ՀԱՂՈՐԴԱԳՐՈՒԹԻՒՆ (ՍՕ Խաչի Ընկերաբժշկական Կեդրոն) (Հալէպ)

0

Գլխաւորութեամբ Բերիոյ Հայոց Թեմի Առաջնորդ Գերաշնորհ Տ. Շահան Ս. Արք. Սարգիսեանի, 2016 թուականի երկրորդ կիսուն արդէն սկսուած էր Թեմի վերականգնումի եւ վերաշինութեան նախապատրաստական աշխատանքները, իսկ Հալէպի ազատագրումով (22/12/2016) սկիզբ առած էին մասնագիտական սերտողութիւնները, ուր առաջնահերթ տեղ կը գրաւէր նաեւ ՍՕ Խաչի Ընկերաբժշկական Կեդրոնը, որ Սուրիական արիւնալի տագնապի օրերուն, ահաբեկչական զինեալ խմբաւորումներու կողմէ թիրախ եղած էր հրթիռակոծումներու, որուն հետեւանքով կառոյցը կրած էր  շինարարական մեծ վնասներ եւ դարձած՝ անօգտագործելի։

Յետ սերտողութիւններու աւարտին, Շաբաթ, 15 Սեպտեմբեր 2018-ի, կէսօրուան ժամը 12։00ին, հանդիսապետութեամբ Առաջնորդ Սրբազան Հօր,  յատուկ աղօթքով մեկնարկը սկսաւ Կեդրոնի նորոգութեան եւ վերաշինութեան աշխատանքներուն, ուր ներկաներու շարքին էին Հալէպի Քահանայից Դասը, Ազգ. Իշխանութեան ներկայացուցիչները, ՀՕՄ-ի Կեդրոնական Վարչութեան անդամ Տիկին Աննա Տէր Յակոբեան, ՍՕ Խաչի Սուրիոյ Շրջանային Վարչութեան եւ Շինարարական Յանձնախումբի կազմերը, ՍՕ Խաչի մասնաճիւղերու, յանձնախումբերու անձնուրաց խաչուհիներու հաւաքականութիւնը եւ ՀՄԸՄ-ի փողերախումբը։

Սրբազան Հայրը իր գնահատանքի խօսքով, նախ ընդգծեց Սուրիական հայրենիքին կառչած մնալու անհրաժեշտութիւնը, շեշտեց Կեդրոնի նախախնամական դերն ու դերակատարութիւնը Հալէպի ժողովուրդին, եւ յատկապէս Նոր Գիւղի շրջանի բնակչութեան համար, միաժամանակ վեր բերելով խաչին լոյսով ծնունդ առած եւ խաչին լոյսով իր յաղթարշաւը շարունակող կանացի հզօր կազմակերպութեան անխոնջ անդամներուն կողմէ ցուցաբերուած օրինակելի եւ կազմակերպ գործունէութիւնը, երբ մանաւանդ Սուրիական պատերազմի թէժ ու դժխեմ օրերուն, անտեսելով ահաւոր ճգնաժամը՝ անխափան շարունակեցին Միութեան վերապահուած իւրայատուկ առաքելութիւնը։

ՍՕ Խաչի Սուրիոյ Շրջանային Վարչութեան ատենապետուհի Տիկին Հռիփ Կանանեան՝ իր սրտի խօսքով, յանուն ՍՕ Խաչի մեծ ընտանիքին, որպէս աշխարհատարած ՀՕՄ-ի անվեհեր բազուկներէն մէկը, վերահաստատեց սկսուած գործը իր լրումին հասցնելու վճռակամութիւնը եւ յաջողութիւն մաղթեց բոլորին։

Կեդրոնի նորոգութեան գծով յառաջացած մասնագիտական Շինարարական Յանձնախումբի կազմն է.

Տիկին    Հռիփ Կանանեան

Օրդ.         Մարալ Տիքպիքեան

Տիկին    Պայծառ Չէրչեան

Դոկտոր  Երկրչ. Հուրի Ազէզեան

Երկրչ.    Սիլվա Նազարեան

Փաստ.   Շողեր Հայրապետեան

Տիար     Յարութիւն Չամիչեան

Տիար     Գէորգ Մաւլեան

Տիար     Ժագ Գազէզեան

 

Անվիճելիօրէն, ՍՕ Խաչի Ընկերաբժշկական Կեդրոնը՝ որ մեղուափեթակը կը հանդիսանայ 100 ամեայ ՍՕ Խաչի բազմերես եւ բազմաբնոյթ գործունէութիւններուն՝ բարեսիրական, մարդասիրական, ազգագրական, մարդակերտումի եւ ազգակերտումի  շրջագիծերէն ներս, շուտով իր վերանորոգեալ պայծառ դիմագիծով պիտի վերականգնի, եւ աներեր շարունակէ նուիրական գործը։

Սուրիահայ Օգնութեան Խաչի

 Ընկերաբժշկական Կեդրոնի

 Շինարարական Յանձնախումբ

Share.

Leave A Reply

This site uses Akismet to reduce spam. Learn how your comment data is processed.