ՓԱՇԻՆԵԱՆՆ ՈՒ ԲԱԲԼՈՅԵԱՆԸ ՔՆՆԱՐԿԱԾ ԵՆ ԱՐՏԱԿԱՐԳ ԸՆՏՐՈՒԹԻՒՆՆԵՐՈՒՆ ԿԱԶՄԱԿԵՐՊՈՒՄԸ

0

10 Հոկտեմբերին տեղի ունեցած է Հայաստանի Հանրապետութեան Ազգային Ժողովի նախագահ Արա Բաբլոյեանի եւ վարչապետ Նիկոլ Փաշինեանի հերթական աշխատանքային հանդիպումը: Օրակարգային շարք մը հարցերուն կողքին խորհրդարանի ղեկավարն ու վարչապետը անդրադարձած են նաեւ արտակարգ խորհրդարանական ընտրութիւններու կազմակերպումին:

Կողմերը յատկապէս վերահաստատած են նախապէս հնչեցուցած իրենց այն դիրքորոշումը, որ բոլոր գործընթացները պէտք է ընթանան բանակցութիւններու եւ փոխհամաձայնութեան ճամբով:

Աշխատանքային հանդիպումի ընթացքին անդրադարձ կատարուած է նաեւ 29-30 Հոկտեմբերին Երեւանի մէջ տեղի ունենալիք Հաւաքական Անվտանգութեան Պայմանագիրի Կազմակերպութեան Խորհրդարանական Վեհաժողովի խորհուրդի եւ վեհաժողովի լիագումար նիստերու աշխատանքներուն կազմակերպման առնչուող հարցերուն:

Ազգային Ժողովի նախագահը վարչապետին տեղեկացուցած է, որ այդ նպատակով 12 Հոկտեմբերին հանդիպում պիտի ունենայ Ռուսիոյ Դաշնային ժողովի Պետական դումայի նախագահ Վիաչեսլաւ Վոլոտինի հետ: Վարչապետ Նիկոլ Փաշինեան վերահաստատած է, որ աշխուժօրէն պիտի մասնակցի ՀԱՊԿ ԽՎ խորհուրդի եւ վեհաժողովի երեւանեան լիագումար նիստերուն:

Share.

Leave A Reply

This site uses Akismet to reduce spam. Learn how your comment data is processed.