ՄԵԿՆԱՐԿԱԾ Է ՆԻԿՈԼ ՓԱՇԻՆԵԱՆԻ ԱՅՑԵԼՈՒԹԻՒՆԸ ՖՐԱՆՍԱ. ՎԱՐՉԱՊԵՏԸ ԾԱՂԿԵՊՍԱԿ ՏԵՂԱԴՐԱԾ Է ԿՈՄԻՏԱՍԻ ՅՈՒՇԱՐՁԱՆԻՆ ԴԻՄԱՑ ԵՒ ՀԱՆԴԻՊՈՒՄ ՈՒՆԵՑԱԾ ՀԱՅ ՀԱՄԱՅՆՔԻ ՆԵՐԿԱՅԱՑՈՒՑԻՉՆԵՐՈՒՆ ՀԵՏ

0

Հայաստանի Հանրապետութեան վարչապետ Նիկոլ Փաշինեանի գլխաւորած կառավարական պատուիրակութիւնը աշխատանքային այցելութեամբ 13 Սեպտեմբերին ժամանած է Ֆրանսայի Հանրապետութիւն:

Վարչապետը օդակայանէն ուղղուած է Փարիզի «Երեւան» պուրակ, ուր ծաղկեպսակ տեղադրած է Կոմիտասի յուշարձանին դիմաց` յարգանքի տուրք մատուցելով Հայոց Ցեղասպանութեան զոհերու յիշատակին:
Այնուհետեւ վարչապետ Փաշինեան ընթիրիքի հրաւիրուած է Ֆրանսայի հայ համայնքի ներկայացուցիչներուն կողմէ, որոնց շարքին եղած են Ֆրանսայի Ազգային ժողովի հայազգի պատգամաւորներ, քաղաքական, հասարակական գործիչներ, գործարարներ, արուեստագէտներ, յատկապէս, Լիոնի քաղաքապետ Ժորժ Քեփենէքեան, Փարիզի 9-րդ թաղամասի փոխքաղաքապետ Ալեքսի Կովչեան, Ֆրանսայի կառավարութեան նախկին անդամ Պատրիկ Տեւէճեան, Ֆրանսահայ Կազմակերպութիւններու Համակարգող Խորհուրդի համանախագահներ Արա Թորանեան և Մուրատ Փափազեան, գործարարներ` Դանիէլ Քիւրքճեան, Սերժ Չուրուք, Վարդան Սրմաքէշ, Արմէն Պետրոսեան, Ալէն Միքլի, Ֆրանսայի Թատերական Գործիչներու Միութեան նախագահ Ալէն Թէրզեան, աշխարհահռչակ ֆութպոլիսթ Իւրի Ճորկայէվ եւ այլք:
Իր խօսքին մէջ վարչապետը յայտնած է, որ այսօրուան ձեռնարկը, ֆրանսահայութեան հռչակաւոր զաւակներու ներկայացուածութիւնը կը խորհրդանշեն այն կարելիութիւնները, որոնք այսօր բացուած են Հայաստանի Հանրապետութեան առջեւ:
«Ի՞նչ տեղի ունեցած է Հայաստանի մէջ, շատ պարզ բան մը. Հայաստանի քաղաքացին եւ հայ ժողովուրդը սկսած են հաւատալ իրենք իրենց. առանցքային փոփոխութիւնը, որ տեղի ունեցած է` այս է: Կապ չունի, թէ ո՛վ իշխանութիւն է եւ ով՝ ընդդիմութիւն, Հայաստանի Հանրապետութեան մէջ իշխանութիւնը ժողովուրդն է, եւ ասոր մէջ որեւէ չափազանցութիւն չկայ: Այսօր ընդունած եմ Ֆրանսա-Հայաստան բարեկամական խումբի ներկայացուցիչները, որոնց հետ տեղի ունեցաւ հետաքրքրական զրոյց. անոնց ըսի, որ Հայաստանի Հանրապետութեան մէջ կը ձեւաւորուի կառավարման նոր համակարգ. ատիկա ճիշդ ժողովրդաիշխանութիւնն է: Քանի որ այս արտայայտութիւնը թիւրըմբռնումներու տեղիք կու տայ, անդրադառնամ, որ այս խօսքով նկատի ունիմ հետեւեալը. Հայաստանի Հանրապետութեան քաղաքացիները աւելի կարեւոր մասնակցութիւն պէտք է ունենան երկրի կառավարումին, յատկապէս հանրաքուէներու միջոցով: Կը կարծեմ, թէ Հայաստանի մէջ սկսած է նոր գործընթաց մը, որ կը տարածուի աշխարհին մէջ: Կ’ուզեմ հաւատալ, որ հայ ժողովուրդը եւ Հայաստանը ստանձնած են դերակատարութիւն մը, որ ունի համաշխարհային նշանակութիւն, եւ կը կարծեմ, որ հայ ժողովուրդը ունի ներուժ, պատմութիւն եւ հմտութիւն աշխարհի մէջ նոր համակարգերու ստեղծումի ճանապարհին իր դերակատարումը ունենալու համար:

