ԽՄԲԱԳՐԱԿԱՆ՝ ՆՈՅԵՄԲԵՐ Ա./2018. ՈՒԺԵՂ ԸՆԴԴԻՄՈՒԹԻՒՆԸ ԱԶԳԱՅԻՆ ՇԱՀԵՐՈՒ ՊԱՀՊԱՆՄԱՆ ԱԶԴԱԿ

0

Վերջին շրջանին Հայաստանի մէջ տեղի ունեցած իշխանափոխութեան հետեւանքով արտաքին ուժերու ազդեցութեան նիւթը յաճախ օրակարգի վրայ կը բերուի քաղաքական վերլուծաբաններու կողմէ:

Իշխանափոխութենէն օգտուելու արտաքին ուժերու նկրտումները ակնյայտ են: ԱՄՆ իր շահերու հետապնդման համար նախագծած է արդէն տարածաշրջանին մէջ իր ազդեցութեան գօտիներն ու լծակները՝ Ռուսիոյ հակազդող ուժ դառնալու, Կասպից ծովու կազէն օգտուելու եւ Իրանը մեկուսացնելու իր ծրագիրներուն ի խնդիր: Փոխարէնը Հայաստանը աւելի ժողովրդավար դարձնելու եւ մեր երկրին տնտեսական, ռազմական օժանդակութիւններ ընծայելու առաջադրանքը առաջ կը մղէ: Միւս կողմէ, սակայն, Միացեալ Նահանգներու նախագահի ազգային անվտանգութեան հարցերով խորհրդական Ճոն Պոլթըն Հայաստան կատարած իր այցելութեան առիթով կ՛անդրադառնայ ղարաբաղեան հարցին ու վերյիշել կու տայ, թէ կողմերը, իմա՝ Հայաստան, Արցախ եւ Ատրպէյճան, պէտք է աշխատին իրարու հետ եւ ի վերջոյ անոնք պէտք է կարենան գտնել լուծումը: Շաբաթ մը առաջ Հայաստանի մօտ ԱՄՆ-ի պաշտօնաւարտ դեսպան Ռիչըրտ Միլզ խաղաղութեան նախապայմանը «գրաւեալ հողեր»ու  Ատրպէյճանի վերադարձը կը համարէր։

Նոյն օրերուն, Ռուսիոյ Արտաքին Գործոց Նախարարութեան ներկայացուցիչ Մարիա Զախարովա, մեկնաբանելով Միացեալ Նահանգներու նախագահի ազգային անվտանգութեան հարցերով խորհրդական Ճոն Պոլթընի Երեւանի եւ Պաքուի մէջ կատարած յայտարարութիւնը, թէ Միացեալ Նահանգներ հանդէս կու գայ տագնապի խաղաղ լուծման կարգաւորման օգտին, կը յայտնէր, որ «Տագնապի խաղաղ լուծումը այն է, որ կը բխի բոլոր մասնակիցներուն` ԵԱՀԿ-ի Մինսքի խմբակին եւ կողմերուն շահերէն: Մենք միշտ հաւատարիմ եղած ենք անոր, այդ եղած է հիմնական նպատակը»:

Յստակ է, որ երկու մրցակից պետութիւններուն համար հիմնականը տարածաշրջանի խաղաղութեան ամրագրումն ու իրենց շահերուն պահպանումն է: Այս տուեալներուն լոյսին տակ, սակայն, հայկական կողմին շահերը, յատկապէս Արցախեան հիմնահարցի լուծման եւ Հայաստան-Թուրքիա յարաբերութիւններու թնճուկին մէջ, կողմերու քաղաքական հաշիւներուն ու բախումներուն ենթակայ դառնալով վտանգուելու մեծ հաւանականութիւնը ունի:

Վարչապետի պաշտօնակատար Ն. Փաշինեան յստակօրէն կը յայտնէր, թէ արցախեան հարցին լուծումը ե՛ւ Հայաստանի, ե՛ւ Արցախի, ե՛ւ Սփիւռքի հայութեան համախոհութեամբ կը պայմանաւորուի:

Հայաստանի նման փոքր երկիր մը, ունենալով տարածաշրջանի խաղաղութիւնը երաշխաւորող աշխարհագրական կարեւոր դիրք, Սփիւռքի ազդեցիկ գործօն, անհրաժեշտ է որ ունենայ նաեւ քաղաքական ներքին այնպիսի հարթակ մը, որ ամրագրուած ըլլայ ուժեղ ընդդիմութեան ազդեցիկ ներկայութեամբ: Ուժեղ ընդդիմութիւնն է նաեւ, որ պիտի նպաստէ իշխանութիւններուն՝ ժողովրդային զանգուածին մէջ այլ կարծիք հասունցնելով, երկրին ու ժողովուրդին ազգային շահերուն ուղեցոյցը պահպանելով, արտաքին ազդեցութիւններուն դէմ երկրի ղեկավարներուն քաղաքական դաշտի զսպանակիչ ուժը դառնալով:

Share.

Leave A Reply

This site uses Akismet to reduce spam. Learn how your comment data is processed.