմէն Ռուստամեան ըսաւ. «Միանշանա՛կ, ասոր մէջ տրամաբանութիւն չկայ»:

Ըստ Ռուստամեանի, կը պարզուի, որ ՀՀԿ-ի ընտրակեղծիքներու ներուժը տակաւին կը պահպանուի. «Ընտրական ուրուական պէտք չէ սարքել, ակնյայտ է չէ՞, որ կարելի չէ համատարած ընտրակեղծիքներ կատարել երկրին մէջ, ուր ամբողջական իշխանութիւն չունիս: Ստուերային պայմանաւորուածութեան երթաս ինչի՞ համար ուրեմն, կեղծի՞ք տարածելու: Եթէ ճիշդ ընկալենք այս յայտարարութիւնը, սա յայտարարութիւն կը նկատենք յանցագործութեան մը: Սա ամենալաւ ու ցայտուն օրինակն է սահմանադրական կարգի տապալումին, եկէք բացատրէք ո՞վ են այդ մարդիկ, որոնք կ’ուզեն սահմանադրական կարգը տապալել՝ ընտրութիւնները կեղծելով: Կարելի չէ յայտարարութիւն ընել ու այդպէս մնայ: Այդ յայտարարութեան պէտք է հետեւին քայլեր, պէտք է շատ յստակ ըսէ՝ որո՞նք են այդ դաւադիրները, ապացուցէ ու վերջացնե՛նք հարցը, թէ ոչ այսպէս մենք ո՞ւր կ’երթանք»:

Ռուստամեան ըսաւ. «Այսօր մեզի ոչ մէկուն աջակցութիւնը պէտք է, մենք մեր ընտրազանգուածը ունինք, մեզի պէտք է երեւանցիներուն աջակցութիւնը: Իսկ այնպիսի աջակցութիւն, որուն մասին կը խօսուի, մեզի բացարձակ պէտք չէ»:

«ԱՌԱՒՕՏ»

Share.

Leave A Reply

This site uses Akismet to reduce spam. Learn how your comment data is processed.