ՀԱՅԱՍՏԱՆԻ ԵՒ ԼԻԲԱՆԱՆԻ ՄԻՋԵՒ ՌԱԶՄԱԿԱՆ ՀԱՄԱՁԱՅՆԱԳԻՐԻ ՍՏՈՐԱԳՐՈՒՄԸ ԱՇԽՈՅԺ ՀԱՄԱԳՈՐԾԱԿՑՈՒԹԵԱՆ ԱՐԴԻՒՆՔ Է

0

Հայաստանի եւ Լիբանանի միջեւ աշխոյժ համագործակցութիւնը  շօշափելի արդիւնք կ՛արձանագրէ: 2 Նոյեմբերին, Հայաստանի Հանրապետութեան պաշտպանութեան նախարար Դաւիթ Տօնոյեանի Լիբանան կատարած այցելութեան շրջագիծէն ներս երկու երկիրներուն միջեւ «Ռազմական համագործակցութեան մասին» համաձայնագիր ստորագրուած է: Հայաստանի եւ Լիբանանի պաշտպանութեան նախարարները քննարկած են համագործակցութեան համատեղ ծրագիրներ, ինչպէս նաեւ տարածաշրջանային եւ միջազգային անվտանգութեան առնչուող հարցեր։ Դաւիթ Տօնոյեանի գլխաւորած պատուիրակութիւնը այցելած է նաեւ Լիբանանի տարածքին ՄԱԿ-ի ԻւՆԻՖԻԼ խաղաղապահ առաքելութեան մէջ ներգրաւուած հայկական միաւորի տեղակայման վայր:

Հայաստանի եւ Լիբանանի միջեւ ստորագրուած «Ռազմական համագործակցութեան մասին» համաձայնագիրը, ըստ էութեան, պիտի համալրէ 2001-ին երկու երկիրներու միջեւ կնքուած «Ռազմական եւ ռազմաթեքնիքական համագործակցութեան մասին» համաձայնագիրը: Ընդ որուն, կարեւոր է ոչ միայն վերոնշեալ համաձայնագիրին ստորագրումը, այլեւ կողմերու պատրաստակամութիւնը՝ ռազմական եւ ռազմաթեքնիքական ոլորտներու մէջ համագործակցութեան կարելիութիւնները զարգացնելու եւ լիարժէք կեանքի կոչելու առումով: Այս տեսանկիւնէն կարեւոր է Լիբանանի պաշտպանութեան նախարարի յայտարարութիւնը այն մասին, որ կողմերը մտադիր են «ստեղծել յանձնաժողով մը, որ պիտի զբաղի երկու երկիրներու միջեւ ռազմական համագործակցութեան ընդլայնումով»: Երկու երկիրներու պաշտպանութեան նախարարները նաեւ յոյս յայտնած են, որ այս համաձայնագիրը ճամբայ կը հարթէ նաեւ այլ ոլորտներու մէջ համագործակցութեան ընդլայնումին համար:

Յատկանշական է, որ վերջին շրջանին Հայաստան-Լիբանան երկխօսութիւնը բաւական աշխոյժ ձեւով կ’ընթանայ: Հոկտեմբերի վերջաւորութեան, Պէյրութի մէջ տեղի ունեցաւ Հայաստանի եւ Լիբանանի ղեկավարներու երրորդ հանդիպումը: Հայստանի Հանրապետութեան վարչապետ Նիկոլ Փաշինեանն ու Լիբանանի նախագահ Միշէլ Աունը հանդիպած էին Սեպտեմբերի աւարտին Նիւ Եորքի մէջ ՄԱԿ Գլխաւոր համաժողովի 73-րդ նստաշրջանի շրջագիծէն ներս եւ միտքեր փոխանակած Հայաստանի եւ Լիբանանի միջեւ բազմաբնոյթ յարաբերութիւններու շուրջ: Հայ եւ լիբանանցի ղեկավարներու յաջորդ հանդիպումը տեղի ունեցած էր Երեւանի մէջ Ֆրանսախօս Երկիրներու վեհաժողովին ընթացքին: Երկխօսութիւնը շարունակուած է Պէյրութի մէջ Միշէլ Աունի, ինչպէս նաեւ Լիբանանի վարչապետի պաշտօնակատար Սաատ Հարիրիի եւ Լիբանանի խորհրդարանի նախագահ Նապիհ Պըրիի հետ Նիկոլ Փաշինեանի հանդիպումներու շրջագիծէն ներս:

Վերոնշեալ հանդիպումներուն ընթացքին երկուստեք պատրաստակամութիւն յայտնուած է երկու  երկիրներու միջեւ տնտեսական յարաբերութիւնները եւ պաշտպանութեան բնագաւառին մէջ հայ-լիբանանեան համագործակցութիւնը բարձրացնելու քաղաքական յարաբերութիւններու մակարդակին: Այս տեսանկիւնէն ռազմական եւ ռազմաթեքնիքական ոլորտները առանձնայատուկ նշանակութիւն ունին եւ բաւական հեռանկարային կը համարուին: Այս առաջնահերթութիւններէն մեկնելով՝ Հայաստանի Հանրապետութեան կառավարութիւնը վերջերս հաստատեց Լիբանանի մէջ Հայաստանի Հանրապետութեան ռազմական կցորդ նշանակելու Պաշտպանութեան Նախարարութեան առաջարկը՝ նպատակ ունենալով նոր խթան հաղորդել պաշտպանութեան բնագաւառին մէջ երկկողմանի համագործակցութեան զարգացումին:

Յայտնենք, որ Լիբանանի հետ սերտ յարաբերութիւնները կարեւոր կը համարուին ոչ միայն երկկողմանի համագործակցութեան, այլ նաեւ մերձաւոր արեւելեան տարածաշրջանի հետ Հայաստանի յարաբերութիւններու տեսանկիւնէն: Տարածաշրջանին մէջ շարունակուող լարուածութեան ծիրին մէջ համեմատաբար կայուն Լիբանանի հետ փոխգործակցութեան խորացումը կարեւոր է Հայաստանի Հանրապետութեան արտաքին քաղաքականութեան մերձաւոր արեւելեան ազդակի աշխոյժացման տեսանկիւնէն:

Լիբանանի հետ Ռազմական համաձայնագիրի կնքումը յստակ ապացոյց է, որ ներկայ փուլին մէջ Մերձաւոր Արեւելքի հետ յարաբերութիւններուն նոր որակ հաղորդելու համար առկայ են բաւական նպաստաւոր պայմաններ, ինչ որ համաձայնուած է մերձաւոր արեւելեան տարածաշրջանին մէջ ընթացող ներկայ գործընթացներով, ինչպէս նաեւ Հայաստանի մէջ արձանագրուած ներքին զարգացումներով: Մերձաւոր Արեւելքի երկիրներէն իւրաքանչիւրին համար առանձին մօտեցումի մշակման եւ հետեւողական աշխատանքի պարագային այս ուղղութեամբ քայլերը կրնան փափաքելի արդիւնքներ ապահովել:

 

 

Share.

Leave A Reply

This site uses Akismet to reduce spam. Learn how your comment data is processed.