ԵՐԵՒԱՆԻ ԱՌԵՒՏՈՒՐԻ ԿԵԴՐՈՆՆԵՐՈՒՆ ՄԷՋ ՊԷՏՔ Է ԸԼԼԱՆ ՔԱՂԱՔԱԿԻՐԹ ԱՌԵՒՏՈՒՐԻ ՊԱՅՄԱՆՆԵՐ

0

Երեւանի աւագանիի` ՀՅԴ ցուցակի թեկնածուները 13 Սեպտեմբերին այցելեցին «Փեթակ» եւ «Սուրմալու» առեւտուրի կեդրոններ՝ քաղաքացիներուն հետ զրուցելու, առեւտուրի կեդրոններուն մէջ առկայ հարցերը քննարկելու եւ իրենց նախընտրական ծրագիրը ծանօթացնելու համար:
Թեկնածուներէն Ազատուհի Սիմոնեանի խօսքով՝ ընտրած են այս առեւտուրի կեդրոնները՝ որպէս Երեւանի ամենաբանուկ առեւտրային կեդրոններ, անկախ ատկէ այստեղ կ’այցելեն անոնք, որոնք աւելի մատչելի ապրանք կը փնտռեն: «Մեծ տարածք ունեցող եւ որպէս Երեւանի հին առեւտուրի կեդրոն ընտրած ենք «Փեթակ»ն ու «Սուրմալու»ն: Բացի այդ՝ կ’ուզենք անկեղծ զրոյցի շրջանակներու մէջ հասկնալ, թէ այստեղ ինչ հարցեր կան, որ կարենանք հետագային քննարկել զանոնք եւ համապատասխան լուծումներ որոնել: Կը կարծեմ՝ առեւտուրի կեդրոններուն մէջ պէտք է ըլլան քաղաքակիրթ առեւտուրի պայմաններ: Բնականաբար, խօսքը չ’երթար խիստ ազնուական կեդրոններ ունենալու մասին, այլ միջին կարգի, առնուազն` բարեկարգ, մաքուր, յարմարաւէտ պայմաններով կեդրոններու եւ՛ վաճառողներուն, եւ՛ այցելուներուն համար», ըսաւ Սիմոնեան:
Անոր համաձայն, պէտք է տեղի ունենայ մասնաւոր եւ համայնքային իշխանութեան արդիւնաւէտ համագործակցութիւն՝ նմանաօրինակ կառոյցները վերանորոգելու համար: Սիմոնեանի համոզումով՝ անկախ այն բանէն, որ վերոնշեալ առեւտուրի կեդրոնները մասնաւոր տարածք կը համարուին, բայց, ի վերջոյ, երեւանցին կ’օգտուի անոնցմէ: «Կարելի է գտնել լուծումներ, որոնց շնորհիւ աւելի քաղաքակիրթ ձեւով հանրութեան կը ներկայանան առեւտուրի այս կեդրոնները: Ես անձամբ յաճախ այստեղէն գնումներ կը կատարեմ, քանի որ կան ապրանքներ, որոնք կրնաս միայն այստեղէն գնել: Ի դէպ, շատ մատչելի են գիները: Սակայն, իմ կարծիքով, պայմանները այնքան ալ բարւօք չեն. նախ` պէտք է արտաքին տեսքը բարելաւել, ներսի բարեկարգումով զբաղուիլ, օդափոխման համակարգի, մաքրութեան, ինքնաշարժներու կայանատեղիի հարցերը լուծել», ըսաւ Սիմոնեան:
«Փեթակ» առեւտուրի կեդրոնի վաճառականները աւագանիի ՀՅԴ-ական թեկնածուներուն հետ զրոյցի մը ընթացքին խօսեցան որոշ հարցերու մասին, սնոնք յատկապէս կ’ուզէին որ լուծուէր ջեռուցման հարցը՝ ձմրան տարածքը ցուրտ կ’ըլլայ, քանի որ ընդհանուր ջեռուցման համակարգ չի գործեր, իւրաքանչիւր տաղաւար ինք կը հոգայ իր ջեռուցման հարցը: Աշխատակիցները նաեւ անդրադարձան օգտագործելի պայմաններու անյարմարութեան մասին, մասնաւորապէս, որ զուգարանները վճարովի են նոյնիսկ իրենց համար: Իսկ որպէս առաւելութիւն` առեւտրականները յիշեցին առեւտուրի կեդրոնի տնօրինութեան ապահոված տարածքի մաքրութիւնը:

Share.

Leave A Reply

This site uses Akismet to reduce spam. Learn how your comment data is processed.