ԴԱՄԱՍԿՈՍԻ ՄԷՋ ՏԵՂԻ ՈՒՆԵՑԱՒ ԼԵՒՈՆ ԶԱՔԻ ԵՏԱԼԵԱՆԻ «ԳՈՐԾ ԵՒ ԳԱՆՁ» ԳԻՐՔԻՆ ՇՆՈՐՀԱՆԴԷՍԸ

0

Հովանաւորութեամբ Դամասկոսի Թեմի Առաջնորդ Գերշ. Տէր Արմաշ Եպս. Նալպանտեանի, Դամասկոսի Ս. Սարգիս եկեղեցւոյ սրահին մէջ, նախորդ շաբաթ տեղի ունեցաւ Լեւոն Զաքի Ետալեանի «Գործ եւ Գանձ» գիրքին շնորհանդէսը:

Բացման խօսքով Անի Աբրահամեան դիտել տուաւ, որ գիրքը հեղինակին փորձառութիւններուն մէկտեղումն է:

Սուրիոյ խորհրդարանի երեսփոխան եւ հայ-սուրիական խորհրդարանական բարեկամութեան միութեան նախագահ դոկտ. Նորա Արիսեան ներկայացուց գիրքին բովանդակութիւնը եւ անդրադարձաւ յօդուածներուն, որոնք լոյս տեսած են «Գանձասար» շաբաթաթերին մէջ 2006-էն 2018 թուականներուն:

Արիսեան յայտնեց, որ յօդուածները կ’արծարծեն տնտեսական ընդհանուր հարցեր  եւ կը ներկայացնեն Հայաստանի ու կարգ մը եւրոպական երկիրներու տնտեսութեան, Սուրիոյ տնտեսական իրավիճակին եւ Հայաստան-Սուրիա տնտեսական յարաբերութիւններուն առնչուող նիւթեր:

Այնուհետեւ  Լ. Զաքի տնտեսական ասպարէզին մէջ իր փորձառութեան մասին խօսելով յայտնեց, որ յօդուածները կը յարմարին բոլոր մասնագիտութիւններուն, իսկ գիրքին մէջ ներկայացուցած հարցերը օգտակար կը համարուին բոլոր գործարարներուն համար: Անդրադառնալով գիրքի խորագիրին, Զաքի յայտնեց, որ շատեր լաւ  կ’աշխատին, սակայն գանձին չեն տիրանար՝ չեն հարստանար, ոմանք ալ գանձը կը ժառանգեն առանց գործի ու կարճ ժամանակի մը մէջ զայն կը կորսնցնեն, ուրիշներ ե՛ւ արդիւնաւէտ աշխատանք, ե՛ւ գանձ  կ’ունենան, սակայն շրջան մը վերջ երկուքն ալ կը կորսնցնեն: «Այս բոլոր երեւոյթներուն տուն տուող պատճառներուն կրնաք ծանօթանալ գիրքը կարդալով», եզրափակեց Ետալեան:

Իր կարգին Դամասկոսի մէջ ՀՀ դեսպան փրոֆ. Արշակ Փօլատեան գիրքին կարեւորութեան անդրադառնալով ըսաւ, որ ան տնտեսութեան եւ առեւտուրի ոլորտներու մութ հարցերը կը պարզաբանէ:  Դեսպանը կարեւոր համարեց Զաքիի դերը Սուրիոյ տնտեսական կեանքին մէջ:

Տէր Արմաշ Նալպանտեան լուսարձակի տակ առաւ Լեւոն Զաքիի դերը՝ իր հիմնած տնտեսական հաստատութեան, Սուրիոյ կառավարական շրջանակներու հետ գործակցութեան եւ Հայաստան-Սուրիա տնտեսական յարաբերութիւններու ոլորտներէն ներս՝ յայտնելով, որ գիրքը Լեւոն Զաքիի վերոյիշեալ մարզերուն մէջ ձեռք բերած  փորձառութեան արգասիքն է:

Շնորհանդէսի ընթացքին ներկայացուեցաւ գեղարուեստական յայտագիր, ապա տեղի ունեցաւ գինեձօնի աւանդական  արարողութիւն: Աւարտին, գիրքէն հեղինակին կողմէ մակագրուած օրինակներ բաշխուեցաւ հրաւիրեալներուն:

«Ազդակ»ի արաբերէն կայքէջ

 

Share.

Leave A Reply

This site uses Akismet to reduce spam. Learn how your comment data is processed.