ՀՄԸՄ-Ի 100-ԱՄԵԱԿԻ ԱՌԻԹՈՎ ԳԾԱԳՐՈՒԹԵԱՆ ԵՒ ՇԱՐԱԴՐՈՒԹԵԱՆ ՄՐՑԱՇԱՐՔ

0

100 տարի շարունակ Հայ Մարմնակրթական Ընդհանուր Միութեան առաքելութիւնը եղած է պատրաստել չարքաշ, արի, մաքուր նկարագիրի, իմացական եւ հոգեկան բարձր արժանիքներու տէր Հայ պատանիներ եւ երիտասարդներ, ինչպէս նաեւ զօրացնել ու զարգացնել մանուկներուն երեւակայութիւնը եւ մտային կարողութիւնները։

Միութեանս 100-ամեակին առիթով, ՀՄԸՄ-ի Սուրիոյ Շրջանային Սկաուտ Խորհուրդը անցնող օրերուն կազմակերպեց գծագրութեան-շարադրութեան մրցաշարք, նպատակ ունենալով լուսարձակի տակ առնել Միութեան 100 ամեակը եւ յայտնաբերել անդամներուն ձիրքը:

Սուրիոյ երեք մասնաճիւղերու՝ Լաթաքիոյ, Քեսապի եւ Հալէպի գայլ-արծուիկները մեծ խանդավառութեամբ իրենց մասնակցութիւնը բերին սոյն մրցաշարքին։

Շրջանային Սկաուտ Խորհուրդը, առ ի գնահատանք մրցաշարքին մասնակցող քոյր-եղբայրներուն տրամադրեց հաստատագրեր, իսկ իւրաքանչիւր մասնաճիւղէն լաւագոյն գծագրութիւն եւ շարադրութիւն ներկայացնողները պարգեւատրեց «Հայաստանի Աշխարհագրութիւն» գիտելիքներու խաղով, նպատակ ունենալով խաղի միջոցով Հայաստանի աշխարհագրութիւնը ծանօթացնել անդամներուն:

Խորհուրդս Լաթաքիոյ եւ Քեսապի մասնաճիւղերու հաստատագրերն ու լաւագոյններուն նուէրները փոխանցեց շրջաններու մասնաճիւղերու Սկաուտ խորհուրդներուն, որպէսզի իրենց կարգին փոխանցեն մասնակիցներուն,ապա 9 Սեպտեմբեր 2018-ին Շրջանային Սկաուտ Խորհուրդը այցելեց Հալէպի Մասնաճիւղ եւ կիրակնօրեայ գործունէութեան ընթացքին բաժնեց սոյն հաստատագրերն ու նուէրները:

Գծագրութեան մրցաշարքին լաւագոյն հանդիսացան.

Լաթաքիոյ մասնաճիւղէն՝ քոյր Հուրիկ Սարգօ եւ քոյր Դալար Դուին Նազարեան,

Քեսապի մասնաճիւղէն՝ եղբ. Սերոբ Ղազարեան,

Հալէպի մասնաճիւղէն՝ եղբ. Զաւէն Ճուհարեան եւ եղբ. Կարօ Մավեան :

Շարադրութեան մրցաշարքին լաւագոյն հանդիսացան Հալէպի Մասնաճիւղէն՝ քոյր Լար Սիսեռեան եւ եղբ. Մայք Գեւոյեան

Ապրի՛ք, քոյրեր եւ եղբայրներ, ձեր գծագրութիւններով եւ շարադրութիւներով արտացոլաց հայ ժողովուրդի ազգային արժէքները եւ ՀՄԸՄ-ի գաղափարաբանութիւնը: Շարունակեցէ՛ք մնալ տաղանդաւոր եւ օտար բեմերու վրայ եւս բարձրացնելով հայուն անունը:

ՀՄԸՄ-ի Սուրիոյ Շրջ. Վարչութեան Մամուլի Յանձնախումբ

Share.

Leave A Reply

This site uses Akismet to reduce spam. Learn how your comment data is processed.