ՀԱՂՈՐԴԱԳՐՈՒԹԻՒՆ ՀՅԴ ՔԱՆԱՏԱՅԻ ՀԱՅ ԴԱՏԻ ՇՐՋԱՆԱՅԻՆ ՅԱՆՁՆԱԽՈՒՄԲԻ ԼԻԱԳՈՒՄԱՐ ԵՐՐՈՐԴ ԺՈՂՈՎԻ

0

ՀՅԴ Քանատայի Հայ Դատի Շրջանային Յանձնախումբի լիագումար երրորդ ժողովը Արցախեան հիմնահարցին գծով վերստին հաստատեց իր վճռականութիւնը՝ զայն դարձնելու օրակարգի կիզակէտ, չխնայելով ոչ մէկ ջանք, որ Քանատայի մէջ Արցախեան հիմնահարցը ունենայ այնպիսի դրական անդրադարձ, որ ի վերջոյ զայն յանգեցնէ Արցախի Հանրապետութեան միջազգային ճանաչման:

Շաբաթ, 15 Սեպտեմբեր 2018-ին, Օնթարիօ նահանգի Քինկսթըն քաղաքին մէջ գումարուեցաւ ՀՅԴ Քանատայի Հայ Դատի Շրջանային Յանձնախումբի 2017-19 երկամեակի երրորդ լիագումար ժողովը:

Ժողովի օրակարգը մանրամասնօրէն քննեց եւ արժեւորեց յանձնախումբի նախորդ միամեայ գործունէութիւնը եւ մշակեց յառաջիկայ տարեշրջանի օրակարգն ու ծրագիրները: Հայ Դատի քաղաքական եւ քարոզչական բազմաթիւ առաջնահերթութեանց վերաբերեալ, ժողովը վարեց որակական քննարկումներ, նշելով ցարդ իրականացուած ձեռքբերումները, առկայ մարտահրաւէրներն ու դժուարութիւնները եւ անոնցմէ իրաքանչիւրը յաղթահարելու ուղղութեամբ տարուելիք յատուկ աշխատանքը:

Ժողովը յատուկ անդրադարձ կատարեց Քանատա-Հայաստան փոխյարաբերութիւններու զարգացման, արցախեան հիմնահարցի խաղաղ կարգաւորման, Ջաւախքի օժանդակութեան, Ցեղասպանութեան ուսուցման, յիշատակման եւ այլ ծրագիրներու շուրջ իրականացուելիք յառաջիկայ ծրագիրներուն:

Քանատա-Հայաստան փոխյարաբերութիւններու զարգացման ուղղութեամբ, ժողովը յատուկ կերպով անդրադարձաւ Հոկտեմբեր ամսուան ընթացքին Երեւանի մէջ տեղի ունենալիք Ֆրանսախօս Երկիրներու համաժողովին եւ Քանատայի վարչապետ Ճասթըն Թրուտոյի սպասուած այցելութեան: Այս ուղղութեամբ, յանձնախումբը քննեց նախորդ ամիսներու ընթացքին իր ունեցած բարձրաստիճան խորհրդակցութեանց արդիւնքներն ու հեռանկարները, նշելով որ վարչապետի սոյն այցելութիւնը կը հանդիսանայ իւրայատուկ առիթ՝ Քանատայի եւ Հայաստանի միջեւ երկկողմանի յարաբերութիւնները նոր մակարդակներ փոխադրելու եւ զանոնք առաւել արդիւնաւորելու, ոչ միայն համաժողովի շրջագիծէն ներս, այլ նաեւ անկէ դուրս: Այս իմաստով, յանձնախումբը որոշեց, իբրեւ սոյն գործի ամենէն ազդու մղիչ ուժը, պիտի շարունակէ իր համատարած խորհրդակցութիւնները, ապահովելու համար նորանոր յաջողութիւններ՝ քաղաքական, տնտեսական, մշակութային եւ այլ բնագաւարներէ ներս:

Արցախեան հիմնահարցի վերաբերեալ, ժողովը վերստին հաստատեց յանձնախումբին վճռականութիւնը՝ զայն դարձնելու օրակարգի կիզակէտ, չխնայելով ոչ մէկ ջանք, որ Քանատայի մէջ արցախեան հիմնահարցը ունենայ այնպիսի դրական անդրադարձ, որ ի վերջոյ զայն յանգեցնէ Արցախի Հանրապետութեան միջազգային ճանաչման: Այս ուղղութեամբ, ժողովը գնահատեց նախորդ ամիսներու ընթացքին տեղի ունեցած զգալի յառաջխաղացքն ու աննախադէպ յայտարարութիւնները:

Ցեղասպանութեան յիշատակման, դատապարտման, ուսուցման եւ կանխարգիլման ուղղութեամբ, ժողովը գնահատեց յանձնախումբի աշխատանքները եւ որոշեց յաւելեալ զարկ տալ այս ուղղութեամբ օտար համայնքներու հետ համագործակցութեան յաջող ջանքներուն:

Քարոզչական գետնի վրայ, յանձնախումբը արժեւորելէ ետք իր քարոզչական գործունէութիւնն ու կարելիութիւնները, մշակեց ժամանակակից նոր ծրագիրներ՝ Հայ Դատի քարոզչութիւնը հայ եւ օտար համայնքներու աւելի լայն շերտերուն հասանելի դարձնելու մտադրութեամբ: Յանձնախումբը նաեւ որոշում գոյացուց սերտողութիւններ կատարել մայրաքաղաք Օթթաուայի մէջ Հայ Դատի վարժողական ծրագրի մը յառաջացման ուղղութեամբ, որ կը մտադրէ երիտասարդ նոր ուժեր պատրաստել Հայ Դատի գործունէութեան համար:

Ժողովի աւարտին, յանձնախումբը վերստին հաստատեց իր վճռակամութիւնը ամէն ջանք ի գործ դնելու, յանուն Հայ Դատի բոլոր առաջնահերթութիւններու իրականացման եւ քանատահայութեան բարօր զարգացման:

ՀՅԴ Քանատայի Հայ Դատի Շրջանային Յանձնախումբ

Օթթաուա

Share.

Leave A Reply

This site uses Akismet to reduce spam. Learn how your comment data is processed.