ՊԱՀԱԾՈՅ ՊՏՈՒՂՆԵՐ

0

Պտուղներուն պարունակած կենսանիւթերը շատ օգտակար են մարդուն կազմուածքին համար: Ուստի անոնք միշտ պէտք է մտնեն իր սնունդին մէջ: Բայց քանի որ ձմրան պտղատեսակները քիչ կ’ըլլան, զանոնք կարելի է փոխարինել պահածոյ պտուղներով:

Ծանօթանանք պահածոյ պտուղներու պատրաստութեան առողջապահական ձեւին:

ԴԵՂՁԻ ՊԱՀԱԾՈՅ

Ընտրել առողջ, չկտրտուած, ոչ շատ հասուն դեղձեր: Իւրաքանչիւր դեղձի մէջտեղէն լայն դանակով ճեղք մը բանալ եւ դեղձը երկուքի բաժնել, ապա երկու կէսերը հակառակ ուղղութեամբ մէկ-երկու անգամ պտտցնել՝ իրարմէ անջատելու համար, որմէ ետք կորիզը մէջէն հանել: Կեղուել եւ շարել, դեղձի փոսիկները դէպի ներս դարձնելով, ապակեայ կարասներու մէջ՝ հասնելով մինչեւ վիզը: Վրան լեցնել նախապէս պատրաստուած եւ եռացած տաք օշարակ (3 գաւաթ ջուրին 2 գաւաթ շաքար աւելցուած): Օշարակը լեցնել մինչեւ որ  դեղձերը ծածկուին եւ ջուրը հասնի կարասին բերանը: Յետոյ կափարիչը գոցել՝ լաւապէս ամրացնելով եւ տեղաւորել զայն տաք ջուրով լեցուն կաթսայի մէջ. ջուրը պէտք է կարասէն 2-3 սմ. բարձր ըլլայ: Կաթսային յատակը պէտք է փռած ըլլանք անձեռոցի կտոր մը, որպէսզի ջուրը եռացած պահուն կարասը չփշրուի կամ չճաքի:

Եթէ դեղձը կէս քիլօ է եռացնել 10  վայրկեան, իսկ եթէ 3 քիլօ է՝ 18-20 վայրկեան, ջուրին  եռալու պահէն սկսեալ: Եռալէն ետք պէտք է կարասը հանել առանց կափարիչին  դպչելու, կարասին մէջտեղէն բռնել եւ հակառակ ուղղութեամբ դարձնելով տեղադրել անձեռոցի մը վրայ ու որոշ ժամանակ այդպէս ձգել: Այսպիսով պատրաստ կ’ըլլայ մեր համեղ դեղձի պահածօն: Պէտք է նախօրօք վստահ ըլլալ, որ կափարիչը լաւ գոցուած է:

Դեղձի պահածօն կարելի է պատրաստել նաեւ կորիզով, այսինքն լման վիճակով: Այս պարագային պէտք է քանի մը վայրկեան աւելի եռացնել զայն:

Դեղձը կեղուելու դիւրին այլ ձեւ մըն ալ կարելի օտգատործել: 10 քիլօ  դեղձը կրնանք կեղուել մէկ վայրկեանուան ընթացքին: Դեղձերը տեղադրել կաթսային մէջ, աւելցնել  ջուր եւ ապուրի դգալ մը սոտա:  Ջուրը եռալէ քանի մը երկվայրկեան ետք, դեղձը  հանել կաթսայէն եւ  հոսող ջուրի տակ դնել, որպէսզի թէ՛ սոտային հետքը վերանայ, թէ՛ կեղեւը անջատուի դեղձէն:

ԾԻՐԱՆԻ  ՊԱՀԱԾՈՅ

Ծիրանի պահածօն կրնանք պատրաստել կորիզով կամ առանց կորիզի: կ’ընտրենք հաւասար մեծութեամբ ոչ շատ հասուն ծիրաններ եւ կը տեղաւորենք զանոնք ապակեայ կարասներու մէջ եւ նոյն ձեւով նախապէս եռացած օշարակը կը պարպենք անոնց վրայ: Վերոյիշեալ ձեւով կը շարունակենք պատրաստութիւնը:

