ՊՐԻՒՔՍԷԼԻ ՄԷՋ ԱՒԱՐՏԻՆ ՀԱՍԱՒ ՀՅԴ ԵՒՐՈՊԱՅԻ ԵՐԻՏԱՍԱՐԴԱԿԱՆ ՄԻՈՒԹԻՒՆՆԵՐՈՒ ԽՈՐՀՐԴԱԺՈՂՈՎԸ

0

Պելճիքայի մայրաքաղաք Պրիւքսէլի մէջ, 7 Հոկտեմբերին, աւարտին հասաւ ՀՅԴ Եւրոպայի երիտասարդական միութիւններու խորհրդաժողովը, որուն մասնակից 40 երիտասարդները կը ներկայացնէին Պելճիքայի, Ֆրանսայի, Յունաստանի, Կիպրոսի, Հոլանտայի եւ Հայաստանի երիտասարդական ինչպէս նաեւ «Նիկոլ Աղբալեան» ուսանողական միութիւնները։
Խորհրդաժողովը շեշտուած էր արտաքին-յարաբերական եւ քաղաքական օրակարգի՝ քննարկուող նիւթերու յագեցուածութեամբ։

Խորհրդաժողովի մասնակիցները ունկնդրեցին զեկոյցներ եւ հանգամանօրէն քննարկեցին հետևեալ նիւթերը.

– Եւրոպական երկիրներու քաղաքական կացութիւնը, յատկապէս ընկերվարական եւ ընկերվար-ժողովրդավարական կուսակցութիւններու իրավիճակը,

– ՀՅԴ Երիտասարդականի արտաքին-յարաբերական գործունէութիւնը եւ ապագայ ընելիքները,

– ՀՅԴ լոպիստական գործունէութիւնը պետական եւ քաղաքական տարբեր ուժերու հետ։ Եւրոպայի մէջ Հայ Դատի յանձնախումբերու եւ յատկապէս Պրիւքսէլ գտնուող Հայ Դատի Եւրոպայի գրասենեակի աշխատանքները։ Արձանագրուած հայամէտ որոշումներն ու ձեռք բերուած յաջողութիւնները թուրք-ատրպէյճանական լոպպիի դէմ,

– Հայաստանի Հանրապետութիւն-Եւրոպական Միութիւն յարաբերութիւններու ներկայ մակարդակը եւ զարգացման միտումները,

– Հայաստանի Հանրապետութեան ներքաղաքական իրավիճակը եւ դաշնակցական երիտասարդներու դերն ու ընելիքը այդ ուղղութեամբ,

– դաշնակցական երիտասարդներու ընելիքները Հայաստանի մէջ՝ ընկերային արդարութեան հաստատման եւ ընկերվարական արժէքներու պաշտպանութեան ու տարածման գործին մէջ։

Խորհրդաժողովի մասնակիցները վերահաստատեցին դաշնակցական երիտասարդութեան յանձնառութիւնը՝ սփիւռքահայ համայնքներու ամրութեան պահպանման, արտերկրի մէջ հայկական շահերու պաշտպանութեան, քաղաքական գործունէութեան ծաւալման եւ կարելիութիւններու սահմաններուն մէջ հայրենաբնակ երիտասարդութեան օժանդակութեան գործին մէջ։

Մասնակիցները նաև այցելեցին Եւրոպական Խորհրդարանի պատմութեան թանգարան, Պրիւքսէլի հայկական եկեղեցի եւ Հայոց Ցեղասպանութեան զոհերու յիշատակին նուիրուած յուշակոթող-խաչքարը։

Խորհրդաժողովը անցաւ ընկերական ջերմ մթնոլորտի մէջ։

ՀՅԴ Բիւրոյի Երիտասարդական Գրասենեակ
9 Հոկտեմբեր 2018

Share.

Leave A Reply

This site uses Akismet to reduce spam. Learn how your comment data is processed.