ԼԵՌՆԻԿ ՅՈՎՀԱՆՆԻՍԵԱՆ ՀԻՒՐԸՆԿԱԼԱԾ Է ԵՒՐՈՊԱԿԱՆ ԽՈՐՀՐԴԱՐԱՆԻ ՊԱՏԳԱՄԱՒՈՐ ԷԼԵՆԻ ԹԵՈԽԱՐՈՒՍՆ ՈՒ ԿԻՊՐՈՍԻ ԽՈՐՀՐԴԱՐԱՆԻ ԱՆԴԱՄՆԵՐԸ

0

Արցախի Հանրապետութեան Մշակոյթի, Երիտասարդութեան Հարցերու եւ Զբօսաշրջութեան նախարար Լեռնիկ Յովհաննիսեան հիւրընկալած է Եւրոպական Խորհրդարանի պատգամաւոր Էլենի Թեոխարուսը, անոր հետ Արցախ ժամանած Կիպրոսի խորհրդարանի անդամներ Եորկոս Փերթիքիսը, Միքայիս Կիորկալասը եւ Կիպրոսէն ՀՅԴ ներկայացուցիչ Նայիրի Մուրատեանը: Պատուիրակութեան կ’ուղեկցէր Հայ Դատի Եւրոպայի Յանձնախմուբի տնօրէն Գասպար Կարապետեան:

Նախարարը ողջունած է հիւրերը եւ յոյս յայտնած , որ բարեկամական յարաբերութիւններէն զատ կը յաջողին հաստատել նաեւ գործնական յարաբերութիւններ, որոնք կը նպաստեն Եւրոպայի մէջ Արցախի ու անոր մշակոյթի մասին տեղեկացուածութեան մակարդակի բարձրացումին:

«Մեր երկիրներու ճակատագիրները շատ նման են իրարու՝ կորուսեալ հայրենիք, չլուծուած քաղաքական հարցեր, բայց հին ու հարուստ մշակոյթ: Կ’ուզեմ հաւատալ, որ օր մը մե՛նք ալ, դու՛ք ալ կ’ունենանք միացեալ հայրենիք, եւ անոր մէջ մեզի կ’օգնէ նաեւ մեր մշակոյթը», ընդգծած է նախարարը:

«Ես կը հիանամ ձեր մշակոյթով, կ’ընթերցեմ հայ գրողներէ գործեր, յատկապէս կը սիրեմ Գէորգ Էմինի ու Սիլվա Կապուտիկեանի բանաստեղծութիւնները, կը հիանամ Մարտիրոս Սարեանի կտաւներով, կը սիրեմ ձեր երաժշտութիւնը», խոստովանած է Եւրոպական Խորհրդարանի պատգամաւոր Էլենի Թեոխարուս՝ յոյս յայտնելով, որ Արցախի մշակոյթի գերատեսչութեան հետ համագործակցութեան հետեւանքով հայկական եւ արցախեան մշակոյթը աւելի լաւ ներկայացուած կ’ըլլան Եւրոպայի մէջ:

Քննարկուած են համագործակցութեան ուղղութիւններ՝ մշակոյթ, զբօսաշրջութիւն, ինչպէս նաեւ արցախցի երիտասարդներուն մասնակցութիւնը միջազգային տարբեր նախագիծերուն: Նախնական համաձայնութիւն ձեռք բերուած է համագործակցութեան մեկնարկը տալ 2019-ին:

 

Share.

Leave A Reply

This site uses Akismet to reduce spam. Learn how your comment data is processed.