ԽՄԲԱԳՐԱԿԱՆ՝ Սեպտեմբեր Գ./2018. ԱՆԿԱԽ ՊԵՏԱԿԱՆՈՒԹԻՒՆԸ ԳԵՐԱԳՈՅՆ ԱՐԺԷՔ

0

2018-ին  Հայաստանի անկախութեան կերտման 100-ամեակը ապա նաեւ վերանկախացման 27-ամեակը արդար հպարտութեամբ կը յիշատակենք:

Մեր ժողովուրդը դարեր շարունակ պայքարած է անկախութիւն կերտելու ու իր ազատ ինքնորոշման իրաւունքը ձեռք բերելու, իր մշակոյթն ու քաղաքակրթութիւնը պահելու եւ զարգացնելու համար:

Այդ պայքարին մասնակից դարձած են ե՛ւ մարտունակ ֆետայիներն ու հայ զինուորները, ե՛ւ մտաւորական խաւը՝ մտաւոր զարթօնքի առաջնորդելով մեր ժողովուրդը, ե՛ւ քաղաքական գործիչները, ե՛ւ սովորական գիւղացին, բանուորը՝ իրենց քրտնաջան աշխատանքով ու այդ աշխատանքին արդիւնքը արդարօրէն վայելելու նկրտումով:

Անկախ պետականութեան կերտումով արդիւնաւորուեցաւ այս պայքարը:

Սփիւռքի ու Հայրենիքի մեր ողջ ժողովուրդը մեծ ոգեւորութիւն ապրեցաւ, երբ երկար տարիներ փայփայած իր յոյսը մարմնաւորուած տեսաւ վերջապէս:

27 տարի առաջ Հայաստանի վերանկախացումով նոր որակ ստացան Հայաստան-Սփիւռք յարաբերութիւնները, քանդուեցան արհեստական պատերը Սփիւռքի եւ Հայաստանի միջեւ:

Անկախ պետականութիւնը փաստօրէն դարձաւ այն կռուանը, որ պարարտ հող ստեղծեց մեր ժողովուրդի գոյապայքարին համար ու նոր հորիզոններ բացաւ արդար, ժողովրդավար եւ ուժեղ հայրենիք ու պետականութիւն կերտելու ճամբուն:

Այդ ճամբան միշտ ալ ողորկ չեղաւ թէեւ, սակայն մեր ժողովուրդը ծնունդ տուաւ, ու տակաւին կը շարունակէ տալ, պետականութեան հզօրացման համար պայքարող, արդար ու հզօր Հայաստանի, կազմակերպ Սփիւռքի ուժականութեան հաւատացող ու այդ իտէալներուն հասնելու համար նոր մտածողութեամբ, նոր գործելաոճով  պայքարի դաշտ նետուող յանդուգն սերունդներու:

27 տարի ետք, Հայաստան նոր փուլ մը թեւակոխած է: Փուլ մը, որ կրնայ մեր պետականութեան հզօրացման ուղիին վրայ մեծ ոստումի մը նախաքայլը դառնալ, եթէ քաղաքական ուժերն ու իշխանութիւնները միջազգային ներկայ թոհուբոհին մէջ կարենան ամէն բանէ վեր դասել պետական ու ազգային շահերը, գործակցիլ արտաքին ճնշումներուն դէմ դնելու համար, աստիճանաբար մեղմացնել ներքին սրումները, որոնք բնական պոռթկումներու, մտքերու բախումի հետեւանք են նման շրջադարձերու մէջ, ու կարենան լիարժէքօրէն օգտագործել Հայրենիքի եւ Սփիւռքի մեր ողջ ներուժը՝ ի խնդիր Հայաստանի պետականութեան եւ Սփիւռքի հզօրացումին:

 

Սուրիական տագնապի տարիներուն Հայաստան հաստատուած սուրիահայերը ապրող վկաներն են անկախ պետականութեան հովանիին, իսկ Սփիւռքի մէջ հայկական արժէքներով ապրող համայնքները, որոնք տարիներ շարունակ մաքառելով պահպանած են ինքնութիւն, լեզու եւ մշակոյթ, դարձած են հայրենի պետականութեան սատար հանդիսացող գործօններ նաեւ՝ իրենց հայեացքը տեւաբար յարած պահելով հայրենիքին:

Ու որքան ամուր ըլլան Սփիւռք-Հայրենիք յարաբերութիւնները, որքան յստակ ուրուագծուին իւրաքանչիւրին դիմագրաւած դժուարութիւններն ու մարտահրաւէրները, իւրաքանչիւրին կարելիութիւններն ու հայկական շահերուն ծառայող լծակները, այնքան արդիւնաւէտ կ՛ըլլայ գործակցութիւնը ե՛ւ Հայրենիքին, ե՛ւ Սփիւռքին համար:

Տօնդ Շնորհաւո՛ր, Անկա՛խ Հայաստան:

«Գ.»

 

 

 

 

 

 

Share.

Leave A Reply

This site uses Akismet to reduce spam. Learn how your comment data is processed.