ՄԻԱՑԵԱԼ ՆԱՀԱՆԳՆԵՐՈՒ ՔՈՆԿՐԷՍԱԿԱՆ ՄԸ ՀԱՅ ԴԱՏԻ ՅԱՆՁՆԱԽՈՒՄԲԻ ՆԵՐԿԱՅԱՑՈՒՑԻՉՆԵՐՈՒՆ ՀԵՏ ՔՆՆԱՐԿԱԾ Է «ԻՆՃԻՐԼԻՔ» ՌԱԶՄԱԿԱՅԱՆԷՆ ՄԻԱՑԵԱԼ ՆԱՀԱՆԳՆԵՐՈՒ ԿԱԽԵԱԼ ԸԼԼԱԼԸ ՆՈՒԱԶԵՑՆԵԼՈՒ ՀԱՐՑԸ

0

Միացեալ Նահանգներու Ներկայացուցիչներու պալատի Հետախուզութեան Հարցերով Մշտական Յանձնաժողովի նախագահ Տեվին Նունէս Միացեալ Նահանգներու Հայ Դատի Յանձնախումբի ներկայացուցիչներուն հետ հանդիպումին քննարկած է Թուրքիոյ «Ինճիրլիք» ռազմակայանէն  Միացեալ Նահանգներու կախեալ ըլլալը նուազեցնելու հարցը:

«Հանդիպումին ընթացքին քննարկուած են կարեւոր հարցեր՝ սկսած Հայոց Ցեղասպանութեան լիարժէք ճանաչումէն, մինչեւ Թուրքիոյ մէջ «Ինճիրլիք» ռազմակայանէն մեր որոշ գործառոյթները այլ վայր տեղափոխելու հարցը», հանդիպումէն ետք ըսած է Նունէս:

Միացեալ Նահանգներու Հայ Դատի Յանձնախումբի գործադիր տնօրէն Արամ Համբարեան իր կարգին յայտնած է, որ Թուրքիա երկար ժամանակ օգտագործած է «Ինճիրլիք» ռազմակայանը՝ Միացեալ Նահանգները պատանդ պահելու համար:

Թուրքիոյ հարաւը տեղակայուած «Ինճիրլիք» ռազմակայանը հիմնուած է 1954-ին Թուրքիոյ եւ Միացեալ Նահանգներու միջեւ միատեղ օգտագործման համաձայնագիրի հիման վրայ: Ան կը հանդիսանայ Մերձաւոր Արեւելքի եւ Աֆղանստանի ուղղութեամբ Միացեալ Նահանգներու ռազմական գործողութիւններու հիմնական  խարիսխը: Այս տարուան Մարտին «Ուոլ Սթռիթ Ժուռնալ»ը հաղորդած էր, որ Միացեալ Նահանգներ կտրուկ կրճատած է «Ինճիրլիք» ռազմակայանին մէջ ռազմական իր ներկայութիւնը ՝ Թուրքիոյ եւ Միացեալ Նահանգներու միջեւ վատացող յարաբերութիւններուն հետեւանքով:

 

Share.

Leave A Reply

This site uses Akismet to reduce spam. Learn how your comment data is processed.