ԵՂԲ. ՅԱՐՈՒԹԻՒՆ ՊԱՐՍԱՄԵԱՆԻ ԱՆԹԱՌԱՄ ՅԻՇԱՏԱԿԻՆ

0

ՀՄԸՄ-ի ազգանուէր գործունէութեան մէջ անմնացորդ ծառայութիւն մատուցողներու առաջատար եւ ընտրանի հոյլին կը պատկանի եղբ. Յարութիւն Պարսամեան, որ անխոնջ ու բազմաշխատ նուիրեալ մը եղաւ։ ՀՄԸՄ-ականները իրեն համար եղած էին իսկական հարազատ եղբայրներ, որոնց նկատմամբ անսահման սէր եւ գուրգուրանք կը տածէր սեփական անձէն աւելի։ Համբերութեամբ կը լուծէր բոլոր հարցերը։ Ատելութիւն բացարձակապէս չունէր։ Փնտռուած անձնաւորութիւն մըն էր թէ՛ պետական եւ թէ՛ միութեան շրջանակներէն ներս։ Ահա թէ ինչո՛ւ աւելի քան 60 տարի անշահախնդրօրէն ծառայեց ՀՄԸՄ-ին, հաւատալով անոր ազգանպաստ եւ հայանուէր գործունէութեան։

Ծնած է Խարբերդ 1926-ին, ապա ծնողքին հետ հաստատուած է Հալէպ։ Յաճախած է Կրթասիրաց վարժարան, որմէ ետք ուսումը շարունակած է ֆրանսական «Փրեմ Փարթի Լայք» դպրոցը եւ տիրացած՝ երկրորդական վկայականի։ Հետագային մուտք գործած է գործի ասպարէզ։

1940-ին անդամագրուած է ՀՄԸՄ-ի շարքերուն։ Իսկ 1975 թուականէն ի վեր մաս կազմած է ՀՄԸՄ-ի յաջորդական վարչութիւններուն։ 1978-ին յետ պաշտօնական քուէարկութեան անդամ դարձած է Հալէպի նահանգապետական խորհուրդին եւ սոյն պաշտօնը վարած՝ 12 տարի։ 1996-2000 ստանձնած է ՀՄԸՄ-ի վարչութեան ատենապետութիւնը, իսկ 1993-ին ՀՄԸՄ-ի Կեդրոնական Վարչութիւնը պարգեւատրած է զինք շքանշանով իր երկարամեայ ծառայութեան համար, ինչպէս նաեւ պարգեւատրուած է Սուրիոյ ֆետերասիոնին կողմէ՝ մասնաւոր վկայականով եւ շքանշանով։

Մեծ ներդրում բերած է Պոսթան Փաշա շրջանի ՀՄԸՄ-ի մարզաւանի հողաշերտի ապահովման եւ ապա անոր շինարարական աշխատանքներու յաջողութեան մէջ։

Եղած է Բերիոյ Հայոց Թեմի Ազգային Գաւառական Ժողովի անդամ, ինչպէս նաեւ մաս կազմած է Ազգային Վարչութեան Կալուածոց Հոգաբարձութեան։ Երկար տարիներ եղած է Ազգ. Քարէն Եփփէ Ճեմարանի Խնամակալութեան անդամ։

Որպէս զանազան մարզախաղերու պատուիրակութեանց պատասխանատու այցելած է հայրենիք, Ֆրանսա, Յորդանան եւ Եգիպտոս։

Եղբ. Պարսամեանի համար ՀՄԸՄ-ին անդամակցիլ կը նշանակէր ըլլալ եւ գործել մաքրամաքուր մթնոլորտի մէջ։ ՀՄԸՄ-ը ոչ միայն մարզական միութիւն է, այլեւ հոգելուծարան է, ուր պատանին կը կոփուի, կը զարգանայ եւ կը թրծուի ազգային արժէքներով ու գաղափարաբանութեամբ։

Եղբ. Յարութ ստանձնեց կուռ, պարկեշտ եւ վստահելի նկարագիր պահանջող դժուար ու պատասխանատու պարտականութիւններ, շահեցաւ օրուան ազգային թէ միութենական ղեկավարութեանց անվերապահ վստահութիւնը։ Միշտ գործեց անխոնջ կերպով, որ որքան գործեց՝ այնքան իր մէջ արմատացաւ եւ զօրացաւ առաւել նուիրուելու վսեմ զգացողութիւնը։ Անմասն չմնաց իր պաշտած Միութեան յաղթանակներէն, միաժամանակ ապրեցաւ քաղաքական փոթորիկի թեժ ժամեր։

Իր օրերուն ՀՄԸՄ-ի ֆութպոլի խումբը զարթօնքի շրջան ապրեցաւ։ Առաւել եւս ՀՄԸՄ-ի պետական գործերը իր անսակարկ ջանքերով հեզասահ կþընթանային եւ ամենայն յաջողութեամբ կը պսակուէին։

Եղբ. Յարութ մնաց միշտ լաւագոյնին ձգտող վեհանձն ու տիպար ՀՄԸՄ-ականը, «Բարձրացի՛ր-Բարձրացո՛ւր»ի հաւատարիմ պատգամախօսը։

Հալէպահայութիւնը եւ ՀՄԸՄ-ի մեծ ընտանիքը քու առ յաւէտ մեկնումովդ կորսնցուցին վաստակաշատ, բազմատաղանդ, անձնուէր եւ կորովի ազգային մը։

Արմէն Քէօշկէրեան

Share.

Leave A Reply

This site uses Akismet to reduce spam. Learn how your comment data is processed.