ԱՐՄԷՆ ՍԱՐԳՍԵԱՆ ՆԱԽԱՁԵՌՆԱԾ Է ԽՈՐՀՐԴԱԿՑՈՒԹԻՒՆՆԵՐՈՒ ՇԱՐՔ ՄԸ ԱԶԳԱՅԻՆ ԺՈՂՈՎԻ ԽՄԲԱԿՑՈՒԹԻՒՆՆԵՐՈՒ ՀԵՏ

0

Հայաստանի մէջ ստեղծուած իրավիճակը քննարկելու նպատակով Հանրապետութեան նախագահ Արմէն Սարգսեան նախաձեռնած է խորհրդակցութիւններու շարքի մը Ազգային Ժողովի խմբակցութիւններուն հետ:

10 Հոկտեմբերին Հանրապետութեան նախագահը հանդիպած է ԱԺ «Հայաստանի Հանրապետական Կուսակցութիւն» խմբակցութեան ղեկավար Վահրամ Բաղտասարեանի հետ:

Նախագահ Սարգսեանը ողջունած է վերջին օրերուն քաղաքական ուժերու որդեգրած բանակցային ուղին եւ կարեւոր համարած հանդուրժողականութեան ու համերաշխութեան մթնոլորտը երկրին մէջ: Ան անգամ մը եւս շեշտած է, որ առկայ հարցերը կարելի է եւ պէտք է լուծել երկխօսութեան ճամբով, Սահմանադրութեան եւ օրէնքներու շրջանակին մէջ՝ առաջնորդուելով պետական ու ազգային շահերով:

Վահրամ Պաղտասարեան վերահաստատած է ՀՀԿ խմբակցութեան այն յայտարարութիւնը, որ չընդունելով հանդերձ Դեկտեմբերին արտահերթ խորհրդարանական ընտրութիւններ կազմակերպելուն շուրջ փաստարկները, Ազգային Ժողովի Հանրապետական խմբակցութիւնը մտադրութիւն չունէր եւ չունի վարչապետի թեկնածու առաջադրել: Միաժամանակ ան յայտնած է, որ քաղաքական ուժերը պէտք է պատշաճ ժամանակ ունենան արտահերթ խորհրդարանական ընտրութիւններուն նախապատրաստուելու համար:

Շարունակելով խորհրդակցութիւնները նախագահ Սարգսեանը «Ծառուկեան» խմբակցութեան անունով ընդունած է խմբակցութեան քարտուղար Վահէ Էնֆիաջեանը:

Հանդիպումին քննարկուած են երկրին մէջ ստեղծուած քաղաքական իրավիճակին վերաբերող հարցեր: Անդրադարձ կատարուած է արտահերթ խորհրդարանական ընտրութիւններուն:

«Ծառուկյան» խմբակցութեան քարտուղարը կարեւոր նկատած է «Բարգաւաճ Հայաստան» կուսակցութեան հետ ստորագրուած յուշագիրին մէջ ամրագրուած սկզբունքները եւ յայտնած, որ խմբակցութիւնը համոզուած է, որ բոլոր գործընթացները պէտք է ըլլան օրինականութեան շրջանակին մէջ, հաւասարակշիռ ու տրամաբանուած:

Share.

Leave A Reply

This site uses Akismet to reduce spam. Learn how your comment data is processed.