Տեսնելով ներկաները` կ’ուզեմ հաւատալ, որ մեր պետութիւնը կ’ըլլայ ժամանակակից քաղաքականութեան ոչ թէ ետնաբեմին մէջ, այլ ղեկավարութեան իր չափաբաժինը կը ստանձնէ: Հայ ժողովուրդը ունի այդ ներուժը եւ որպէս քրիստոնէութիւնը ընդունած առաջին ժողովուրդ` ես աւելի կը հաւատամ այն գաղափարին, որ մենք ունինք շատ աւելի լուրջ եւ մեծ կարողականութիւն: Մենք մեր ուժերը պէտք է մէկտեղենք, եւ անոր արդիւնքով է, որ Հայաստանի մէջ տեղի ունեցած են քաղաքական փոփոխութիւնները, որովհետեւ թաւշեայ յեղափոխութիւնը տեղի ունեցած է ոչ միայն Հայաստանի քաղաքացիներուն, այլեւ Սփիւռքի գործուն մասնակցութեամբ: Ի՞նչ նկատի ունիմ մասնակցութիւն ըսելով. յստակ դիրքորոշում եւ տեսակէտ արտայայտելը այս հարցին մէջ ամենահզօր գործօնն էր, որ կրնար փոխել քաղաքական իրավիճակը Հայաստանի մէջ: Ինծի համար չափազանց կարեւոր է տեղի ունեցածին հոգեւոր, մշակութային եւ քաղաքական բովանդակութիւնը, որ ինչպէս որ պարզուեցաւ` պէտք է միաւորեր բոլորս: Ես կը հաւատամ, որ հայ ժողովուրդը նոր դերակատարութեան մը փուլը մտած է, եւ այդ նոր դերակատարութիւնը առաջին կարգին ազատ եւ երջանիկ հայրենիք կերտելն է: Կրնամ երաշխաւորել, որ այսօր Հայաստանի մէջ բոլոր մարդիկ առանց բացառութեան հաւասար են օրէնքին առջեւ: Երկրին մէջ որեւէ մէկէ որեւէ բանով աւելի եւ պակաս չըլլալը այն անկիւնաքարն է, որուն վրայ կը կառուցուի մեր նոր իրականութիւնը:
Կ’ուզեմ շնորհակալութիւն յայտնել այս վերաբերմունքին եւ ընդունելութեան համար։ Շատ բաներ տակաւին չեն խօսուած, բայց կ’ուզեմ հաւաստել, որ ձեր աչքերուն մէջ կարդացի այն ամէնը, ինչ որ կ’ուզէիք ըսել, յոյս ունիմ, որ իմ աչքերուն մէջ տեսաք այն ամէնը, ինչ որ կ’ուզէիք լսել: Մենք նոյն նահապետի հետնորդներն ենք, նոյն հայրենիքի զաւակներն ենք, նոյն երազանքները կրողներն ենք, նոյն յաղթանակը կերտողներն ենք եւ պէտք է ըլլանք միասին», ըսած է վարչապետը:
Միտքերու փոխանակման ընթացքին վարչապետը պատասխանած է ֆրանսահայ գործիչներու պատասխաններուն՝ Հայաստանի մէջ տեղի ունեցող փոփոխութիւններուն, ժողովրդավարութեան զարգացումին, փտածութեան դէմ պայքարին, առեւտրային միջավայրի բարելաւումին, ներդրումներու ներգրաւումին եւ այլ նիւթերու առնչուող:

Այնուհետեւ վարչապետ Նիկոլ Փաշինեան ՀՀ անկախութեան տօնին առիթով ֆութպոլիստ Իւրի Ճորկայէվը պարգեւատրած է Երախտագիտութեան մետալով: Իւրի Ճորկայէվ յայտնած է, որ իրեն համար մեծ պատիւ է արժանանալ նման պարգեւի եւ աւելցուցած, որ զայն կը կրէ պատիւով ու հպարտութեամբ: «Հպարտ եմ ըլլալու Հայաստանի ներկայացուցիչներէն մէկը», ըսած է Ճորկայէվ:

Վարչապետ Նիկոլ Փաշինեան շարունակելով աշխատանքային այցելութիւնը Ֆրանսա երկրորդ օրը սկսած է «Ֆրանսայի Ձեռնարկութիւններու Շարժում» կազմակերպութեան (MEDEF) անդամներու հետ հանդիպումով: Կազմակերպութիւնը կը միաւորէ Ֆրանսայի շուրջ 7.200 ընկերութիւններ, որոնք գործունէութիւն կը ծաւալեն տարբեր ոլորտներու մէջ եւ կ’օժանդակեն վերջիններուս դուրս գալ արտասահմանեան շուկաներ:

Կազմակերպութեան խորհուրդի նախագահ Ֆիլիփ Տելիոր, ողջունելով վարչապետը, համոզում յայտնած է, որ Նիկոլ Փաշինեանի այցելութիւնը կ’ըլլայ արդիւնաւէտ ու կը նպաստէ Հայաստանի եւ Ֆրանսայի միջեւ համագործակցութեան ընդլայնումին: Ֆիլիփ Տելիոր յայտնած է, որ նկատի առնելով երկու երկիրներու միջեւ պատմականօրէն ձեւաւորուած բարեկամական կապերու առկայութիւնը` MEDEF-ը շահագրգռուած է տնտեսական համագործակցութեան զարգացումով եւ ընդլայնումով, երկու երկիրներու գործարար շրջանակներուն միջեւ կապերու խորացումով ու պատրաստ է այդ ուղղութեամբ աշխուժ աշխատանք տանիլ:

Share.

Leave A Reply

This site uses Akismet to reduce spam. Learn how your comment data is processed.