ՍԱԼՈՐԻ ՊԱՀԱԾՈՅ

Սալորի պահածօն կորիզով  պէտք է պատրաստել, որպէսզի չկտրտուի:

 

ԽՆՁՈՐԻ ՊԱՀԱԾՈՅ

Խնձորի Պահածօն պատրաստելու համար  թարմ խնձորները երկուքի կը բաժնենք, անպայման կը հեռացնենք միջուկը եւ նոյն ձեւով կը շարունակենք:

Ոմանք շաքարը իր ճշդուած չափէն նուազ կը դնեն, ենթադրելով որ աւելի առողջապահական կ’ըլլայ: Այս պարագային սակայն պահածօն թթու համ կ’ունենայ եւ ժամանակի ընթացքին կը փճանայ:

 

ԴԵՂՁԻՆ ՕԳՏԱԿԱՐ ՅԱՏԿՈՒԹԻՒՆՆԵՐԸ

Դեղձը առաջին անգամ մշակուած է Չինաստանի մէջ. այսօր կը գտնենք զայն աշխարհի բոլոր անկիւնները: Չափազանց առողջարար պտուղ է եւ շատ համեղ: Դեղձը հարուստ է կենսանիւթերով եւ անդիօքսիտաններով:

-Աչքի առողջութեան ու տեսութեան համար

Դեղձի հարուստ է անդիօքսիտանով, որ պատասխանատու է աչքերու առողջութեան:

Ան նաեւ կը պարունակէ մեծ քանակով  A եւ C  կենսանիւթեր, որոնք նոյնպէս օգտակար են աչքին:  Եթէ դեղձը կանոնաւոր ձեւով ուտենք, կը բարելաւուի մեր տեսողութիւնը՝ արեան շրջանառութեան բարելաւման պատճառով:

-Մաշկի առողջութեան համար

Դեղձին պարունակած կենսանիւթերը կարեւոր  են մաշկի առողջութեան համար: A  կենսանիւթը մաշկը փափուկ կը պահէ, իսկ C կենսանիւթը կարեւոր անդիօքսիտանդ է, ան մաշկը կը պաշտպանէ վնասակար ճառագայթներէ:

Եթէ ամէն օր մէկ դեղձ ուտենք, առողջ, գեղեցիկ մաշկ կ’ունենանք: Եթէ դեղձին փարակ շերտերը դնենք մաշկին մուգ հետքերուն եւ կնճիռներուն վրայ՝ կը ձերբազատուինք անոնցմէ եւ փայլուն մաշկ կ’ունենանք:

Կը կանխարգիլէ Քաղցկեղը

Դեղձը կը կանխարգիլէ քաղցկեղի բջիջներուն զարգացումը մարմինին մէջ: Ան օգտակար է նաեւ թոքերուն եւ հաստ աղիքին:

-Կը կանոնաւորէ քոլեսթրոլի (ճարպակուտակում) բարձր մակարդակը

Եթէ դեղձը կանոնաւոր կերպով ուտենք, կը կարգաւորուի արեան Քոլեսթրոլի մակարդակը ու կը կանխարգիլուին այն հարցերը, որոնք շաքարախտի ու սրտային հիւանդութիւններու յառաջացման պատճառ կը հանդիսանան:

Դեղձին մանրաթելերը կ’օգնեն, որ հաստ աղիքի մէջ կուտակուած թոյները դուրս ելլեն, հեռանան, իսկ անոր պարունակած մեծաքանակ փոթասիոմը կը նուազեցնէ երիկամային հիւանդութեան յառաջացումը:

 

Սոնա Տէր Պօղոսեան – Տարաքճեան

 

Share.

Leave A Reply

This site uses Akismet to reduce spam. Learn how your comment data is processed.