ԱՄԵՆԱՅՆ ՀԱՅՈՑ ԿԱԹՈՂԻԿՈՍԸ ԻՐ ԳՈՀՈՒՆԱԿՈՒԹԻՒՆԸ ՅԱՅՏՆԱԾ Է ԴԱՇՆԱԿՑՈՒԹԵԱՆ ԿԵՑՈՒԱԾՔԻՆ ՀԱՄԱՐ

0

3 Նոյեմբերին ՆՍՕՏՏ Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնի մէջ ընդունեց Հայ Յեղափոխական Դաշնակցութիւն կուսակցութեան պատուիրակութիւնը` գլխաւորութեամբ ՀՅԴ Բիւրոյի ներկայացուցիչ Հրանդ Մարգարեանի:

 

Հանդիպումին անդրադարձ կատարուեցաւ հայրենի պետութեան առջեւ ծառացած մարտահրաւէրներուն, ազգային-եկեղեցական կեանքը յուզող հարցերուն, ազգային ինքնութեան եւ արժեհամակարգի պահպանութեան ուղղուած քայլերուն:  Խօսուեցաւ նաեւ ժողովուրդի կեանքին մէջ Եկեղեցւոյ առաքելութիւնը աւելի աշխուժացնելու ուղղուած ծրագիրներուն եւ ձեռնարկներուն մասին:

 

Յատկապէս անդրադառնալով վերջին շրջանին Հայոց Եկեղեցւոյ դէմ տեղ գտնող յարձակումներուն` Հրանդ Մարգարեան այս առնչութեամբ վերահաստատեց կուսակցութեան դիրքորոշումը` ամբողջական զօրակցութիւն յայտնելով Մայր Աթոռ Սուրբ Էջմիածնին եւ Ամենայն Հայոց Հայրապետին:

 

Վերջինս ընդգծեց, որ կուսակցութիւնը, գիտակից է Հայ Եկեղեցւոյ ազգապահպան եւ հոգեւոր առաքելութեան կարեւորութեան, պիտի շարունակէ զօրաւիգ եւ նեցուկ դառնալ անոր:

 

Իր հայրական օրհնութիւնը բերելով հայորդիներուն` Ամենայն Հայոց Կաթողիկոսը գոհունակութեամբ անդրադարձաւ կուսակցութեան կեցուածքին` գնահատելով դրսեւորած ոգին եւ գիտակցութիւնը: Վեհափառ Հայրապետը արձանագրեց, որ ժողովուրդի զօրակցութիւնը եւ նախանձախնդրութիւնը Մայր Եկեղեցւոյ եւ իրենց սրբազան հաւատքի հանդէպ արտայայտութիւնն են այն իրողութեան, որ Հայոց Եկեղեցին մեր ազգի ինքութեան եւ գոյութեան հիմնական երաշխաւորներէն է:

 

Նորին Սրբութիւնը հաստատեց, որ հակառակ բոլոր դժուարութիւններուն Եկեղեցին եւ հոգեւոր դասը անշեղօրէն պիտի շարունակեն իրենց փրկչական եւ  ազգապահպան առաքելութիւնը` ի նպաստ հայոց կեանքի պայծառութեան եւ բարօրութեան:

 

Նորին Սրբութիւնը խօսեցաւ նաեւ ժողովուրդի եւ Եկեղեցւոյ առջեւ ծառացած մարտահրաւէրներու մասին` շեշտելով, որ ազգի հոգեւոր զօրութեամբ եւ միասնականութեամբ դարերու ընթացքին յաղթահարուած են բոլոր դժուարութիւնները եւ արձանագրուած յաղթանակները:  Հայոց Հայրապետին խօսքով` այսօր եւս, դժուարութիւններու եւ փորձութիւններու դիմակայման ճանապարհին, մեր ազգը պէտք է հետեւողը դառնայ նախնեաց որդեգրած այս կեցուածքին եւ փորձառութեան:

 

 

 

Share.

Leave A Reply

This site uses Akismet to reduce spam. Learn how your comment data is processed.