ԱՐԽԻՒԱՅԻՆ ՑՈՒՑԱՀԱՆԴԷՍ ՆՈՒԻՐՈՒԱԾ ՀՄԸՄ-Ի 100-ԱՄԵԱԿԻՆ

0

Հովանաւորութեամբ Բերիոյ Հայոց Թեմի Բարեջան Առաջնորդ Գերշ. Տ. Շահան Ս. Արք. Սարգիսեանի, նախաձեռնութեամբ ՀՄԸՄ-ի Սուրիոյ Շրջ. Վարչութեան, կազմակերպութեամբ ՀՄԸՄ-ի Ս. Շրջ. 100-ամեակի  Յանձնախումբին, Կիրակի, 28 Հոկտեմբեր 2018-ի երեկոյեան ժամը 6:00-ին, Ա. Մանուկեան Ժողովրդային Տան «Լեւոն Շանթ» սրահէն ներս տեղի ունեցաւ Միութեան 100-ամեակին նուիրուած արխիւային ցուցահանդէսը։

Բացման հանդիսութեան ներկայ էին Բերիոյ Հայոց Թեմի Առաջնորդ Գերշ. Տ. Շահան Ս. Արք. Սարգիսեան, Սուրիոյ Հայ Աւետարանական Համայնքի Համայնքապետ Վերապատուելի Յարութիւն Սելիմեան, ՀՀ Հալէպի Գլխաւոր Հիւպատոս Արմէն Սարգսեան, ՀՄԸՄ-ի հոգեւոր հովիւ Արժ. Տ. Տաթեւ Ա. Քհնյ. Միքայէլեան, Ազգ. Երեսփոխանական Ժողովի անդամներ, Սուրիոյ խորհրդարանի երեսփոխան Ժիրայր Րէիսեան, Ազգ. Իշխանութեան, հալէպահայ միութիւններու, կրթական հաստատութիւններու ներկայացուցիչներ, ՀՄԸՄ-ի Սուրիոյ Շրջ. Վարչութեան անդամներ, ՀՄԸՄ-ականներ եւ հոծ բազմութիւն։

Պաշտօնական բացումէն ետք, հրաւիրեալները շրջեցան սրահէն ներս եւ մեծ հետաքրքրութեամբ դիտեցին Միութեան 100-ամեայ սկաուտական եւ մարզական պատմութիւնը ամփոփող նկարներ, անդամաքարտեր, յայտագիրներ, զատկուան շնորհաւորական քարտեր, վկայագրեր, շքանշաններ, յաղթանակի բաժակներ, դրօշներ, սկաուտական տարազներ, յուշանուէրներ, փողային եւ հարուածային գործիքներ, մարզական եւ ՀՄԸՄ-ականներու անհատական գոյքեր, հրատարակութիւններ, միութեան գրամեքենան, տպագրական կաղապարներ եւ շատ մը հետաքրքրաշարժ իրեր։

Սրահին ուշագրաւ բաժինը «Ծառայութեան Շքանշանակիրներու Ծառ»ն էր, որուն վրայ, շքանշանի նմանակով զետեղուած էին անունները բոլոր անոնց, որոնք պատիւը ունեցած են ստանալու վերոյիշեալ շքանշանը առ ի գնահատանք ՀՄԸՄ-ի մէջ իրենց ունեցած տարիներու ծառայութեան։

Օրուան հանդիսավարն էր ՀՄԸՄ-ի Հալէպի Մասնաճիւղի խմբապետ եղբ. Յովիկ Փամբալեան: Ան ներկաներուն բարի գալուստ մաղթելէ ետք, հրաւիրեց 100-ամեակի յանձնախումբի ատենապետ եղբ. Կարպիս Թովմասեանը, որ հակիրճ ձեւով ներկայացուց 100-ամեայ ՀՄԸՄ-ի դերը սերունդներու հայեցի դաստիարակութեան մէջ։ Ապա անդրադարձաւ ցուցահանդէսի կարեւորութեան, որովհետեւ ան կը ցոլացնէ Միութեան հարիւրամեայ անխոնջ աշխատանքն ու նուաճած պատուաբեր արդիւնքները՝ միութեան դրօշը փոխանցելով յաջորդող սերունդներուն, որպէսզի հիմնադիր սերունդի ուղիով քալեն ու անցեալի փառքին վրայ աւելցնեն նորանոր յաջողութիւններ։

Այնուհետեւ սրբազան հայրը իր եզրափակիչ խօսքով բարձրօրէն գնահատեց ՀՄԸՄ-ի հիմնադրութեան 100-ամեակին առիթով կատարուած բոլոր նախաձեռնութիւնները, որոնք մէկը միւսը գերազանցեցին։ Ան անդրադարձաւ Միութեան դերին եւ անոր անկիւնադարձային կարեւորութեան՝ կերտելու այն հայը, որ նուիրումով կը ծառայէ իր ազգին, եկեղեցւոյ եւ հայրենիքին։ Սրբազան հայրը բարի երթ մաղթեց ՀՄԸՄ-ին, դէպի նոր հարիւրամեակներ։

