DER SPIEGEL. «ԷՐՏՈՂԱՆ ԿԸ ՎԱԽՆԱՅ ԺՈՂՈՎՈՒՐԴԷՆ»

0

Գերմանական «Der Spiegel» ամսագիրի թղթակից, թրքագէտ Մաքսիմիլիան Փոփ «Էրտողան կը վախնայ ժողովուրդէն» խորագրեալ իր յօդուածին մէջ պնդած է, որ Էրտողան կը վախնայ «Կէզի» զբօսայգիի ցոյցերուն նմանող նոր ընդդիմութեան մը ալիքէն։

Հեղինակը կը յիշեցնէ, որ «Կէզի»ի դիամդրութիւնը վերջին տարիներուն Թուրքիոյ մէջ տեղի ունեցած ամենազանգուածային շարժումն էր, որուն միլիոնաւոր մարդիկ մասնակցած էին։ Կը յիշուի նաեւ, որ նախագահ Էրտողան «Կէզի»ի զբօսայգիին մէջ խաղաղ ցոյց կազմակերպող քաղաքացիները կը փորձէ մեղադրել նաեւ  15 Յուլիս 2016-ի յեղաշրջումը հրահրելու յանցանքով։

«Էրտողան Հիմա կ’ըսէ,  թէ ան որ կը գովէ «Կէզի»ի դէպքերը, թաքուն կամ բացայայտ կերպով գոված կ՛ըլլայ նաեւ Քիւրտիստանի Բանուորական Կուսակցութիւնը, կ՛աջակցի FETÖ-ին (ամերիկաբնակ թուրք գործիչ Ֆեթհուլլահ Կիւլէնի ղեկավարած կառոյցը-խմբ․)։

Էրտողան կը գործէ՝ համակուած այն վախով, թէ Կազիի դէպքերը կրնան կրկնուիլ։ Քաղաքացիները կրկին սկսած են Էրտողանին դէմ ցոյցեր կազմակերպել։ Նկատելի է, որ վերջին քանի մը շաբթուան ընթացքին այդ վախը աւելի սաստկացած է», կ’ըսուի յօդուածն մէջ։

Հեղինակը դիտել կու տայ, որ այսօրուան Թուրքիան, Էրտողանի իշխանութեան հասնելէն ետք, ամենամեծ տնտեսական ճգնաժամը կ’ապրի։ «Հոկտեմբերին սղաճին մակարդակը հասած էր 25 տոկոսի։ Առաջին անհրաժեշտութեան ապրանքներուն գինը 30 տոկոսով բարձրացած է, պտուղներուն ու բանջարեղէնինը՝ 50 տոկոսով։ Իշխանամէտներու  շրջանակին մէջ անգամ դժգոհութիւնները հետզհետէ ընդլայնիլ սկսած են»։

Աղբիւրը կը ներկայացնէ վիճակագրական տուեալներ այն մասին, որ իշխող Արդարութիւն եւ Զարգացում Կուսակցութեան (AKP) եւ Էրտողանի աջակիցներուն թիւը արդէն 40 տոկոսէն աւելի նուազած է։

«Քաղաքագէտ Եասեմին Աջարի գնահատումով՝ Թուրքիոյ մէջ տիրող իրավիճակը կրնայ յանգեցնել զանգուածային նոր ըմբոստութիւններու։ Լարուածութիւնը կ’աճի, եւ որպէսզի այդ լարուածութիւնը որեւէ գործողութեան չվերածուի,  պէտք է անմիջապէս բռնաճնշումի ենթարկուի», կը գրէ պարբերականը։

Փոփ կը յիշեցնէ, որ Թուրքիոյ շատ մը շրջաններուն մէջ քաղաքացիները ցոյցեր կը կազմակերպեն՝ ի պաշտպանութիւն ժողովրդավարութեան եւ խօսքի ազատութեան, իսկ Էրտողան կը քրէականացնէ նման նախաձեռնութիւնները՝ ոստիկանութեան ձեռքով բռնութիւն եւ ճնշում գործադրելով ցուցարարներուն դէմ։

«Նման ճնշումներով իշխանութիւնները ժողովուրդին շատ յստակ ուղերձ կ’ուզեն հասցնել․ «թող ձեր մտքէն չանցնի փողոց ցոյցի ելլել»»,  կ’եզրափակէ յօդուածագիրը:

 

Share.

Leave A Reply

This site uses Akismet to reduce spam. Learn how your comment data is processed.