ԷՄԱՆՈՒԷԼ ՄԱՔՐՈՆ. «ՊԷՏՔ Է ՍՏԵՂԾԵԼ ԲՈԼՈՐԻՆ ՍԹԱՓՈՒԹԵԱՆ ՀՐԱՒԻՐԵԼՈՒ ԻՐԱՎԻՃԱԿ»

0

Ֆրանսայի նախագահ Էմանուէլ Մաքրոն ելոյթ ունեցած է Երեւանի մէջ մեկնարկած Ֆրանսախօս Երկիրներու Միջազգային Կազմակերպութեան 17-րդ վեհաժողովի բացման արարողութեան:
Ֆրանսայի նախագահը իր ելոյթին մէջ անդրադարձած է Շառլ Ազնաւուրին՝ ընդգծելով, որ ան Հայաստանի, Ֆրանսայի, Ֆրանսախօս Երկիրներու խորհրդանիշն է: «Ան երգի հսկայ տաղանդ էր, որ կ’երգէր մեր երջանկութեան, դժբախտութիւններուն, կեանքի նկատմամբ մեր թեթեւ մօտեցումներուն մասին: Ան կ’երգէր յատուկ թախիծով մը, որ իւրայատուկ է պանդխտութեան մեջ ապրող մարդոց: Մենք բոլորս գիտենք, որ ան հայ է, կ’երգէր եւ կը պահպանէր հայկականութիւնը, կը խրախուսէր քաջութիւնը: Բոլորովին ճանչնալով այն մեծ յանցագործութիւնը՝ Ցեղասպանութիւնը, որուն զոհն էր նաեւ ինքը, ես կը փափաքիմ հնչեցնել այդ մեծ մարդուն անունը՝ Շառլ Ազնաւուր», ընդգծած է Մաքրոն:
Խօսելով Ֆրանսախօս Երկիրներու վեհաժողովին մասին՝ Ֆրանսայի նախագահը շեշտած է, որ Երեւանի մէջ այսօր մեծ ընտանիք մը հաւաքուած է, ընտանիք, որ կը ներառէ բոլոր մայր ցամաքամասերը: «Մենք բոլորս կը պատկանինք այդ ընտանիքին եւ չունինք մաշկի նոյն գոյնը, մեր աստուածները չեն կրեր նոյն անունները, ոմանք նաեւ Աստուծոյ չեն հաւատար: Մենք կ’ապրինք շատ տարբեր կլիմայական պայմաններու մէջ, մեր երգերը իրար չեն նմանիր: Մենք ունեցած ենք նաեւ վէրքեր, որոնք նոր կը սկսին սպիանալ: Այնուամենայնիւ, այս բազմազան ընտանիքը միասնական է՝ համախմբուած լեզուի մը շուրջ: Այս լեզուն մենք կ’ընկալենք եւ կ’արտայայտենք բազմազանութեամբ, սակայն բոլորս իրար կը հասկանենք: Այս լեզուն չի պատկանիր ոեւէ մէկուն, ան բոլորինն է: Այս լեզուն կրցած է ընդունիլ բոլորին միտքերը: Մեր կապը կ’արտայայտուի ոչ միայն այս լեզուին միջոցով, այլ աշխարհին ուղղուած մեր տեսլականով: Մեր տեսլականը պարբերաբար կը վերաիմաստաւորուի եւ կը թարմացուի: Եղբայրութիւնը, խաղաղութիւնը արդարութիւնը կը կազմեն մեր կազմակերպութեան հիմնաքարերը», ըսած է Մաքրոն:
Ֆրանսայի նախագահին խօսքով՝ աշխարհը այսօր լեցուն է սուտով, ատելութեան քարոզչութեամբ, այն կանոնները, որոնց շուրջ վերջին տասնամեակներուն կրցած են համախմբուիլ, այլեւս չեն գործեր. «Ի՞նչ կրնայ ընել Ֆրանսախօս Երկիրներու Միջազգային Կազմակերպութիւնը այս իրադարձութիւններուն ընթացքին: Այն ինչ որ մենք պէտք է ընենք, հետեւեալն է՝ ստեղծել բոլորին սթափութեան հրաւիրելու իրավիճակ: Մեր այս կազմակերպութիւնը պէտք է ըլլայ այն հարթակը, ուր կ’արտայայտուի համախմբուած սթափութիւնը»:

Share.

Leave A Reply

This site uses Akismet to reduce spam. Learn how your comment data is processed.