ՀԱՅ ԴԱՏԸ ՑԵՂԱՍՊԱՆՈՒԹԵԱՆ ԲԱՆԱՁԵՒԸ ՔՈՒԷԱՐԿՈՒԹԵԱՆ ԴՆԵԼՈՒ ԱՐՇԱՒԻ ԿԸ ՁԵՌՆԱՐԿԷ

0

Մինչ Անգարայի աւանդական ջատագովները եւ պաշտպանները նեղ կացութեան մատնուած են Միացեալ Նահանգներու եւ Թուրքիոյ միջեւ լարուած յարաբերութիւններուն հետեւանքով, Ամերիկայի Հայ Դատի Յանձնախումբը ձեռնարկած է ստորագրահաւաքի մը՝ կոչ ընելու համար Ներկայացուցիչներու տան խօսնակ Փօլ Ռայընին եւ մեծամասնութեան ղեկավար Քեւըն ՄըքՔարթիին, որ անյապաղ քուէարկութեան դնեն Հայոց Ցեղասպանութիւնը ճանչցող թիւ 220 բանաձեւը։

Յատկանշական է, որ Ռայըն եւ ՄըքՔարթի, ինչպէս նաեւ Ներկայացուցիչներու տան փոքրամասնութեան ղեկավար Նենսի Փելոսի եւ փոքրամասնութեան փոխղեկավար Սփենի Հոյըր իրենց քոնկրեսական ասպարէզին ընթացքին տարբեր առիթներով նեցուկ կանգնած են Հայոց Ցեղասպանութիւնը ճանչնալու ջանքերուն, իսկ ներկայիս բանաձեւին նեցուկ կանգնող աւելի քան 120 քոնկրեսականներուն մէջ կան Ներկայացուցիչներու տան բարձրաստիճան անդամներ, ինչպէս Էտ Ռոյս, Էլիըթ Էնկըլ, Տեւըն Նունիէզ եւ Էտըմ Շիֆ։

Ամերիկայի Հայ Դատի Յանձնախումբի գործադիր տնօրէն Արամ Համբարեան կը յայտնէ, որ Միացեալ Նահանգներու մօտ Թուրքիոյ դեսպանատունը եւ Անգարայի կողմէ վարձուած լոպիիստական հաստատութիւնները ոգի ի բռին կ՛աշխատին բանաձեւը քուէարկութեան դնելու ջանքերը ձախողութեան մատնելու համար, որովհետեւ շատ մտահոգ են, որ բանաձեւը կրնայ վաւերացուիլ Միացեալ Նահանգներու եւ Թուրքիոյ միջեւ լարուած յարաբերութիւններուն հետեւանքով։

Յայտնենք, որ քոնկրեսական Թետ Փօ, 13 Սեպտեմբերին ելոյթ մը ունենալով Ներկայացուցիչներու տան մէջ՝ պահանջած էր ճանչնալ Հայոց Ցեղասպանութիւնը՝ յայտարարելով. «Առաւել քան դար մը առաջ տեղի ունեցած է պատմութեան ամենասարսափելի ցեղասպանութիւններէն մէկը, երբ աշխարհի ուշադրութիւնը կեդրոնացած էր Եւրոպայի մէջ տեղի ունեցող մեծ պատերազմին վրայ:

Օսմանեան կայսրութեան իրաւայաջորդ Թուրքիոյ Հանրապետութիւնը միշտ հերքած է հայ ժողովուրդին դէմ գործած իր վայրագութիւնները: Երկար տարիներով, մեր կառավարութիւնը եւս հետեւած է Թուրքիոյ օրինակին: Մենք արտօնած ենք, որ քաղաքականութիւնը կուրցնէ մեզ՝ չտեսնելով մէկ եւ կէս միլիոն անմեղ հայերու զանգուածային սպանութիւնը:

Մենք պէտք է պաշտօնապէս ճանաչնանք այս սարսափելի ոճիրը, որպէսզի կանխենք նման իրադարձութիւններու կրկնութիւնը: Պէտք է նաեւ թուրքերուն վրայ ճնշում բանեցնենք, որպէսզի անոնք եւս ընդունին անցեալի իրենց մեղքերը:

Բռնապետ Էրդողանի իշխանութիւնը իր իսկ քաղաքացիներուն վրայ ճնշումներ կը բանեցնէ եւ այսօր մենք ականտես ենք, թէ ինչպէ՛ս այժմ Թուրքիոյ քաղաքացիներուն դէմ կը կիրառուին այն նոյն բռնութիւնները, որոնք կիրառուեցան հայերոնւ դէմ, դար մը առաջ:

Նման կեցուածք անընդունելի է ՆԱԹՕ-ի անդամ պետութեան մը կողմէ, եւ երկրի մը մէջ, որուն կառավարութիւնը ինքզինք Ամերիկայի դաշնակից կ՛անուանէ»:

 

Share.

Leave A Reply

This site uses Akismet to reduce spam. Learn how your comment data is processed.