ՔԱՂԱՔԱԿԱՆ ԱՊԱՍՏԱՆ ԴԻՒՐՈՒԹԵԱՄԲ ՉԻ ՏՐՈՒԻՐ ՈԵՒԷ ՔԱՂԱՔԱԿԱՆ ԳՈՐԾԻՉԻ

0

Ազգային ժողովին մէջ ՀՅԴ խմբակցութեան ղեկավար Արմէն Ռուստամեան, անդրադառնալով Ռուսիոյ տարածքին պաշտպանութեան նախկին նախարար, «Մարտի 1»-ի գործով մեղադրեալ Միքայէլ Յարութիւնեանի նկատմամբ հետախուզման չեղեալ յայտարարուելուն, դիտել տուած է, որ քաղաքական ապաստան դիւրութեամբ չի տրուիր քաղաքական գործիչի համար, եւ պաշտպանութեան նախկին նախարար Միքայէլ Յարութիւնեանի դէպքն ալ այդ պարունակին մէջ կը դիտարկուի:

«Մարդոց քաղաքական ապաստան կու տան միայն այն պարագային, երբ նկատուի, որ մարդու իրաւունքներու խախտումներ կրնան տեղի ունենալ, եթէ ինք վերադարձուի տուեալ երկրին», շեշտած է Արմէն Ռուստամեան:

Ըստ անոր, եթէ քաղաքական ապաստան տրուի, ապա կը նշանակէ, թէ Ռուսիոյ մէջ այն կարծիքը ունին, թէ արդարացի չէ անոր նկատմամբ քրէական հետապնդումը:

Անդրադառնալով Նիկոլ Փաշինեան-Վլատիմիր Փութին հանդիպման` Արմէն Ռուստամեան ըսած է, թէ հանդիպման մասին տեղեկութիւն-տպաւորութիւններ ունի պաշտօնական Երեւանէն հնչած յայտարարութիւններէն, Նիկոլ Փաշինեանի Դիմատետրի գրառումէն, թէ Ռուսիա-Հայաստան յարաբերութիւններուն մէջ ամէն ինչ լաւ է, խնդիրներ չկան:

«Մեր յարաբերութիւնները այնքան կարեւոր են ու նշանակալի, որ մնացած բոլոր հարցերը երկրորդական պէտք է նկատուին անոնց համեմատութեամբ: Կը կարծեմ, թէ այդ տրամաբանութիւնը տիրական եղած է հանդիպման ժամանակ», շեշտած է ան:

Պատգամաւորը համաձայն չէ գտնուած այն լրագրողներուն հետ, որոնց համաձայն, Ռուսիոյ հետ յարաբերութիւններուն լաւ ըլլալը պէտք է պայմանաւորուի նաեւ Ռուսիոյ կողմէ Ազրպէյճանին զէնքի մատակարարման դադրեցումով: Ըստ անոր, այդպիսի ուղի շատ կտրուկ է:

Արմէն Ռուստամեան յոյս յայտնած է, որ Սուրիոյ մէջ մարդասիրական միացեալ ծրագիրը դրական պիտի ազդէ Հայաստան-Ռուսիա յարաբերութիւններուն վրայ:

Share.

Leave A Reply

This site uses Akismet to reduce spam. Learn how your comment data is processed.