ԱՐՍԷՆ ՀԱՄԲԱՐՁՈՒՄԵԱՆ. «ՅԱՌԱՋԻԿԱՅ ԸՆՏՐՈՒԹԻՒՆՆԵՐԸ ԱՆՑԵԱԼԸ ՄԵՐԺԵԼՈՒ ՄԱՍԻՆ ՉԵՆ, ԱՊԱԳԱՆ ԿԵՐՏԵԼՈՒ ՄԱՍԻՆ ԵՆ»

0

Հայաստանի Հանրապետութեան խորհրդարանական արտակարգ ընտրութիւններու ՀՅԴ պատգամաւորութեան թեկնածուները քարոզարշաւի շրջանակէն ներս 29 Նոյեմբերին հանդիպումներ ունեցած են Արարատի մարզի տարբեր բնակավայրերու բնակիչներուն հետ: Ամփոփող հանրահաւաքը տեղի ունեցաւ Արտաշատ քաղաքի հրապարակին վրայ, ուր ելոյթով հանդէս եկան մարզի ՀՅԴ Բիւրոյի, ՀՅԴ Հայաստանի Գերագոյն Մարմինի անդամները, ինչպէս նաեւ Հայաստանի ՀՅԴ պատգամաւորութեան թեկնածուները:

ՀՅԴ Հայաստանի Գերագոյն Մարմինի ներկայացուցիչ Արսէն Համբարձումեանը իր ելոյթին մէջ յայտնեց, որ մարզին տարբեր համայնքներուն մէջ բազմաթիւ հանդիպումներ ունեցած են, լսած են մարդոց մտահոգութիւնները: Այնպիսի տպաւորութիւն է, որ մարդիկ կը գտնուին յոյսի եւ անորոշութեան խաչմերուկի մէջ: «Յոյսի, որովհետեւ ապրիլեան համաժողովրդական շարժումէն ետք մեր ժողովուրդի մօտ իսկապէս յոյս արթնացած է, որ կարելի է երկրին մէջ դրական փոփոխութիւնները անշրջելի դարձնել եւ երաշխաւորել բարեկեցիկ կենցաղ: Մեր երկրին մէջ տարիներ շարունակ կուտակուած եւ դժգոհութիւններու պատճառ հանդիասացող հիմնախնդիրները ի վերջոյ լուծում կը ստանան, բայց նոյն ատեն անորոշութեան, որովհետեւ մարդոց համար տակաւին յստակ չէ, թէ ինչպէս, ինչ ճամբով պէտք է կառուցենք մեր երազած նոր Հայաստանը: Այս երկակի դժուար կացութեան մեջ է, որ տեղի պիտի ունենան Ազգային Ժողովի յառաջիկայ ընտրութիւնները:

Կը կարծեմ` բոլորս շատոնց արդէն համոզուած ենք, որ վերադարձ անցեալին չկայ, անցեալի էջը փակուած է մէկընդմիշտ, բայց անցեալի մերժումը ամենեւին չի նշանակեր երաշխաւորուած ապագայ: Որպէսզի ունենանք երաշխաւորուած ապագայ, նախեւառաջ պէտք է հասկնանք, թէ ինչ ծրագիրներով, մօտեցումներով եւ քատրերով պիտի կառուցենք այդ ապագան: Այս առումով հրապարակ գտնուող քաղաքական ուժերու խոստումներուն պակաս չկայ: Կարելի նաեւ դժուար է կողմնորոշուիլը, բայց անոր համար կայ պարզ ճամբայ մը` բոլոր քաղաքական ուժերը ձեր աչքին դիմաց են` համեմատեցէք եւ կը տեսնէք: Համեմատեցէք եւ ձեզի համար ըկ յստականայ` ով ով է, համեմատեցէք եւ կը տեսնէք` ով ինչ կ’ըսէ», ըսաւ ան եւ աւելցուց. «Կ’ուզեմ բան մը յստակ գիտանանք` յառաջիկայ ընտրութիւնները անցեալը մերժելու մասին չեն, յառաջիկայ ընտրութիւնները ապագան կերտելու մասին են»:

Ան շեշտեց, որ այդ պատճառով է, որ սխալելու իրաւունք չունինք: «90-ականէն ի վեր բազմիցս սխալ ընտրութեան հետեւանքով մենք այսօր եկած եւ հասած ենք այս վիճակին, այլեւս սխալելու իրաւունք չունինք: Ուշադիր հետեւեցէք բոլոր քաղաքական ուժերուն եւ եզրայանգումը ձեզի համար այդ պարագային միանշանակ կ’ըլլայ` Դաշնակցութեան օգտին: Միշտ վստահ եղէք, որ ամէն պարագայի թէ՛ քաղաքացիական կեանքի, թէ՛ պատերազմի դաշտին մէջ ձեր կողքին միակ քաղաքական ուժը որ եղած է ու պիտի ըլլայ, Դաշնակցութիւնն է: Ատոր համար ձեզի կոչ կ’ուղղեմ, որ Դաշնակցութեան որդեգրած կարգախօսը` «Հաւատարիմ հողին ու հային» դարձնէք նաեւ ձերը», ըսաւ Համբարձումեան:

Անոր խօսքով` Դաշնակցութիւնը միակ համահայկական ներուժ ունեցող քաղաքական ուժն է եւ չկայ երկրորդը: «Դաշնակցութիւնը ընտրարշաւին մասնակցող միակ քաղաքական ուժն է, որ կը հաւատայ ընկերվարութեան եւ ընկերային արդարութեան: Միակ քաղաքական ուժն է, որ երբեք համախմբուած չէ եղած անձերու շուրջ, չկայ ուրիշ այդպիսի ուժ: Մեր ըսածը երկու պարզ բան է` անվտանգութիւն եւ արդարութիւն: Անվտանգութիւն ռազմաքաղաքական, տնտեսական, բնապահպանական, ընկերային իմաստով եւ արդարութիւն մրցակցութեան ընկերային արդարութեան իմաստով: Շատ պարզ գաղափարներ, պարզ, բայց հիմնարար: Ամբողջ մեր ծրագիրները կառուցուած են այս հիմնարար սկզբունքներուն եւ գաղափարներուն վրայ եւ 128 տարի անցնելով բազմաթիւ փորձութիւններու միջով` Դաշնակցութիւնը երբեք չէ ընկրկած, դրօշակ չէ փոխած, անուն չէ փոխած, ծրագիր ու նպատակ չէ փոխած: Ատիկա է երաշխիքը, որ վաղը կը գիտնաք, թէ որմէ կը պահանջէք, որովհետեւ իւրաքանչիւր դաշնակցականէ առաջին պահանջատէրը Դաշնակցութիւնն է: Դուք այդ վստահութեամբ կրնաք քուէ տալ Դաշնակցութեան եւ իմանալ, որ միշտ կրնաք պահանջատէր ըլլալ»,- եզրափակեց ան:

 

Share.

Leave A Reply

This site uses Akismet to reduce spam. Learn how your comment data is processed.