Ցուցահանդէսը մէկ շաբթուան տեւողութեան առիթ ընծայեց հալէպահայութեան մօտէն տեսնելու ՀՄԸՄ-ի կերտած պատմական յաղթանակներն ու ՀՄԸՄ-ի Սուրիոյ շրջանի անցած պատուաբեր ճանապարհը:

Ուրբաթ, 2 Նոյեմբեր 2018-ին, ՀՄԸՄ-ի մեծ ընտանիքը Հալէպի մայր գաղութին մէջ պատիւը ունեցաւ հիւրընկալելու ՀՄԸՄ-ի Կեդրոնական Վարչութեան ատենապետ եղբ. ԳառնիկՄկրտիչեանը: Նոյն օրը երեկոյեան ժամը 6:00-ին, «Լեւոն Շանթ» սրահէն ներս կրկին բացումը կատարուեցաւ Սուրիոյ Շրջանային Վարչութեան կազմակերպած արխիւային ցուցահանդէսին, ձեռամբ՝ ՀՄԸՄ-ի հոգեւոր հովիւ Արժ. Տ. Տաթեւ Ա. Քհնյ. Միքայէլեանի, ՀՄԸՄ-ի Կեդրոնական Վարչութեան ատենապետ եղբ. Գառնիկ Մկրտիչեանի, Պատկան Մարմինի ներկայացուցիչին, ՀՄԸՄ-ի Սուրիոյ Շրջ. Վարչութեան եւ 100-ամեակի յանձնախումբին, ներկայութեամբ ՀՄԸՄ-ականներու հոծ բազմութեան:

ՀՄԸՄ-ի Սուրիոյ Շրջ. Վարչութեան ատենապետ եղբ. Մանուկ Քէօշկերեան բացման իր խօսքին մէջ անդրադարձաւ ՀՄԸՄ-ի դերին՝ հիմնադրութեան օրերէն սկսեալ, երբ 1918-ին ՀՄԸՄ-ի հիմնադրութեամբ թուրքի եաթաղանէն փրկուած մատղաշ սերունդը վերակազմակերպուեցաւ ֆիզիքական եւ բարոյական դաստիարակութեամբ։ ՀՄԸՄ-ը 100 տարի առանց ընդմիջումի, նուիրումով գործեց եւ կը շարունակէ գործել Հայրենիքի եւ Սփիւռքի մէջ։ Ան յարգանքի տուրք մատուցեց բոլոր նուիրեալներուն, որոնք անսակարկ կ՚աշխատին նոր սերունդին միտքն ու մարմինը մարզելու համար։

ՀՄԸՄ-ի Կեդրոնական Վարչութեան ատենապետ եղբ. Գառնիկ Մկրտիչեան խօսք առնելով բարձրօրէն գնահատեց Միութեան 100-ամեակին առիթով բծախնդրութեամբ կազմակերպուած ցուցահանդէսը, յայտնելով, որ Հալէպը պատերազմական ծանր տարիներ դիմագրաւելով հանդերձ  կը մնայ պատնէշի վրայ, կ՛իրագործէ Միութեան պատմութիւնը անմահացնող բովանդակալից ցուցահանդէս, այնպիսի մանրամասնութեամբ, որ ուրիշ գաղութի մէջ անկարելի է տեսնել:

Ան փափաք յայտնեց, որ այս արխիւները ցուցադրուին Հայաստանի մէջ եւս, Կեդրոնական ձեռնարկներու շարքին։ Եղբ. Գառնիկ Հալէպը անուանեց Սփիւռքի բաբախող սիրտը։ Ի վերջոյ ան մաղթեց իւրաքանչիւր հայու փափաքը իրագործուած տեսնել «Ազատ, Անկախ եւ Միացեալ Հայաստան»ի, նաեւ եռագոյնն ու ՀՄԸՄ-ի դրօշը ծածանած տեսնել Արարատի գագաթին՝ սահմանին միւս կողմէն։

ՀՄԸՄ-ի Հոգեւոր Հովիւ Արժ. Տ. Տաթեւ Ա. Քհնյ.Միքայէլեան իր սրտի խօսքին մէջ յիշեց, որ ՀՄԸՄ-ը եղած է մարդակերտումի դպրոց: Ան դիտել տուաւ, որ ո՛չ մէկ միութիւն ունի այսքան մեծ թիւով մասնաճիւղեր եւ անդամներ։ Քահանայ հայրը Հալէպէն գաղթած աշխարհացրիւ ՀՄԸՄ-ականներուն դերը բարձրօրէն գնահատեց, նոր մասնաճիւղեր հիմնելու, ճոխացնելու եւ զարգացնելու իմաստով։ Ան բարի երթ մաղթեց միութեան՝ դէպի երկրորդ հարիւրամեակ։

ՀՄԸՄ-ի Սուրիոյ Շրջ. Վարչութեան

Մամուլի Յանձնախումբ

 

Share.

Leave A Reply

This site uses Akismet to reduce spam. Learn how your comment data is processed.