«ԿԱՄՈՒՐՋՆԵՐ ՀԱՍՏԱՏԵԼ Բ.» ԴԱՍԱԽՕՍԱՇԱՐՔԻ ՄԱՍՆԱԿԻՑՆԵՐՈՒ ՀԱՒԱՔ՝ ՆՈՒԻՐՈՒԱԾ ՀՀ ՎԵՐԱՆԿԱԽՈՒԹԵԱՆ 27-ԱՄԵԱԿԻՆ

0

ՀՄԸՄ-ի Սուրիոյ Շրջ. Վարչութեան Մամուլի Յանձնախումբին հրաւէրով  «Կամուրջներ Հաստատել Բ.»  դասախօսաշարքի կամուրջականները ունեցան մտերմիկ հաւաք մը, Ուրբաթ 28 Սեպտեմբեր 2018-ին, կէսօրէ ետք ժամը 4.30-ին, Հայաստանի Հանրապետութեան Հալէպի Հիւպատոսարանէն ներս, ուր ներկայ գտնուեցան շուրջ 60 կամուրջականներ: Հանդիպումը նուիրուած էր ՀՀ Վերանկախութեան 27-ամեակին:

Յանձնախումբի ատենապետուհի Անի Գալտնեան բարի գալուստ մաղթելէ ետք, հրաւիրեց ՀՀ Հալէպի Գլխաւոր Հիւպատոս Արմէն Սարգսեանը։ Պարոն Հիւպատոսը շնորհաւորեց ներկաները եւ գնահատեց «Կամուրջներ Հաստատել Բ.» դասախօսաշարքի մասնակիցները, ողջունելով բոլոր միութիւններէն մէկ տեղ եկած դաստիարակչական այս ծրագիրին գաղափարը, մաղթեց առաւել զարգացնել եւ արդիւնաւէտ գործունէութիւններով հանդէս գալ:

Ան յայտնեց, որ Հիւպատոսարանի դռները միշտ բաց են հիւրընկալելու այսպիսի շահեկան ծրագիրներ:

Ապա կամուրջականները Հիւպատոսարանի կանաչազարդ պարտէզէն ներս մասնակցեցան հարց-պատասխանի մրցումի, որուն հարցումները քաղուած էին հայոց պատմութենէն եւ Հայաստանի աշխարհագրութենէն, ետքը անոնք պատրաստեցին եռագոյն թելերով գեղեցիկ ձեռքի կապեր։

Կամուրջականներ խօսք առնելով գնահատեցին յանձնախումբին կողմէ տարուած աշխատանքը եւ իրենց գոհունակութիւնը յայտնեցին միատեղ համախմբուելով օգտաշատ ծրագիրներու իրագործումին համար:

Աւարտին, ներկաները խանդավառութեամբ հայրենասիրական երգեր երգեցին ու կրկին հանդիպելու յոյսով ցտեսութիւն մաղթեցին իրարու։

Հաւաքին Մամուլի Յանձնախումբին կողմէ  հիւպատոսին յանձնուեցաւ ՀՄԸՄ-ի վահանը եւ 100-ամեակի առիթով հրատարակուած երեք գիրքեր։

Ապա տեղի ունեցաւ կոկիկ հիւրասիրութիւն: Բոլոր ներկաները ունեցան «Կամուրջներ Հաստատել Բ.» դասախօսաշարքի դասախօսութիւններու նոր հրատարակուած գիրքը։

Share.

Leave A Reply

This site uses Akismet to reduce spam. Learn how your comment data is processed.