ՄԱՐԶԱԿԱՆ՝ ՍԵՊՏԵՄԲԵՐ Բ./2018

0

ՀԱՅԿԱԿԱՆ

Նախորդ Ուրբաթ  Հայաստանի Ֆութպոլի Հաւաքականը Յաղթանակ Մը Արձանագրեց

«Իւ. Է. Էֆ. Ա.»ի նորաստեղծ «Ազգերու լիկա» մրցաշարքի մրցումներուն շրջագիծէն ներս իր կատարած առաջին հանդիպումին Դ. դասակարգի Դ. խմբակին մէջ ընդգրկուած Հայաստանի հաւաքականը յաջողեցաւ իր դաշտին վրայ  2-1 արդիւնքով յաղթել Լիխթնշթայնին: Երեւանի հանրապետական մարզադաշտին վրայ տեղի ունեցած այս մրցումին, գլխաւոր մարզիչ Վարդան Մինասեանի գլխաւորած հաւաքականը կիրարկեց  4-2-4 խաղաոճը: Մրցումի 30-րդ վայրկեանին Մարքոս Փիցելլին կատարեց կոլերուն բացումը, որմէ միայն երեք վայրկեան ետք հիւր կազմը  նշանակեց իր հաւասարութեան կոլը:Երկրորդ կիսախաղի 69-րդ վայրկեանին, Հենրիկ Մխիթարեանի կատարած տուքանային հարուածը հեռացուեցաւ բերդապահին կողմէ, որմէ մէկ վայրկեան ետք Լիվերփուլի խաղցողը անգամ մը եւս չյաջողեցաւ ցնցել նոյն դարպասը՝ գնդակը ցողին դպնալուն պատճառով: Լիխթնշթայնի մէկ մարզիկին կարմիր քարտ ստանալէն երկու վայրկեան ետք, Տիգրան Բարսեղեան նշանակեց հայրենի կազմին յաղթանակին կոլը (էսիսթը` դարձեալ Օզպիլիսի):Այս յաղթանակը Հայաստանի համար եղաւ 2018-ի առաջին յաղթանակը` երեք հաւասարութիւններէ եւ մէկ պարտութենէ ետք: Մրցումին ներկայ էր նաեւ Հայաստանի վարչապետը Նիկոլ Փաշինեան:

 

ՄԻՋԱԶԳԱՅԻՆ

Ռաֆայէլ Նատալ Պիտի  Չմասնակցի Տէվիսի Գաւաթի Կիսաեզրափակիչին

Աշխարհի թէնիսի արհեստավարժ խաղցողներու առաջին դիրքը գրաւող սպանացի  Ռաֆայէլ Նատալ յայտարարեց, որ ծունկի վնասուածքին պատճառով պիտի չմասնակցի Տէվիսի գաւաթի կիսաեզրափակիչ փուլի՝ Ֆրանսայի դէմ խաղին: Հանդիպումը տեղի պիտի ունենայ յաջորդ շաբաթ: «Չեմ կրնար մասնակցիլ Ֆրանսայի հետ խաղին: Ես առաջնահերթ մրցաշարքերու ցանկ մը կազմած էի ներառելով Տէվիսի խաղը: Այդ պատճառով ալ հրաժարած էի Ցինցինատիի մրցաշարքին մասնակցութենէ: Շատ կը ցաւիմ, որ չեմ կրնար օգնել հաւաքականին, որպէսզի ան հասնի եզրափակիչին: Լաւագոյնը կը մաղթեմ այն մարզիկներուն, որոնք պիտի ներկայացնեն Սպանիոյ  հաւաքականը», ըսաւ Նատալ իր ժողովուրդին  «Twitter»-ի իր պաշտօնական էջին միջոցով: Աւելցնենք, որ Սպանիոյ հաւաքականի կազմին մէջ  Նատալի փոխարէն հանդէս պիտի գայ Ալպերթ Ռամոսը:

Յիշեցնենք, որ վնասուածքի պատճառով Ռաֆայէլ Նատալ չկրցաւ աւարտին հասցնել US Open-ի կիսաեզրափակիչ փուլի՝ Խուան Մարտին թել Փետրոյի հետ հանդիպումը. երկու բաժին խաղալէ  ետք, 32-ամեայ  թենիսիստը հրաժարեցաւ պայքարէն:

Քոլինա. «VAR-ի Շնորհիւ Կրճատեցինք Մրցավարական Սխալներու Քանակը»

Ֆութպոլի Միջազգային Դաշնակցութեան՝  ՖԻՖԱ-ի Մրցավարական Յանձնաժողովի ղեկավար Փիեռլուիճի Քոլինա տեսակրկնութիւններու VAR համակարգին շուրջ իր կարծիքը յայտնելով ըսաւ.«Աշխարհի առաջնութեան մրցումներուն ընթացքին VAR-ի կիրառումը յաջողեցաւ: Համակարգը չազդեց խաղերու տեւողութեան վրայ: VAR-ը կը կիրառուի մրցավարներու սխալները ուղղելու համար:Պէտք է նկատել, որ առաջնութեան ընթացքին համակարգի աշխատանքը յաջողած էր, իսկ ֆութպոլիստները ընդունեցին մրցավարներու վերջնական որոշումները: VAR-ը չ’օգներ լիովին խուսափելու սխալներէ, բայց այս համակարգին շնորհիւ մենք կը կրճատենք սխալներուն քանակը»:

 

Ռաֆֆի Սիւլահեան

Share.

Leave A Reply

This site uses Akismet to reduce spam. Learn how your comment data is processed.