ՃԱԱՖԱՐԻ. «ՍՈՒՐԻԱ ՊԻՏԻ ՇԱՐՈՒՆԱԿԷ ԱՀԱԲԵԿՉՈՒԹԵԱՆ ԴԷՄ ԻՐ ՊԱՏԵՐԱԶՄԸ ԵՒ ՈՉ ՄԷԿ  ՍՊԱՌՆԱԼԻՔԻ ԴԻՄԱՑ ՊԻՏԻ ԸՆԿՐԿԻ »

0

Երկուշաբթի, 5 Նոյեմբեր 2018-ին, ՄԱԿ-ի մօտ Սուրիոյ մնայուն բանագնաց դոկտ. Պաշշար ալ Ճաաֆարի ՄԱԿ-ի անվտանգութեան խորհուրդի Միջին Արեւելքի իրավիճակին առնչուող նիստին հաստատեց, որ Սուրիա պիտի շարունակէ ահաբեկչութեան դէմ իր պատերազմը եւ ոչ մէկ քաղաքական կամ տեղեկատուական ապառնալիքի ազդեցութեան տակ պիտի ընկրկի:

Ճաաֆարի  ըսաւ. «Սուրիա քիմիական զէնքերու կանխարգիլման համաձայնութեան մաս կազմած օրէն կը կատարէ այս ուղղութեամբ իր բոլոր պարտաւորութիւնները՝ Անվտանգութեան Խորհուրդի  /2118/ թուակիր որոշումին լոյսին տակ: Եւ հակառակ անոր, որ Սուրիա ապահովական բարդ կացութեան մէջ յայտնուած է, բազում մարտահրաւէրներ կը դիմագրաւէ, նախանձախնդիր համագործակցութեամբ եւ դրական թափանցիկ մօտեցումով կը շարունակէ գործակցիլ քիմիական զէնքերու կանխարգիլման կազմակերպութեան հետ: Փաստօրէն Սուրիա կարճ ժամանակամիջոցի մը մէջ, վերջնականապէս ոչնչացուց քիմիական իր զէնքերը՝ յարգելով իր խոստումը»:

Ճաաֆարի դիտել տուաւ, որ Սուրիոյ մէջ քիմիական զէնքերու օգտագործման շուրջ հետազօտութիւն կատարող պատուիրակութիւնը արհեստավարժօրէն ու անկողմնակալ  մօտեցումով չկատարեց իր պարտաւորութիւնը: Աւելին. ան յաճախ առարկայական ու փաստացի տուեալներէ զուրկ զեկոյցներ ներկայացուց ՄԱԿ-ին:

Եզրափակելով Ճաաֆարի ըսաւ, որ Սուրիա մշտապէս դատապարտած է քիմիական կամ զանգուածային ոչնչացման զէնքերու օգտագործումը, որովհետեւ անոնց գործածութիւնը մարդկութեան դէմ ոճիր կը համարուի:

 

Share.

Leave A Reply

This site uses Akismet to reduce spam. Learn how your comment data is processed.