ՄԱՐԶԱԿԱՆ՝ ՆՈՅԵՄԲԵՐ Գ./2018

0

Սիմոն Մարտիրոսեան Դարձաւ Աշխարհի Ախոյեան

Թուրքմենիստանի մայրաքաղաք Աշխապատի մէջ տեղի ունեցած ծանրամարտի աշխարհի ախոյեանութեան, Հայաստանը ներկայացնող մարզիկ Սիմոն Մարտիրոսեան նուաճեց աշխարհի ախոյեանի կոչումը:

21 տարեկան ծանրամարտիկը, հանդէս եկաւ 109 քկ. դասակարգին մէջ եւ արձանագրելով 195 քկ. եւ 230 քկ. գրաւեց առաջին դիրքը: Ախոյանութեան կողքին, Մարտիրոսեան 240 քկ. բարձրացնելով արձանագրեց նաեւ աշխարհի նոր մրցանիշ եւ երկամարտի պայքարը աւարտեց 435 քիլոկրամով:

Ծանրորդ Գոռ Մինասեան Դարձաւ Աշխարհի Փոխախոյեան

Ծանրամարտի Հայաստանի տղոց հաւաքականի անդամ Գոռ Մինասեան աշխարհի ախոյեանութեան մրցումներուն դարձաւ արծաթէ մետալակիր: Պոկումի վարժութեան առաջին փուլին, Մինասեան բարձրացուց 200 քկ.: Այնուհետեւ ան ծանրաձողի ծանրութիւնը բարձրացուց 5 քկ.-ով եւ գլուխէն վեր պահեց 205 քկ. ծանրութիւն ունեցող  ձող մը: Ան, սակայն, չկրցաւ 211 քկ. կշռող ձողը բարձրացնել: Այսպիսով Մինասեան նուաճեց արծաթէ մետալ: Պոկումի մրցումի ընթացքին 217 քկ.-ով աշխարհի ախոյեան դարձաւ Վրաստանի ներկայացուցիչ Լաշա Տալախաձէն: Հրումի մրցումներուն, կիւմրեցի ծանրորդը նախ բարձրացուց 240 քկ. ետքը 245 քկ.: Երկամարտին 450 քկ. բարձրացնելով ան դարձաւ աշխարհի առաջնութեան փոխախոյեան: Աւելցնենք, որ Գոռ Մինասեան 2016-ին 31-րդ ամառնային ողոմպիական մրցումներուն դարձած էր փոխախոյեան, իսկ 2015-ի աշխարհի առաջնութեան՝ պրոնզէ մետալակիր: Ան երկու անգամ դարձած է Եւրոպայի առաջնութեան փոխախոյեան (2016, 2017):

Մխիթարեան «Արսենալ»-«Սփորթինկ» Խաղի Լաւագոյն Խաղցող

Հայաստանի ֆութպոլի ազգային հաւաքականի եւ Լոնտոնի «Արսենալ»ի կիսապաշտպան Հենրիկ Մխիթարեան հանդիսացաւ Եւրոպայի լիկայի 4-րդ փուլին «Սփորթինկ»ի դէմ տեղի ունեցած խաղի լաւագոյն ֆութպոլիստը: «Արմէնփրէս»ի համաձայն, Եւրոպայի լիկայի խմբային մրցումներուն ընթացքին «Արսենալ»ը 4-րդ փուլին հիւրընկալեց Լիզպոնի «Սփորթինկ»ը: Հանդիպումը աւարտեցաւ 0 – 0 հաւասարութեամբ: Այս փուլէն ետք, «Արսենալ»ը ապահովեց իր տեղը Եւրոպայի լիկայի փլէյ-օֆի փուլին:

Կարէն Խաչանով Պարտութեան Մատնեց Նովաք Ճոքովիչը

Ռուսիան ներկայացնող հայազգի խաղցող Կարէն Խաչանով, Փարիզի մէջ տեղի ունեցող  «Մասթըրզ» մրցաշարքի աւարտականին յաջողեցաւ պարտութեան մատնել թենիսի արհեստավարժ մարզիկներու աշխարհի լաւագոյն խաղցող Նովաք Ճոքովիչը: Խաղի երկու փուլերուն  7-5 եւ 6-4 յաղթելէ ետք, Խաչանով թենիսի դասաւորման մէջ 16-րդէն բարձրացաւ 11-րդ դիրքի: Առաջին դիրքին վրայ 8045 կէտով կը մնայ Ճոքովիչը: Երկրորդ եւ երրորդ դիրքերուն վրայ են սպանացի Ռաֆայէլ Նատալ եւ զուիցերիացի Ռ. Ֆետերէր:

Share.

Leave A Reply

This site uses Akismet to reduce spam. Learn how your comment data is processed.