ԱՐՑԱԽԸ Կ՛ՈՂՋՈՒՆԷ ՇՓՄԱՆ ԳՕՏԻԻՆ ՎՐԱՅ ԼԱՐՈՒԱԾՈՒԹԻՒՆԸ ՄԵՂՄԱՑՆԵԼՈՒ ՓԱՇԻՆԵԱՆԻՆ ՈՒ ԱԼԻԵՒԻՆ ՀԱՄԱՁԱՅՆՈՒԹԻՒՆԸ

0

Արցախի Հանրապետութեան նախագահի մամլոյ բանբեր Դաւիթ Բաբայեան «Արմէնփրէս»ի հետ զրոյցի մը ընթացքին ըսաւ, որ Արցախի Հանրապետութիւնը շփման գօտիին վրայ լարուածութեան մեղմացման շուրջ Հայաստանի Հանրապետութեան վարչապետ Նիկոլ Փաշինեանի ու Ատրպէյճանի նախագահ Իլհամ Ալիեւի համաձայնութիւնը կ՛ողջունէ, բայց հարցին որոշ վերապահութեամբ կը մօտենայ:

«Եթէ քաղաքական գնահատական տանք, հետաքրքրական եւ ողջունելի զարգացում է: Այն երեք կէտերը, որոնց շուրջ համաձայնած են, շատ կարեւոր են: Սակայն այստեղ կայ վերապահութիւն, որ Ալիեւին եւ առհասարակ ատրպէյճանական ղեկավարութեան ամբողջապէս վստահիլը ճիշդ չէ, որովհետեւ ամէնէն նենգ ձեւով, ամէնէն անյարմար պահուն անոնք կրնան որեւէ համաձայնութիւն խախտել, ինչ որ  ցոյց տուած է փորձառութիւնը: Այնուամենայնիւ, յուսանք, որ այս անգամ դրական ինչ որ ազդեցութիւն կը ձգէ այս համաձայնութիւնը», յայտնեց Բաբայեան:

Արցախի նախագահի մամլոյ բանբերը ըսաւ, որ կարճ ժամանակի ընթացքին որեւէ փոփոխութիւն պէտք չէ ակնկալել:

«Պէտք է սպասել: Այս համաձայնութիւնը մենք պէտք է դիտարկենք ոչ թէ երկու ժամուան կամ մէկ-երկու օրուան կտրուածքով, այլ երկարատեւ», ըսաւ ան:

Դաւիթ Բաբայեանի խօսքով, համաձայնութեան շուրջ Ալիեւի համամտութիւնը կրնայ կախեալ ըլլալ Ատրպէյճանի ղեկավարութեան նկատմամբ տարբեր ատեաններու ճնշումներէն:

«Հետաքրքրական է, որ անկէ առաջ համանախագահները շատ կարծր յայտարարութիւն կատարեցին: Վստահաբար, անիկա նախ եւ առաջ ուղղուած էր Ատրպէյճանին, որովհետեւ այդ կողմն է զինադադարի դրութիւնը խախտողը, եւ հետաքրքրական զուգադիպութիւն է, որ Ռուսիոյ  նախագահը պաշտօնական տեսանկիւնէ ծանօթացուցած է Հայաստանի եւ Ատրպէյճանի ղեկավարները: Նկատի առնելով, որ Ռուսիան ԵԱՀԿ-ի Մինսքի խմբակի համանախագահող երկիրներէն մէկն է, չի բացառուիր, որ Ալիեւ շատ առանձնայատուկ դրութեան մէջ մտած է, որ կայ  բաւական մեծ ճնշում անոր վրայ, եւ պատեհ առիթ գտած է ե՛ւ ծանօթանալու Հայաստանի Հանրապետութեան նոր ղեկավարին, ե՛ւ ինքզինք ցոյց տալու իբրեւ կառուցողական կողմ», ըսաւ Դաւիթ Բաբայեան:

Արցախի նախագահի մամլոյ բանբերը, այնուամենայնիւ, յայտնեց, որ այս ընթացքին իրավիճակը սահմանին վրայ կայուն է:

 

 

Share.

Leave A Reply

This site uses Akismet to reduce spam. Learn how your comment data is processed.