ՀՄԸՄ-ԱԿԱՆ ՆՆՋԵՑԵԱԼՆԵՐՈՒ ՀՈԳԵՀԱՆԳՍՏԵԱՆ ԱՐԱՐՈՂՈՒԹԻՒՆ

0

ՀՄԸՄ-ի Սուրիոյ Շրջ. Վարչութեան, ՀՄԸՄ-ի մեծ ընտանիքը յարգելով միութեան հիմնադիրներուն եւ ՀՄԸՄ-ական ննջեցեալներուն ու նահատակներուն յիշատակը, Կիրակի, 25 Նոյեմբեր 2018-ին հոգեհանգստեան պաշտօն կազմակերպեց եւ խունկ ու աղօթք բարձրացուց առ Աստուած, Ազգ. Գերեզմանատան մատուռին մէջ: Արարողութեան  նախագահեց Արժ. Տ. Մաշտոց Քհնյ. Արապաթլեան, ներկայ  էին ՀՄԸՄ-ի Սուրիոյ Շրջ. Վարչութեան, Պատկան Մարմինի ներկայացուցիչներ, ՀՄԸՄ-ի Սուրիոյ Շրջ. Սկաուտ Խորհուրդը, Շրջանային Խմբապետութիւնը, ՀՄԸՄ-ի Հալէպի Մասնաճիւղի Վարչութիւնը, Սկաուտ Խորհուրդը, մասնաճիւղի փողերախումբը, մասնաճիւղի խմբապետը, աստիճանաւորական եւ խմբապետական տարազաւոր կազմերը եւ  ՀՄԸՄ-ի դամբարանին մէջ թաղուած ՀՄԸՄ-ականներու հարազատները:

Հոգեհանգստեան պաշտօնէն ետք, Հալէպի Մասնաճիւղի փողերախումբին առաջնորդութեամբ ներկաները ուղղուեցան դէպի ՀՄԸՄ-ի նուիրեալներու դամբարան, ուր քահանայ  հօր առաջնորդութեամբ աղօթք բարձրացուցին առ Աստուած, այնուհետեւ երեք ծաղկեպսակներ զետեղեցին՝ ՀՄԸՄ-ի Սուրիոյ Շրջ. Վարչութեան եւ ՀՄԸՄ-ի Հալէպի Մասնաճիւղի Վարչութեան ատենապետները, ՀՄԸՄ-ի Սուրիոյ Շրջ. Սկաուտ Խորհուրդի ու ՀՄԸՄ-ի Հալէպի Մասնաճիւղի Սկաուտ Խորհուրդի ատենապետները եւ ՀՄԸՄ-ի Հալէպի Մասնաճիւղի փողերախումբի խմբավարը, քոյրերն ու եղբայրները, ապա փողերախումբին նուագակցութեամբ բոլորը երգեցին ՀՄԸՄ-ի «Յառաջ Նահատակ» քայլերգը: Այնուհետեւ ներկաները ուղղուեցան դէպի Սիմոն Վրացեան կեդրոնի «Լուտեր Մասպանաճեան» սրահ, ուր տեղի ունեցաւ սուրճի   հիւրասիրութիւն: ՀՄԸՄ-ի Սուրիոյ Շրջ. Վարչութենէն Արմէն Քէօշկէրեան ողջունեց բոլոր քոյրերուն եւ եղբայրներուն ներկայութիւնը, ապա հրաւիրեց Շրջ. Վարչութեան ատենապետ Մանուկ Քէօշկէրեանը  արտասանելու Շրջ. Վարչութեան խօսքը: Քէօշկէրեան ըսաւ. «Հակառակ բոլոր դժուարութիւններուն, ձեռք-ձեռքի տալով, «Բարձրացի՛ր-Բարձրացո՛ւր» նշանաբանը ուղեցոյց ունենալով ՀՄԸՄ-ը պիտի շարունակէ իր յաղթական երթը, պատրաստելով արի, գիտակից հայ նոր սերունդներ:
Հաստատ քայլերով միասնաբար ընթանանք դէպի լուսաւոր հարիւրամեակներ, միշտ յիշելով միութեան ռահվիրաները ու այն բոլոր ՀՄԸՄ-ականները, որոնք իրենց անվերապահ ներդրումը բերին Միութեան աճման, զարգացման եւ համա-հայկական բնոյթ ստանալուն համար:
«Յիշատակը անմեռ մնայ բոլոր անոնց, որոնք գործեցին ու անցան ՀՄԸՄ-ի շարքերէն:
Սիրելի՛ եղբայրներ, մենք վստահ ենք, որ ձեր հոգիները կը սաւառնին ու վերէն կը հետեւիք ՀՄԸՄ-ի կատարած աշխատանքներուն: Բիւր յարգանք ձեր միութենական վաստակին եւ յիշատակին:
«Պարտք կը զգանք ամէն տարի ոգեկոչելու յիշատակը բոլոր անոնց, որոնք նուիրուեցան ՀՄԸՄ-ին ու գործեցին ՀՄԸՄ-ի համար:
«Կ’ողբանք հին թէ նոր մահացած բոլոր ՀՄԸՄ-ական եղբայրներուն կորուստը անխտիր:
«ՀՄԸՄ-ի Սուրիոյ Շրջ. Վարչութեան անունով աշխարհատարած ՀՄԸՄ-ի 110 մասնաճիւղերու վարչութեանց միջոցաւ մեր երախտագիտութիւնն ու ցաւակցութիւնը կը յայտնենք, ինչպէս նաեւ կը խոնարհինք ՀՄԸՄ-ի համայն ընտանիքին, մեզմէ յաւերժ բաժնուած բոլոր ՀՄԸՄ-ականներուն ամէնէն համեստ անդամէն, ամէնէն բարձր դիրքի վրայ գործած ու անցած քոյրերու եւ եղբայրներու յիշատակին առջեւ»:

Ապա Արժ. Տ. Մաշտոց Քհնյ. Արապաթլեան եզրափակեց  հանդիպումը՝ վեր առնելով ՀՄԸՄ-ականներուն վաստակը: Ան դիտել տուաւ,  որ յարգելով միութեան ննջեցեալները օրհնութիւն եւ ուժ կը ստանանք՝ շարունակելու մարդակերտ այս միութեան առաքելութիւնը:

Յարգանքի հանդիպումը փակուեցաւ «Պահպանիչ» աղօթքով:

Share.

Leave A Reply

This site uses Akismet to reduce spam. Learn how your comment data is processed.