ՀՄԸՄԻ ԼՈՍ ԱՆՃԵԼԸՍԻ ՄԱՍՆԱՃԻՒՂԸ ԿԸ ՆՇԷ ԻՐ ՀԻՄՆԱԴՐՈՒԹԵԱՆ 50ԱՄԵԱԿԸ

0

ԼՈՍ ԱՆՃԵԼԸՍ.- Շաբաթ, 8 Սեպտեմբեր 2018-ին, ՀՄԸՄ-ի Լոս Անճելըսի մասնաճիւղը «Սի.Պի.Էս. Սթիւտիոզ» (CBS Studios) կեդրոնին մէջ, պաշտօնական հանդիսութեամբ մը տօնախմբեց իր հիմնադրութեան 50-րդ տարեդարձը, ներկայութեամբ աւելի քան 500 անդամներու եւ համակիրներու։

Հանդիսութիւնը սկսաւ մասնաճիւղի սկաուտներուն դրօշակի տպաւորիչ արարողութեամբ եւ Միացեալ Նահանգներու եւ Հայաստանի քայլերգներով, կատարողութեամբ՝ Վընեսա Ալքարազ Աւագեանի:

Արեւմտեան Ամերիկայի Հայոց Թեմի Առաջնորդ Մուշեղ Արք. Մարտիրոսեան ներկայ եղաւ հանդիսութեան, կատարեց բացման աղօթքը եւ իր օրհնութեան խօսքը արտասանեց: Առաջնորդ սրբազանին կ՛ընկերանար Նարեկ Ա. Քհնյ. Փեհլիվանեան: Ներկայ էին նաեւ Ազգային Վարչութեան անդամներ:

Առաջնորդ սրբազանը յոբելինական այս հանդիսութեան առիթով իր օրհնութեան ու գնահատանքի խօսքին մէջ ողջունեց ու շնորհաւորեց ՀՄԸՄ-ի մեծ ընտանիքը ու յատկապէս Լոս Անճելըսի Մասնաճիւղի Վարչութիւնն ու անդամները՝ շեշտելով. «Իբրեւ մէկ ընտանիքի անդամներ ձեր յաջողութիւնները մեր յաջողութիւններն են, եւ այս երեկոյ մենք հպարտութեամբ մասնակից ենք ձեր ուրախութեան»։ Սրբազանը գնահատեց մասնաճիւղի նուիրեալ անդամներն ու ազնուասիրտ նուիրատուները, որոնք ՀՄԸՄ-ի նուիրական առաքելութեան սատար կը հանդիսանան: Ան յատուկ սիրով շնորհաւորեց օրուան մեծարեալը, ազգային բարերար Վարանդ Մելքոնեանը, իր անսահման նուիրաբերումին ու բարերարութեանց համար: Առաջնորդ սրբազանը իր խօսքը եզրափակեց օրհնութեամբ եւ ապագայի յաջողութիւն մաղթելով:

Բացման խօսք արտասանեց հանդիսավար Մհեր Դաւիթեան, որ ողջունեց ներկաները եւ շեշտեց ՀՄԸՄ-ի կարեւոր դերակատարութիւնը Լոս Անճելըսի եւ Սփիւռքի տարածքին:

Յանուն մասնաճիւղի վարչութեան խօսք առաւ Արի Պոյաճեան, որ յիշելով ՀՄԸՄ-ի «Բարձրացի՛ր, բարձրացո՛ւր» նշանաբանը՝ դրուատեց ՀՄԸՄ-ի Լոս Անճելըսի մասնաճիւղին միջոցով համայնքի հազարաւոր սկաուտներուն, մարզիկներուն եւ համայնքային ղեկավարներուն նեդրումները։

Այս առիթով, Միացեալ Նահանգներու Քոնկրէսի շէնքին վրայ ծածանած ամերիկեան դրօշակ մը յանձնուեցաւ ՀՄԸՄ-ի Լոս Անճելըսի Մասնաճիւղի ատենապետ Օննիկ Պէրպէրեանին, ձեռամբ հաւաքին ներկայ քոնկրէսական Էտըմ Շիֆի։

Երեկոյին ընթացքին մասնաճիւղին հարուստ գործունէութենէն յուշեր փոխանակեցին անոր անդամները, իսկ ՀՄԸՄ-ի Արեւմտեան Ամերիկայի Շրջանային Վարչութեան անդամ Արամ Երեմեան խօսեցաւ ՀՄԸՄ-ականներու միջեւ ստեղծուած ընկրային սերտ կապերուն կարեւորութեան մասին։

Գնահատագիրներ յանձնուեցան Արամ Երեմեանի կողմէ՝ յանուն Շրջանային վարչութեան։

ՀՄԸՄ-ի Կլենտէյլի «Արարատ» Մասնաճիւղը այս առիթով յուշատախտակ մը յանձնեց մասնաճիւղին:

Մեծարանքի արժանացաւ միութեան երկարամեայ անդամ եւ բարերար Վարանդ Մելքոնեան, մասնաճիւղի վարչութեան կողմէ ստանալով «Տիպար ՀՄԸՄական»ի պատիւը: Մրցանակը յանձնուեցաւ 50ամեակի յանձնախումբի ատենապետ Սթիւ Արթինեանի ձեռամբ։

Վարանդ Մելքոնեան 1980-ականներուն եղած է ՀՄԸՄ-ի Լոս Անճելըսի մասնաճիւղի ընկերային յանձնախումբի անդամ, որմէ ետք եղած է նաեւ մասնաճիւղի վարչութեան անդամ։

Քոնկրեսական Էտըմ Շիֆ եւս գնահատագիր մը յանձնեց մեծարեալ Վարանդ Մելքոնեանին։

Մելքոնեան շնորհակալութիւն յայտնեց այս պատիւին համար, եւ երախտագիտութիւն՝ Աստուծոյ պարգեւած բոլոր շնորհքներուն համար: Ան յոյժ կարեւոր համարեց ՀՄԸՄ-ի դերակատարութիւնը իր նկարագիրի կերտման մէջ։ Անիկա «Հիմը հանդիսացած է արհետսվարժ կեանքիս, որուն համար շատ հպարտ եմ», ըսաւ Մելքոնեան։

Այնուհետեւ տեղի ունեցաւ մոմավառութիւն, իսկ պաշտօնական յայտագիրէն ետք երեկոն շարունակուեցաւ խրախճանքով:

Share.

Leave A Reply

This site uses Akismet to reduce spam. Learn how your comment data is processed.