ՄԱՐԶԱԿԱՆ՝ ՆՈՅԵՄԲԵՐ Բ./2018

0

Սուրիոյ Պասքէթի Պատանեկան Հաւաքականը Երրորդ Հանդիսացաւ

Հնդկաստանի մէջ տեղի ունեցած  Ասիոյ Երրորդութեան Բ. դասակարգի հաւաքականներու մրցումներու աւարտին, Սուրիոյ պասքէթի աղջկանց պատանեկան խումբը գրաւեց երրորդ դիրքը: Սուրիացի աղջիկները յաջողեցան մրցաշարքի առաջին փուլի մրցումները յաղթական աւարտել ՝ Խազախիստանը 56 / 40, Հոնք Քոնկը 66 / 47, Սոմուայը 44 / 37 արդիւնքով պարտութեան մատնելով: Երկրորդ կիսախաղին Սուրիա դարձեալ Խազախիստանը մրցակից ունեցաւ: Մրցումի իրաւարարներուն սուլիչները անարդար եղան Սուրիոյ հաւաքականին նկատմամբ. կազմը զրկուեցաւ աւարտական մրցումի մասնակցելու պատիւէն՝ 76 – 56 արդիւնքով պարտութեան մատնուելով: Երրորդութեան դիրքի մրցումին հաւաքականը 75 – 68 արդիւնքով դարձեալ կրցաւ պարտութեան մատնել Հոնք Քոնկը եւ գրաւել Ասիոյ Բ. դասակարգի հաւաքականներու երրորդ դիրքը: Աւելցնենք, որ Սուրիոյ հաւաքականին մաս կազմեց ՀԵԸ-ի պասքէթի աղջկանց խումբի խաղցող Աննա Ասլանեան, որ ներկայացաւ բարձր մակարդակի խաղարկութեամբ, եւ արժանացաւ կազմակերպիչ մարմինին գնահատանքին:

 ՀՄԸՄ Անթիլիասի Պասքեթի Աղջկանց Խումբը Արաբական Աշխարհի Ախոյեան

Հերթական երկրորդ անգամ ըլլալով Լիբանանի ՀՄԸՄ- Անթիլիասի պասքեթի աղջկանց խումբը յաջողեցաւ ձեռք ձգել արաբական ակումբներու ախոյեանութիւնը: Աղեքսանդրիոյ (Եգիպտոս) մէջ տեղի ունեցած մրցաշարքին, Լիբանանի կազմը ներկայացաւ բարձր մակարդակի խաղարկութեամբ եւ կրցաւ յաղթական աւարտել իր բոլոր մրցումները, հասնիլ աւարտականին, ուր մրցակից ունեցաւ հիւրըկալ երկիրին Ալ-Ահլի կազմը: Մրցումի տեւողութեան, ՀՄԸՄ-ականները տիրապետեցին խաղարկութեան եւ արդիւնքին, անոնք ցնցեցին մրցակիցին կողովը դաշտը տարբեր անկիւններէ: Հանդիպումը իր աւարտին հասաւ 83 – 57 արդիւնքով:

Մրցումին ներկայ էին մեծաթիւ եգիպտահայեր: Աւարտին, Արաբական Պասքեթպոլի Դաշնակցութեան նախագահ Իսմայիլ Քըրքաուի տիտղոսը յանձնեց ՀՄԸՄ-ի խմբապետ Մեղրի Թորոսեանին, իսկ Ռեպեքա Աքըլ ընտրուեցաւ մրցաշարքի լաւագոյն մարզիկը:

Համաշխարհային Ֆութպոլի Մրցումներու Հաւաքականներուն Թիւը Բարձրացնելու Սերտողութիւն Կը Կատարուի

«Ռոյթըրզ» տեղեկացուց, որ ՖԻՖԱ-ի նախագահ Ճիանի Ինֆանթինօ Ասիոյ Ֆութպոլի Դաշնակցութեան ընդհանուր համագումարին ընթացքին յայտարարեց, թէ Քաթարի մէջ տեղի ունենալիք 2022-ի համաշխարհային մրցումներու մասնակցող հաւաքականներուն թիւը 48-ի բարձրացնելու ծրագիրը սերտողութեան մէջ է: Ճիաննի յայտնեց, որ սոյն միտքը պիտի իրագործուէր 2026-ի մրցաշարքին, սակայն կարելութիւն կայ այդ մէկը իրականացնել 2022-ին: Այս տարբերակը տակաւին ուսումնասիրման ենթակայ է:

Share.

Leave A Reply

This site uses Akismet to reduce spam. Learn how your comment data is processed.