ԼԻՈՒԱԱ ԻՍՔԷՆՏԷՐՈՒՆԻ ՊԱՀԱՆՋԱՏԻՐՈՒԹԵԱՆ ՀԱՒԱՔԻՆ ՀԱՅ ԵՒ ԱՐԱԲ ԺՈՂՈՎՈՒՐԴՆԵՐՈՒ ԱՐԴԱՐ ՊԱՅՔԱՐԻՆ ԱՆԴՐԱԴԱՐՁ ԿԱՏԱՐՈՒԵՑԱՒ

0

Հինգշաբթի, 29 Նոյեմբեր 2018֊ի առաւօտեան ժամը 12։00֊ին, Հալէպի կեդրոն Պապ ալ Ֆարաճ ժամացոյցի հրապարակին վրայ տեղի ունեցաւ Լիուաա Իսքէնտէրունի պահանջատիրութեան նուիրուած ժողովրդային հաւաք մը, Հալէպի մէջ գործող Լիուաա Իսքէնտէրուն Արաբական Բարեսիրական Յանձնախումբին 58֊րդ տարեդարձին առիթով։ Յետ հաւաքին, հանդիսութիւն մը տեղի ունեցաւ Հալէպի Կեդրոնական գրադարանի սրահին մէջ։ Հանդիսութիւնը սկսաւ Սուրիոյ քայլերգով։ Մուտքին, պետական, կրօնական հիւրերը կը դիմաւորէր ՀՄԸՄ-ի Հալէպի Մասնաճիւղի փողերախումբը՝ հայրենասիրական նուագներով։

Օրուան բանախօս, Լիուաա Իսքէնտէրուն Արաբական Բարեսիրական Յանձնախումբի ատենապետ Շահհին ալ Հաճ ակնարկելով Թուրքիոյ շեշտեց, որ մեր թշնամին նոյնն է, նախապէս Իսքէնտէրունի ներկայիս Աֆրինի եւ այլ քաղաքներու մէջ նոյն ծաւալապաշտ քաղաքականութիւնը կը վարէ։ Ան բարձրօրէն գնահատեց երկրի վսեմաշուք նախագահ տոքթ. Պաշշար ալ Ասատի հայրենասիրական ոգին ու արիաշունչ աշխատանքը։
Ապա ցուցադրուեցաւ պատմական տեսերիզ մը, ուր հակիրճ կերպով ներկայացուեցաւ Իսքէնտէրունի պատմութիւնը, ժողովուրդին գաղթը եւ այլն։ Յատկանշական էր յիշատակումը հայ ժողովուրդին։ Տեսերիզին մէջ յիշուեցաւ, որ արաբ եւ հայ ժողովուրդները միասնաբար դէմ դրին թրքական բռնապետութեան ու բարբարոսութիւններուն։
Ապա ներկաները ուղղուեցան ժամացոյցին մօտ եւ պահանջատիրական լօզունքներով, ՀՄԸՄ-ի փողերախումբին նուագներուն ընկերակցութեամբ փակեցին օրուան բողոքի հաւաքը։
Հաւաքին ներկայ էր նաեւ Սուրիոյ խորհրդարանի երեսփոխան Ժիրայր Րէիսեան։

 

Ժիրայր Կարապետեան

Share.

Leave A Reply

This site uses Akismet to reduce spam. Learn how your comment data is processed.