ՄԱՐԶԱԿԱՆ՝ ՆՈՅԵՄԲԵՐ Դ./2018

0

ՀԱՅԿԱԿԱՆ

Հայաստան Ջախջախեց Ջիպրալթարը, Իւրա Մովսիսեան Չորս Կոլի Հեղինակ

Հայաստանի ֆութպոլի հաւաքականը ՈՒԵՖԱ-ի Ազգերու Լիկայի ընտրական փուլի 5-րդ խաղին յաղթանակ արձանագրեց՝ պարտութեան մատնելով Ջիպրալթարի ազգային հաւաքականը: Ջիպրալթարի «Վիքթորիա» մարզադաշտին մէջ կայացած հանդիպումի առաջին կէսը ընթացաւ հաւասար արդիւնքով: Խաղի 10-րդ վայրկեանին, Տէ Պար առաջ մղեց հիւրընկալ խումբը, սակայն 17 վայրկեան անց Իւրա Մովսիսեան նշանակեց հաւասարութեան կոլը: Ընդմիջումէն ետք խաղը արդէն անցաւ Հայաստանի բացայայտ վերահսկողութեան: Մրցումի աստղ՝ Իւրա Մովսիսեան, վեց վայրկեանի մէջ նշանակեց երեք կոլ եւ դարձաւ քառեակի հեղինակ: Հանդիպումի 66-րդ վայրկեանին, հաւաքականի նորեկ խաղցող Արթուր Քարտաշեան արձանագրեց կազմի հինգերորդ կոլը: 78-րդ վայրկեանին, Փրիսլի կրճատեց հաշիւին տարբերութիւնը, սակայն 90+4-րդ վայրկեանին փոխարինման մտած Ալեքսանտր Կարապետեան դիպուկ հարուածով վերջակէտ դրաւ այդ կոլառատ հանդիպումին, որ աւարտեցաւ 6 – 2 արդիւնքով: Այսպիսով, Հայաստանի հաւաքականը երրորդ յաղթանակը արձանագրելով ապահովեց 9 կէտ:

ՄԻՋԱԶԳԱՅԻՆ

Սոլարի Պաշտօնապէս Ստանձնեց Ռէալ Մատրիտի Մարզիչի Պաշտօնը

Վերջին մէկ ամսուան ընթացքին, Սպանիոյ արքայական ակումբի՝ Ռէալ Մատրիտի կազմին մարզիչի պաշտօնը թափուր մնացած էր, երբ խումբի արդիւնքներուն նահանջին հետեւանքով պաշտօնազուրկ եղած էր խումբի մարզիչ Խիւլէն Լոփեթէկի: Անցեալ շաբթուան սկիզբը Ռէալ Մատրիտ պաշտօնապէս յայտարարեց, որ արժանթինցի Սանթիակօ Սոլարի նշանակուեցաւ ակումբի գլխաւոր մարզիչ, մինչեւ 2021: Սպանացի Խիւլէն Լոփեթէկիի պաշտօնազրկումէն ետք, ան կը կատարէր ժամանակաւոր պաշտօնակատարի պարտականութիւնը: Յայտնենք, որ Սոլարիի գլխաւորութեամբ Ռէալ Մատրիտ չորս մրցումի ընթացքին արձանագրեց 4 յաղթանակ` նշանակելով 15 կոլ՝ իր դարպասին մէջ ստանալով միայն 2 կոլ: Ըստ խումբի արդիւնքներուն, այս կը նկատուի մարզիչի մը լաւագոյն սկիզբը` 1929-էն ի վեր: Տեղին է յիշել նաեւ, որ 42 տարեկան արժանթինցին, 2000-էն 2005 որպէս խաղցող մաս կազմած է Ռէալ Մատրիտին, 2016-էն ի վեր անոր վստահուած է ակումբի երիտասարդական խումբին մարզիչութեան պաշտօնը:

Նապոլի Մերժեց Մանչէսթըր Իւնայթըտ-ի 90 Միլիոն Եւրոյի Առաջարկը

Նափոլիի պաշտպան Կալիտու Կուլիփալի արժանացած է Մանչէսթըր Իւնայթըտի ուշադրութեան: 27տարեկան մարզիկին ծառայութեամբ անձամբ հետաքրքրուած է «կարմիր սատանաներու» գլխաւոր մարզիչ Ժոզէ Մորինիօն: Ըստ La Republica-ի, Մանչէսթըր Իւնայթըտ արդէն պաշտօնական առաջարկ ներկայացուցած է Նափոլին Կուլիփալին միացնելու համար, իրեն տրամադրելով 90 միլիոն եւրօ: Նշենք, որ սենեկալցի ֆութպոլիստը վերջերս մինչև 2023 թուականը երկարաձգած է Նափոլիի հետ իր պայմանագիրը: Ըստ լուրերուն, Կուլիփալիի ծառայութիւններով հետաքրքրուած են նաեւ Ռէալը, Պարսելոնան, «Մանչէսթըր Սիթին եւ Պայէրն Միունիխը:

Share.

Leave A Reply

This site uses Akismet to reduce spam. Learn how your comment data is processed.