ՍՈՒՐԻՈՅ ՄՕՏ ՀԱՅԱՍՏԱՆԻ ՀԱՆՐԱՊԵՏՈՒԹԵԱՆ ԴԵՍՊԱՆ ԱՐՇԱԿ ՓՕԼԱՏԵԱՆԻ ՀՐԱԺԵՇՏԻ ՀԱՆԴԻՊՈՒՄԸ ՍՈՒՐԻՈՅ ՎԱՐՉԱՊԵՏ ԻՄԱՏ ԽԱՄԻՍԻ ՀԵՏ

0

Դիւանագիտական առաքելութիւնը աւարտելու առնչութեամբ՝ Սուրիոյ մօտ Հայաստանի Հանրապետութեան դեսպան Արշակ Փօլատեան հանդիպում ունեցաւ  Սուրիոյ վարչապետ Իմատ Խամիսի հետ։

Ողջունելով դեսպան Փօլատեանը՝ Սուրիոյ կառավարութեան ղեկավարը շնորհակալութիւն յայտնեց երկարամեայ անձնուէր ծառայութեան համար՝ յայտնելով որ բարձր կը գնահատէ պատերազմական դժուարին պայմաններու մէջ հայ-սուրիական բարեկամական յարաբերութիւններու խորացումին եւ զարգացումին ուղղուած ՀՀ դեսպանի ջանքերը։

Իր կարգին Արշակ Փօլատեան երախտագիտութիւն յայտնեց Սուրիոյ վարչապետին ողջոյնի ջերմ խօսքերուն համար՝ ընդգծելով, որ Սուրիոյ մէջ իր պաշտօնավարման տարիներուն մշտապէս վայելած է կառավարութեան լիակատար աջակցութիւնն ու հոգատար վերաբերմունքը պետական բոլոր մակարդակներու վրայ: Ան յայտնեց, որ Սուրիան կը թողու բաւարարուածութեամբ՝ տեսնելով շուրջ ութը տարուան արհաւիրքէ վերջ բարեկամ Սուրիոյ գրեթէ ամբողջ տարածքին վրայ խաղաղութեան վերականգնումի նշոյլներ:

Անդրադառնալով հայ-սուրիական յարաբերութիւններուն՝ ՀՀ դեսպանը յայտնեց, որ Սուրիան առանձնայատուկ նշանակութիւն եւ դեր ունի Հայաստանի եւ հայ ժողովուրդին համար, քանի որ շուրջ մէկ դար առաջ Օսմանեան Ցեղասպանութենէն մազապուրծ եղած տասնեակ հազարաւոր հայեր ապաստան գտան սուրիական հողին վրայ եւ սուրիացի ասպնջական ժողովուրդը հայ տարագիրներուն առջեւ բացաւ իր սրտերն ու դռները: Դեսպանը աւելցուց, որ այսօր աշխարհի աւելի քան հարիւր տասնչորս պետութիւններու մէջ հայեր կ’ապրին, որոնց նախնիները մեծ մասամբ Սուրիայէն եկած են այդ երկիրներ: Դեսպան Փօլատեան ընդգծեց, որ Հայաստանը իր կարելիութիւններու սահմաններուն մէջ փորձեց աջակցիլ բարեկամ Սուրիոյ ողբերգական պատերազմի տարիներուն՝ իր օգնութեան լուման ներդնելով բարեկամ ժողովրդին աջակցելու եւ Սուրիոյ վերականգնման գործին:

Իմատ Խամիս իր հերթին յայտնեց, որ Հայաստանը իր երկրի ամենամօտ դաշնակից պետութիւններէն է, որ չնահանջեց պատերազմի դժուարութիւններուն առջեւ՝ պահպանելով դիւանագիտական ներկայութիւնը Դամասկոսի ու Հալէպի մէջ՝ մշտապէս համագործակցելով Սուրիոյ հետ երկու բարեկամ ժողովուրդներու շահին եւ բարօրութեան համար: Սուրիոյ վարչապետը յոյս յայտնեց, որ այժմ, երբ սուրիական մարտադաշտին վրայ զինեալներն ու ահաբեկիչները պարտութեան մատնուած են եւ երկիրը կը թեւակոխէ վերականգնումի եւ տնտեսական վերակենդանացման շրջան՝ Հայաստանը, որպէս բարեկամ եւ դաշնակից պետութիւն կը վերսկսի տնտեսական երկխօսութիւնը Սուրիոյ հետ: Ան յայատնեց նաեւ, որ կ’ակնկալէ մօտ ապագային սուրիական շուկային մէջ հայկական ապրանքներու վերադարձ:

Հանդիպումի աւարտին Իմատ Խամիս դեսպան Արշակ Փօլատեանին յաջողութիւն մաղթեց դիւանագիտական հետագայ գործունէութեան մէջ եւ խնդրեց իր ջերմ ողջոյններն ու բարեմաղթանքները փոխանցել բարեկամ Հայաստանի կառավարութեան ու հայ ժողովուրդին:

 

Share.

Leave A Reply

This site uses Akismet to reduce spam. Learn how your comment data is processed.