ԿԸ ՆԱԽԱՏԵՍՈՒԻ ՍՓԻՒՌՔԻ ՆԱԽԱՐԱՐՈՒԹԵԱՆ ԱՋԱԿՑՈՒԹԵԱՄԲ «ԱԶԳԻ ՊԱՐԾԱՆՔՆԵՐ» ԱՆՈՒԱՆՈՒՄՈՎ ՄՐՑԱՆԱԿԱԲԱՇԽՈՒԹԻՒՆ ԿԱԶՄԱԿԵՐՊԵԼ

0

«Հայերն Այսօր».- 10 Սեպտեմբերին սփիւռքի նախարար Մխիթար Հայրապետեան հանդիպեցաւ «Արմէնիա Փրոտաքշն» արտադրողական կեդրոնի հիմնադիր եւ գլխաւոր արտադրող Վալերի Սահարեանի հետ:

Սահարեան ներկայացնելով իր գործունէութիւնը` յայտնեց, որ նոր շունչ կը զգացուի Հայաստանի մէջ, կը ստեղծուին իսկական արժէքներ, եւ այս ամէնը նոր  բանի մը մասին մտածելու, նոր նախաձեռնութիւններով հանդէս գալու ազդակներ են:

Վալերի Սահարեան նախարարին տեղեկացուց, որ կը նախատեսուի նոր ձեւաչափով մրցանակաբաշխութիւն կազմակերպել, որ պիտի կրէ «Ազգի պարծանքներ» անուանումը, ամէն տարի պիտի իրականացուի հայկական խոշոր համայնքներ ունեցող երկիրներէն մէկուն մէջ եւ  պիտի բացայայտէ ու ծանօթացնէ տաղանդաւոր հայերը: Անոնք կրնան ներկայացնել տարբեր բնագաւառներ` մշակոյթ, բժշկութիւն, գործարարութիւն եւ այլն: Որպէս օրինակ` Վալերի Սահարեան ներկայացուց ամերիկահայ սրտաբան Հրայր Յովակիմեանը, որ բազմաթիւ անձերու կեանքը  փրկած է եւ իսկական հերոս է: Մխիթար Հայրապետեան, բաժնելով Վալերի Սահարեանի մտքերը, ըսաւ, որ Հրայր Յովակիմեանի օրինակը իրօք շատ ոգեւորիչ է եւ անոր մասին ֆիլմ նկարահանելու առաջարկ ներկայացուց:

«Յեղափոխութենէն յետոյ այսպիսի մրցանակաբաշխութիւն իրականացնելու գաղափարը ծնաւ», ըսաւ յայտնի արտադրողը եւ աւելցուց, որ ծրագիր կայ զայն իրագործել Սփիւռքի նախարարութեան հետ միատեղ: «Մրցանակակիրներու ընտրութեան հարցով   մեզի անհրաժեշտ է  նախարարութեան աջակցութիւնը», ըսաւ հիւրը:

Նախարար Մխիթար Հայրապետեան համագործակցութեան իր պատրաստակամութիւնը յայտնեց:

 

 

Share.

Leave A Reply

This site uses Akismet to reduce spam. Learn how your comment data is processed.