ՖՐԱՆՍԱՅԻ ՄԷՋ ՀԱՅ, ՅՈՅՆ, ՔԻՒՐՏ ԵՒ ՖՐԱՆՍԱՑԻ ԳՈՐԾԻՉՆԵՐ ԴԷՄ ԱՐՏԱՅԱՅՏՈՒԱԾ ԵՆ ԷՐՏՈՂԱՆԻ ՓԱՐԻԶ ԱՅՑԵԼՈՒԹԵԱՆ

0

Ֆրանսայի մէջ շարք մը մտաւորականներ, գիտնականներ, քաղաքական ու հասարակական գործիչներ կտրականապէս դէմ արտայայտուած են 11 Նոյեմբերին Փարիզի մէջ տեղի ունենալիք Համաշխարհային Առաջին Պատերազմի աւարտի 100-ամեակին նուիրուած ձեռնարկներուն մասնակցութեան նպատակով Թուրքիոյ նախագահ Ռեճէպ Թայիպ Էրտողանի այցելութեան:

 

Ինչպէս կը գրէ գերմանական «Տաթչէ Վելլը»ի (Deutsche Welle) թրքական ծառայութիւնը, ցոյցի մասնակիցներուն հրապարակած միատեղ յայտարարութիւնը ստորագրած են նաեւ ֆրանսահայ համայնքի ազդեցիկ կազմակերպութիւններու անդամները:

 

Կոչին միացած են յայտնի ֆրանսացի փիլիսոփայ Փասքալ Պրիւքները, Ֆրանսայի խորհրդարանին Հայոց Ցեղասպանութեան ժխտումը քրէականացնող օրինագիծ ներկայացուցած պատգամաւոր Վալերի Պուայէն, «Արեւելքի Քրիստոնեաներու Համակարգում» կազմակերպութեան ղեկավար Փաթրիք Քարամը, Ֆրանսայի մէջ Կիպրոսի յոյներու համայնքի նախագահ Էվակորաս Մաւրոմաթիսը, Փարիզի քրտական հիմնարկի նախագահ Քենտալ Նեզանը եւ ուրիշներ:

 

Էրտողանը Փարիզի մէջ տեսնել չուզելու գլխաւոր պատճառներէն են Թուրքիոյ կողմէն Հայոց Ցեղասպանութեան հերքումը, Կիպրոսի եւ Թուրքիոյ քուրտ բնակչութեան դէմ վարած քաղաքականութիւնը, հակասեմական տրամադրութիւններու պարբերական բորբոքումն ու երկրին մէջ խօսքի եւ միտքի ազատութեան կոպիտ խախտումները:

 

Ֆրանսայի նախագահ Էմանուէլ Մաքրոնին կոչ ուղղուած է, որ յստակ ուղերձ յղէ Էրտողանին, թէ փարիզեան ձեռնարկներուն անոր մասնակցութիւնը չի նշանակեր, որ Ֆրանսան հաւանութիւն կու տայ անոր վարած քաղաքականութեան:

 

Յայտնի է, որ Ֆրանսայի Հայկական Կազմակերպութիւնները Համակարգող Մարմինը (CCAF) իր կարգին առանձին նամակ յղած է Մաքրոնին՝ իր բողոքը արտայայտելով Էրտողանի այցելութեան հետ կապուած:

 

 

Share.

Leave A Reply

This site uses Akismet to reduce spam. Learn how your comment data is processed.