ՎՐԱՍՏԱՆԻ ՄԷՋ ՀԱՅԿԱԿԱՆ ԵԿԵՂԵՑՒՈՅ ՊԱՏԿԱՆԵԼԻՈՒԹԻՒՆԸ ԾԱԾԿԵԼՈՒ ՓՈՐՁԵՐ ԿԸ ԿԱՏԱՐՈՒԻՆ

0

«Արմինիըն Չըրչ» լրատուական կայքը կը հաղորդէ, որ Վրաստանի մէջ այլազան պատճառներով կը շարունակուին դարերու ընթացքին հայ համայնքին կողմէ կառուցուած եկեղեցական կառոյցներէն հայկական հետքերը ջնջելու կամ ծածկելու գործողութիւնները:

Դեկտեմբեր 2014-ին Վրաստանի վարչապետին յղուած նամակին մէջ, Վիրահայոց Թեմի Առաջնորդ Վազգէն Եպս. Միրզախանեանի կողմէ ներկայացուած էր Վրաստանի տարածքին գտնուող հայոց եկեղեցիներուն ցանկը, որուն մէջ ընդգրկուած էր նաեւ Դիղոմի գիւղի Սուրբ Կարմիր Կիրակի անունով հայկական եկեղեցին, կառուցուած՝ 19-րդ դարու կէսերուն:

Եկեղեցին գործած է մինչեւ խորհրդային կարգերու հաստատուիլը: Այնուհետեւ անիկա զրկուած է իբրեւ եկեղեցի գործելու իրաւունքէն: Եկեղեցին մինչեւ օրս կը գտնուի կանգուն վիճակի մէջ: 2003-ին, Վազգէն Եպս. Միրզախանեան արխիւագէտ Սարգիս Տարչինեանի ուղեկցութեամբ այցելած էր վերոնշեալ եկեղեցին, ականատես եղած պահպանուած հայատառ արձանագրութիւններու կամ գրութիւններու եւ որմնանակարներու հետքերուն, որոնք կը փաստեն եկեղեցւոյ հայկական ըլլալը:

Վերջերս, սակայն, անյայտ անձերու կողմէ դարձեալ սկսած են հայկական հետքի վերացման բարբարոսական գործողութիւնները: Յարձակումի մը հետեւանքով ոչնչացուած են սոյն եկեղեցւոյ հայկական պատկանելութիւնը հաստատող որմնանկարները, որոնք ծածկուած են գաճի ծածկոյթով, կամ ոչնչացուած՝ քերելով:

Վիրահայոց թեմը բարձրօրէն կը գնահատէ թէ՛ հայ, եւ թէ օտար անհատներու ու կառոյցներու կողմէ նման վայրագութիւններու դէմ բողոքները եւ կոչ կ’ուղղէ նման իրավիճակներու պարագային, ոչ միայն դիմելու առաջնորդարան, այլ նաեւ պետական համապատասխան մարմիններու ուշադրութիւնը հրաւիրելու Վրաստանի մէջ յուշարձաններու ոչնչացման այս պախարակելի աւանդոյթին դէմ:

Վիրահայոց Թեմը այս արարքը կը գնահատէ իբրեւ Վրաստանի մէջ հայկական պատմամշակութային ժառանգութեան վրայ յարձակում եւ կը դատապարտէ նման քայլեր՝ հրաւիրելով իշխանութեան պատկան մարմիններու ուշադրութիւնը եւ համապատասխան քայլերու ձեռնարկումը:

Share.

Leave A Reply

This site uses Akismet to reduce spam. Learn how your comment data is processed.