ՍՆՆԴԱՆԻՒԹԵՐ՝ ԱՌՈՂՋ ԱՉՔ ՈՒՆԵՆԱԼՈՒ ՀԱՄԱՐ

0

Մարդիկ կը հաւատան, որ ծերութիւնը անխուսափելի է: Սակայն գիտութիւնը այնուամենայնիւ փաստած է  առողջ ապրելակերպի դրական ազդեցութիւնը առողջութեան եւ բնականոն ծերութիւն մը ապրելու ընթացքին վրայ: 2001-ին տեղի ունեցած ուսումնասիրութիւններու ընթացքին ի յայտ եկած է, որ որոշ սննդանիւթեր, ինչպէս՝ զինկ, պղինձ, Սէ կենսանիւթ, Ի կենսանիւթ եւ պեթթա քարոթին կը նուազեցնեն աչքի հիւանդութեան վտանգը 25 առ հարիւր համեմատութեամբ:

Ուսումնասիրողներ համակարծիք են այն բանին, որ աչքի առողջութեան համար կենսական նշանակութիւն ունին օմեկա -3 Ճարպաթթուն, պղինձը, լութինը եւ պէթթաքարոթինը:

Ամերիկեան Ակնաբուժութեան  Ակադեմիան խորհուրդ կու տայ հետեւեալ սննդանիւթերով հարուստ ուտելիք սպառել աչքի առողջութիւնը պահպանելու համար:

1-ՁՈՒԿ

Ձուկը հարուստ է օմեկա-3 ճարպանիւթով: Իւղոտ ձուկը իր մարմինի հիւսուածքին մէջ աւելի շատ իւղ կը պարունակէ,  հետեւաբար՝ մեծ քանակով օմեկա-3:

Ուստի կարելի է մեր սնունդին մէջ յաճախակիօրէն ներառնել ծովային կենդանիներու հետեւեալ տեսակները.- թոն,իշխան, սալամոն, սարտին, ծովախեցգետին, կակղամորթեր:

Ուսումնասիրութիւններ ցոյց տուած են ձկան իւղին դրական ազդեցութիւնը աչքի չորացման պարագային: Երեւոյթ մը, որ ի յայտ  կու գայ երկար ատեն  համակարգիչին դիմաց աշխատելու հետեւանքով:

2-ԸՆԿՈՅԶ ԵՒ  ՊՂՊԵՂ

Ընկոյզը նոյնպէս հարուստ է օմեկա-3- ճարպաթթույով: Ան կը պարունակէ կենսանիւթ Ի, որ կը պաշտպանէ աչքը տարիքի հետ յառաջացող ախտերէն:

Կարելի է օգտագործել՝ ընկոյզ, պալատուր (Cashew), նուշ,  գետնապիստակ (peanut), ոսպ եւ շագանակ:

3-ՍԵՐՄԵՐ

Սերմները եւս կենսանիւթերու  եւ Օմեկա-3-ի աղբիւր կը համարուին: Հարուստ սերմեր կը նկատուին  շիայի եւ կտաւատի սերմերը:

 

 4-ՏԵՐԵՒԱՒՈՐ ԲԱՆՋԱՐԵՂԷՆ

Կանաչ տերեւներով բանջարեղէնները հարուստ են կենսանիւթերով, միքրօ-էլեմաններով, ազօթային նիւթերով եւ հակաօքսիտաններով: Կարելի է յիշել շոմինը, կաղամբը եւ ազատքեղը, որոնք կը նուազեցնեն աչքի հիւանդութիւններու յառաջացման  հաւանականութիւնը:

5- ՍՏԵՊՂԻՆ

Ան հարուստ է Ա. Կենսանիւթով եւ պէթթա քարոթինով:Անոնք կենսական դեր ունին տեսողութեան վրայ:

6-  ԱՆՈՒՇ ԳԵՏՆԱԽՆՁՈՐ

Այս նաեւ հարուստ է պէթթաքարոթինով եւ կը պարունակէ Ի կենսանիւթ:

7- ՀՈՐԹԻ  ՄԻՍ

Հորթուկի միսը հարուստ է զինկով, որ կ’երաշխաւորէ աչքի երկարատեւ առողջութիւնը: Ան կ’օգնէ տարիքի հետ կապուած տեսողութեան ախտերէն պաշտպանուելու: Հաւու կամ խոզի միսը  կը պարունակէ աւելի քիչ քանակով զինկ:

Զինկը կենսական է ցանցաթաղանթին եւ  ջղային համկարգը շրջապատող անօթային հիւսուածքին համար:

8-ՀԱՒԿԻԹ

Հաւկիթը կը պարունակէ Սէ եւ Ի կենսանիւթեր, զինկ եւ էնզայմներ, որոնք կը նուազեցնեն տարիքի հետ կապուած տեսողութեան կորուստի վտանգը:

9-ՋՈՒՐ

Զարմանալի է, բայց ջուրը նոյնպէս կարեւոր է աչքին առողջութեան համար: Ջուր խմելը կը կանխէ ջրազրկումը՝ նպաստելով աչքի խոնաւութեան պահպանումին:

Տարիքի յառաջացումին  հետ մարդոց մեծամասնութեան տեսողութիւնը կը տկարանայ, սակայն առողջապահական սնունդ ստանալով կարելի է նուազեցնել այդ բացասական  ընթացքը:

 

Աչքի առողջութիւնը պահպանելու համար անհրաժեշտ է նաեւ.

-Աչքի ամբողջական քննութեան ենթարկուիլ 40 տարեկանէն սկսեալ

-Պարզել ժառանգականութեան տուեալները

-Առողջ ապրիլ

-Հրաժարիլ  ծխախոտէն

-Յատկապէս ամրան արեւի ակնոց կրել:

Share.

Leave A Reply

This site uses Akismet to reduce spam. Learn how your comment data is processed.