ԱՀԱԸ – 100

0

Երեւանի «Բաղրամեան 18» հասցէն ծանօթ է շատ շատերու. ան կեդրոնն է Ամերիկայի Հայ Աւետարանչական Ընկերակցութեան (ԱՀԱԸ), որ Հայաստանի վերանկախացման օրէն ի վեր կը գործէ, իր բարեսիրական ծառայութիւնները մատուցելով Հայաստանի եւ Արցախի տարածքին խնամատարական զանազան ձեռնարկութիւններով:
Երեւանեան անցնող շաբաթը յատկանշուեցաւ այս հիմնարկին հիմնադրութեան 100-ամեակին նուիրուած շարք մը ձեռնարկներով, որոնք կը կրէին «Հաւատի, սիրոյ եւ ծառայութեան ժառանգութիւն» բնաբանը:
23 Սետեմբերին, յիշեալ ձեռնարկներու շարքը սկսաւ համերգով մը, ուր ելոյթ ունեցաւ Արմաւիրի ԱՀԱԸ-ի կեդրոնի երգչախումբի ղեկավար մեներգչուհի Մարիետա Անտոնեանը:
25 Սեպտեմբերին, Ընկերակցութեան Երեւանեան կեդրոնի դահլիճին մէջ ներկայացուեցաւ թատերգութիւն մը, ի յիշատակ վերապատուելի Յովհաննէս Էսքիճեանի, որ Մեծ եղեռնի օրերուն Հալէպի մէջ իր անձնական ջանքերով յաջողած է ստոյգ մահէ փրկել մանուկներ, կանայք եւ մտաւորականներ, արժանանալով «Փրկութեան հրեշտակ» կոչումին: Թատերգութեան հեղինակն ու բեմադրիչն էր կեդրոնի մնայուն բեմադրիչ Նունէ Աբրահամեան:
Յաջորդ օրը՝ 26 Սեպտեմբերին, Հայաստանի Նկարիչներու Միութեան կեդրոնին մէջ բացումը կատարուեցաւ աւետարանական արուեստագէտներու նկարչական ցուցահանդէսին, որուն իրենց մասնակցութիւնը բերած էին շարք մը ծանօթ եւ անուանի նկարիչներ, որոնցմէ կարելի է յիշել նախկին հալէպահայեր Վրէժ Քասունին եւ Տիպար Աբարդեանը, իսկ ցուցահանդէսի զարդն էին եգիպտահայ անուանի նկարիչ Արմիսի կտաւները:
Ուրբաթ, 28 Սեպտեմբերին, Երեւանի Ալ. Սպենդիարեանի անուան օփերայի եւ պալէի ազգ. Ակադեմական թատրինին մէջ մատուցուեցաւ թատերականացուած երաժշտական ներկայացում մը, որ պարային պատկերներով փուլ առ փուլ ներկայացուց մարդ արարածի կեանքը, միահիւսուած հայ ժողովուրդի ճակատագիրին, ապա ԱՀԱԸ-ի ծնունդն ու գործունէութիւնը տեսերիզի ցուցադրութեամբ:
Յընթացս գեղարուեստական յայտագիրին, եղան խօսք առնողներ, որոնք վեր առին այս ընկերակցութեան մարդասիրական առաքելութեան տարբեր երեսները:
Շաբաթ, 29 Սեպտեմբերին ձեռնարկներու շարքը պսակուեցաւ հանդիսաւոր ճաշկերոյթով մը Մարիոթ հիւրանոցի «Տիգրան Մեծ» դահլիճին մէջ՝ ի ներկայութեան աշխարհի զանազան կողմերէն եկած հիւրերու. Ընթացքին տեղի ունեցաւ տեսերիզի ցուցադրութիւն, աշուղական եւ հայրենասիրական երգերու մեկնաբանութիւն Գաբի Գալոյեանի կատարողութեամբ, Ողբ. Վեր.Պ. Աբարդեանի «Ձօներգի» ներկայացումը իր դուստրերուն՝ Շողակաթ եւ Հուրի Աբարդեաններու կատարումով: Աւարտին, գեղանկարներով գնահատուեցան ԱՀԱԸ-ի Արցախի կեդրոնի պատասխանատու Արսէն Մանասեանն ու Աւետիսեան վարժարանի տնօրէնուհի Մելանիա Գեղամեանը: Փակման գեղեցիկ ու իմաստալից խօսքով միջոցառումներու շաբաթը փակեց ԱՀԱԸ-ի գործադիր տնօրէն Զաւէն Խանճեանը:
Հարիւրամեայ այս հաստատութիւնը բարիք մը եղած է մարդկութեան, Մեծ Եղեռնի օրերէն, մինչեւ ներկայ Հայաստան եւ Արցախ ու պիտի շարունակէ իր Աստուածահաճոյ առաքելութիւնը:

 

Յ. Մ.

Share.

Leave A Reply

This site uses Akismet to reduce spam. Learn how your comment data is processed.