ԳՈՅՆԵՐՈՒՆ ԱԶԴԵՑՈՒԹԻՒՆԸ

0

Գոյներու օգնութեամբ կրնանք կանխել ոչ միայն հիւանդութեան զարգացումը, այլ բուժել հիւանդութիւնը:

Մեզմէ իւրաքանչիւրը նկատած է, որ կապոյտ երկինքին կամ կապոյտ ծովուն երկար ժամանակ  նայիլը մեզ հոգեկան խաղաղութիւն կը պարգեւէ: Տերեւներուն եւ խոտին կանաչը ուժ կը հաղորդէ մեզի, իսկ կարմիր կամ նարնջագոյն բոցը կը բարձրացնէ մեր տրամադրութիւնը:

Վերջերս կատարուած ուսումնասիրութիննները փաստած են, որ գոյները կ’ազդեն  մարդ էակին վրայ եւ կրնան մարդուն հոգեկան հաւասարակշռութիւնը վերականգնել  եւ ձերբազատել զայն կարգ մը հիւանդութիւններէ:

Գիտնականներ նաեւ ապացուցած են, որ գոյներու բացակայութիւնը շատ գէշ կ’ազդէ մարդոց վրայ:Օրինակ՝ առողջ եւ ուրախ ապրելու համար կարեւոր են վառ գոյները: Անոնք մարդոց կու տան ստեղծագործական ուժ եւ կորով: Աշնան կանաչ գոյնի բացակայութեան պատճառով մարդիկ յոգնածութիւն, անքնութիւն եւ ընկճուածութիւն կը զգան:

1878-ին գիտնական Էտվին Փեթիթ ներկայացուցած է իր աշխատասիրութիւնը, որ մեծ աղմուկ բարձրացուցած  եւ տարածուած է բժշկական աշխարհին մէջ: Ան գունային ազդեցութիւնը բաժնած է երկու ուղղութիւններու՝ կարմիր եւ կապոյտ: Իր կարծիքով միայն կարմիր ու կապոյտ գոյները կ’ազդեն մարդուն ջիղերու աշխատանքին վրայ, իսկ դեղին ու կանաչ գոյները ան չէզոք համարած է: Փեթիթի համաձայն, կարմիր երանգները կը զօրացնեն երակներու եւ մկաններու աշխատանքը, կը նպաստեն արեան ճնշումի բարձրացումին, կ’արագացնեն սրտին աշխատանքը եւ կը բարելաւեն նիւթափոխանակութեան եւ սպիացման գործընթացները:Կարմիր գոյնը կը յառաջացնէ յաճախամիզութիւն, լեղազատում, կ’արագացնէ սակաւարիւնութեամբ տառապող հիւանդներու կազդուրման գործընթացը, ինչպէս նաեւ կ’օգնէ երկարատեւ հիւանդութիւններէ ետք վերականգնելու անձը: Վառ գոյները վնասակար ազդեցութիւն ունին բորբոքումներու, փորլուծութեան, անքնութեան եւ ջղային համակարգի գրգռուածութեան ընթացքին:

Կապոյտին երանգները կը նպաստեն արեան ճնշումի նուազեցումին, կը վերացնեն բորբոքումները,  կը նպաստեն ջերմութեան նուազեցումին, կը հանգստացնեն ջիղերը եւ կ’արագացնեն ոսկրային հիւսուածքի վերականգումը: Միեւնոյն ժամանակ՝  կ’արգիլեն կաթուածը, լեղուղիներու եւ երիկամներու մէջ քարերու գոյացումը:

Յետ ուսումնասիրութեան՝ Փեթիթ հասած է այն եզրակացութեան, որ իւրաքանչիւր օրկան ունի իր համապատասխան գոյնը:

Այսպէս՝ գլխուն կը համապատասխանեն մանիշակագոյն եւ կապոյտ գոյները: Սրտին ու թոքին՝ կանաչը, ենթաստամոքսային գեղձին, լեարդին եւ ստամոքսին՝ դեղինը: Սեռական օրկաններուն, միզապարկին եւ հաստ աղիքին՝ նարնջագոյնը, իսկ պոչուկին՝ կարմիրը:

