ՄՈՒԱԼԼԷՄ. «ԱՄՆ ՔԻՄԻԱԿԱՆ ԶԷՆՔԵՐՈՒ ԲԵՄԱԳՐՈՒԹԻՒՆԸ Կ՛ՕԳՏԱԳՈՐԾԷ ՍՈՒՐԻՈՅ ԴԷՄ ԻՐ ՈՏՆՁԳՈՒԹԻՒՆՆԵՐԸ ԱՐԴԱՐԱՑՆԵԼՈՒ ՀԱՄԱՐ»

0

Երեքշաբթի, 11 Սեպտեմբեր 2018-ին, Սուրիոյ արտաքին գործոց նախարար Ուալիտ ալ Մուալլէմ յայտնեց, որ ԱՄՆ քիմիական զէնքերու բեմագրութիւնը կ՛օգտագործէ Սուրիոյ դէմ իր ոտնձգութիւնները արդարացնելու համար:

Մուալլէմ ռուսական «Միջազգային Կեանք» թերթին հետ ունեցած հարցազրոյցին ընաթցքին ըսաւ. «Սա առաջին անգամը չէ, որ Սուրիա ամերիկեան կողմին յարձակումին կ՛ենթարկուի եւ առաջին անգամը չէ որ քիմիական զէնքեր կ՛օգտագործուին իրենց կողմէ՝ Սուրիան ամբաստանելու համար»: Ապա վերահաստատեց որ Սուրիոյ մօտ քիմիական զէնքեր գոյութիւն չունին:

Անդրադառնալով սուրիական տագնապի լուծման, Մուալլէմ ըսաւ որ տագնապի քաղաքական լուծման գործընթացը հեզասահ կ՛ընթանայ, եթէ Սուրիոյ ներքին հարցերուն արտաքին միջամտութիւնները, ինչպէս նաեւ ընդդիմադիր տարրին ուղղուած արտաքին ցուցմունքները դադրին՝ շեշտելով որ տագնապի լուծումը ներքին քաղաքական համախոհական մթնոլորտն մէջ կրնայ ձեւաւորուիլ միայն:

Մուալլէմ աւելցուց, որ Սուրիա ահաբեկչութեան դէմ իր պատերազմին սկիզբէն կը վստահէր բարեկամ երկիրներու՝ Ռուսիոյ եւ Իրանի, ու բնականաբար Սուրիոյ վերականգնումի աշխատանքներուն մաս պիտի կազմեն ա՛յս երկիրները, որոնց կողքին նաեւ բարեկամ այլ երկիրներ, ինչպէս՝ Չինաստան, Հնդկաստան, Մալիզիա, Պրազիլ, Հարաւային Ափրիկէ եւ այլն:
Հարցազրոյցին աւարտին ան կոչ ուղղեց սուրիացի գաղթականներուն վերադառնալու Սուրիա եւ մաս կազմելու վերականգնումի աշխատանքներուն՝ հաւաստելով, որ կառավարութիւնը պիտի երաշխաւորէ անոնց ապահովութիւնն ու ստեղծէ բնականոն կեանքի բարենպաստ պայմաններ:

Share.

Leave A Reply

This site uses Akismet to reduce spam. Learn how your comment data is processed.