ՄԱՐԴՈՑ ԲՆԱՒՈՐՈՒԹԻՒՆՆ ՈՒ ՏՐԱՄԱԴՐՈՒԹԻՒՆԸ՝ ԳՈՅՆԵՐՈՒ ՀԱՄԱՁԱՅՆ

Մանիշակագոյնը նախընտրողները իրենց շուրջ համերաշխ ու ներդաշնակ միջավայր կը ստեղծեն:Բայց երբեմն վստահութիւն չունենալով իրենց ուժերուն նկատմամբ, չեն համարձակիր կարեւոր որոշում գոյացնել:Մանիշակագոյնի երանգները մարդու հոգիին ներհայեցողական ելեւէջներուն հոմանիշերն են:

Կապոյտը կը խորհրդանշէ հանգստութիւն, հաւասարակշռութիւն եւ նրբութիւն: Այս գոյնը կը սիրեն բոլորին հետ շփում ունեցող հանգիստ անձնաւորութիւնները: Իսկ չեն սիրեր անձեր, որոնք տագնապի եւ վախի զգացողութիւն ունին եւ մեկուսացում կը փնտռեն:

Երկնագոյնը մաքուր գիտակցութեան  եւ ջուրի գոյնն է, որ կը հանգստացնէ, կը զովացնէ մարմինը եւ կը հանդարտեցնէ միտքը: Այս գոյնը կ’ընտրեն դիւրահաւատ, հաւատարիմ, ինքնազոհաբերութեան պատրաստ մարդիկ: Եթէ մենք չենք ընդունիր երկնագոյնը, այդ կը վկայէ մեր հոգեկան աշխարհի լարուածութեան, անբաւարարուածութեան մասին:

Կանաչը յոյսի, կենսունակ ուժի գոյնն է, որը կը հանգստացնէ եւ կը հանդարտեցնէ յոյզերը:Այս գոյնին նախապատուութիւն կու տան անոնք, որոնք ինքնավստահ են, իսկ շրջապատի թերութիւններուն հանդէպ՝ անհանդուրժող:

Դեղինը արեւի լոյսն է, կը խորհրդանշէ պայծառութիւն, երջանկութիւն, կը խթանէ ազատասիրութիւնը, բանականութիւնը եւ ստեղծագործ ուժը: Դեղին գոյն սիրող մարդիկ կը ձգտին անկախութեան ու երջանկութեան:

Նարնջագոյնը կենսուրախութեան եւ ստեղծագործելու նպաստող գոյնն է: Այս գոյնը կ’ընտրեն յաւակնոտ եւ եռանդուն մարդիկ: Այս գոյնը չեն նախընտրեր  անձեր, որոնք կը սիրեն հանգիստը եւ անգործութիւնը:

Կարմիրը կրակի գոյնն է, կը խորհրդանշէ զայրոյթ եւ ֆիզիքական ուժ: Այս գոյնին նախապատուութիւն կու տան տաքարիւն խառնուածքի տէր անձեր, որոնք իրենց զգացումները կ’արտայայտեն բուռն կերպով: Կարմիր գոյնը չեն սիրեր անինքնավստահ եւ հոգեպէս ճնշուած մարդիկ:

Ճերմակը ճշմարտութեան, համերաշխութեան, լիարժէք ազատութեան եւ նախաձեռնութեան նշանաբանն է: Այս գոյնը կը նախընտրեն հանգիստի եւ ներդաշնակութեան կարիքը ունեցողները:

Սեւը ժխտումի, լճացումի, ներքին լռութեան գոյնն է: Այս գոյնը կը սիրեն ինքնամփոփ, ճակատագրի հարուածէն վախցող մարդիկ, որոնք կեանքէն մեծ ակնկալիքներ չունին:

 

 

 

Share.

Leave A Reply

This site uses Akismet to reduce spam. Learn how your comment data is processed.